បរទេស៖ យោងតាមប្រភពព័ត៌មានពី Politico បានរាយការណ៍ថា ប្រធានាធិបតីសហរដ្ឋអាម៉េរិក Donald Trump មិនទាន់ពេញចិត្តនឹងកិច្ចព្រមព្រៀង​ពន្ធសូន្យ​ទល់​នឹង​សូន្យរបស់សហភាពអឺរ៉ុបនោះទេ ពោលគឺតំបន់នេះត្រូវទិញថាមពលពីអាម៉េរិកចំនួន ៣៥០ ពាន់លានដុល្លារ ទើបលោកព្រមពិចារណាលើការដកពន្ធគយ។

ការផ្តល់ជូន​ពន្ធសូន្យ​ទល់​នឹង​សូន្យដោយប្រធានគណៈកម្មការសហភាអឹរ៉ុប លោកស្រី Von der Leyen បានកើតឡើងកាលពីថ្ងៃចន្ទ បន្ទាប់ពីលោក Trump ប្រកាសពន្ធឆ្លើយតបឲ្យមានភាពស្មើគ្នា ២០ ភាគរយលើសហភាពអឺរ៉ុប និងពន្ធអប្បបរមា ១០ ភាគរយលើដៃគូពាណិជ្ជកម្មផ្សេងទៀតកាលពីសប្តាហ៍មុន។ ជាលទ្ធផល ទីផ្សារភាគហ៊ុននៅទូទាំងពិភពលោកបានបាត់បង់តម្លៃរាប់ពាន់លានដុល្លារ ហើយភាគហ៊ុនអឺរ៉ុបបានធ្លាក់ថ្លៃខ្លាំងបំផុតជាលើកដំបូងគិតចាប់តាំងពីអំឡុងពេលរាតត្បាត។

ប្រធានគណៈកម្មការអឺរ៉ុប Ursula von der Leyen បានលើកឡើងថា សហភាពអឺរ៉ុបបានទម្លាក់ពន្ធដល់សូន្យលើរថយន្ត និងទំនិញឧស្សាហកម្មដែលនាំចូលពីសហរដ្ឋអាម៉េរិកប្រសិនបើ Trump ព្រមដកពន្ធគយដែលបានដាក់លើតំបន់នេះ។ អ្នកសារព័ត៌មានបានសួរទៅកាន់ Trump ថា តើការផ្តល់ជូននេះគ្រប់គ្រាន់សម្រាប់គាត់ក្នុងការដកថយឬទេ?

Trump បានបដិសេធថា ៖

«ទេ វាមិនគ្រប់គ្រាន់នោះទេ។​ យើងមានឱនភាពជាមួយសហភាពអឺរ៉ុបដល់ទៅ ៣៥០ ពាន់លានដុល្លារ ហើយវានឹងរលាយបាត់យ៉ាងឆាប់រហ័ស។ វិធីមួយដែលអាចរលាយបាត់បានយ៉ាងងាយ និងឆាប់រហ័ស គឺពួកគេនឹងត្រូវទិញថាមពលពីយើងឲ្យគ្រប់ចំនួនតម្លៃ ៣៥០ ដុល្លារក្នុងរយៈពេលមួយសប្តាហ៍»។

យ៉ាងណាក៏ដោយ ទោះបីជា Trump រិះគន់ចំពោះសហភាពអឺរ៉ុបជារឿយៗ ប៉ុន្តែលោកបានបង្ហាញពីការត្រៀមខ្លួនសម្រាប់កិច្ចព្រមព្រៀងជាមួយតំបន់នេះ ដរាបណាពួកគេប្តេជ្ញាចិត្តដោះស្រាយឱនភាពពាណិជ្ជកម្មជាមួយសហរដ្ឋអាម៉េរិកដោយការទិញថាមពលអាម៉េរិកបន្ថែមទៀត។

Trump លើកឡើងថា ៖

« ពន្ធអាចនឹងមានអចិន្ត្រៃយ៍ ប៉ុន្តែក៏អាចមានការចរចាដែរ ពីព្រោះមានអ្វីដែលយើងត្រូវការលើសពីពន្ធ។ បើសិនជាអាច ពួកយើងនឹងបង្កើតកិច្ចព្រមព្រៀងដ៏ត្រឹមត្រូវល្អមួយសម្រាប់សហរដ្ឋអាម៉េរិក មិនមែនជាកិច្ចព្រមព្រៀងល្អសម្រាប់អ្នកដទៃទេ ពីព្រោះពេលនេះគឺអាម៉េរិកមុនគេ ឬ America first ។ យើងចង់ឱ្យសហភាពអឺរ៉ុបកាត់បន្ថយស្តង់ដារមួយចំនួនរបស់ខ្លួន ដើម្បីអនុញ្ញាតឱ្យទំនិញអាម៉េរិកចូលក្នុងទីផ្សាររបស់ខ្លួនបានកាន់តែច្រើន»។

យ៉ាងណាមិញ គំនិតនៃការទិញ​ថាមពលរបស់​អាម៉េរិក​​ដើម្បី​ចៀសវាងពីការ​យក​ពន្ធមិន​មែន​ជា​រឿង​ថ្មី​នោះ​ទេ ដោយសារប្រធានគណៈកម្មការអឺរ៉ុប von der Leyen ធ្លាប់ស្នើឱ្យបើកការចរចាដើម្បីទិញឧស្ម័នធម្មជាតិរាវរបស់អាម៉េរិក (LNG) បន្ថែមទៀត បន្ទាប់ពី Trump ជាប់ឆ្នោតជាលើកទីពីរភ្លាមៗ ប៉ុន្តែសហរដ្ឋអាម៉េរិកមិនបានផ្តល់ភាពច្បាស់លាស់អំពីរបៀបដែលកិច្ចព្រមព្រៀងនឹងដំណើរការនោះទេ៕