សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព៍ត៌មានពី The Washington Post បានព្យាករណ៍ថា ប្រសិន Donald Trump អនុវត្តតាមផែនការពន្ធរបស់គាត់ពិតមែននោះ វាអាចបង្កជាសង្គ្រាមពាណិជ្ជកម្មជាមួយនឹងសហភាពអឺរ៉ុប ខណៈដែលសហរដ្ឋអាមេរិកគឺជាទីផ្សារនាំចេញធំបំផុតរបស់ពួកគេ និងជាសម្ព័ន្ធមិត្តយុទ្ធសាស្ត្រដ៏ជិតស្និទ្ធបំផុតមួយ។
ជាក់ស្តែង សេដ្ឋកិច្ចសំខាន់ៗរបស់អឺរ៉ុបកំពុងដើរយឺតជាងសហរដ្ឋអាម៉េរិករួចទៅហើយចាប់តាំងពីងើបចេញពីការរាតត្បាត។ សេដ្ឋវិទូព្យាករណ៍ថា គោលនយោបាយគាំពារនិយមដែលដាក់ដោយ Donald Trump អាចបង្កឱ្យទ្វីបនេះមានការធ្លាក់ចុះបន្ថែមទៀត ខណៈពេលដែលកំពុងរឹតបន្តឹងសម្ព័ន្ធភាព។ ក្នុងអំឡុងពេលដែលកាន់តំណែងលើកមុន Donald Trump បានដាក់ពន្ធយ៉ាងច្រើនលើដែក និងអាលុយមីញ៉ូម ប៉ុន្តែលើកនេះគាត់មានបំណងដាក់ពន្ធច្រើនជាងមុន។ លោក Trump មានបំណងដាក់ពន្ធ ៦០ ភាគរយលើទំនិញចិនទាំងអស់ និង ១០ ទៅ ២០ ភាគរយលើការនាំចូលពីប្រទេសផ្សេងទៀតក្នុងនោះមានអឺរ៉ុបផងដែរ។ Trump មិនសប្បាយចិត្តជាមួយនឹងអតុល្យភាពពាណិជ្ជកម្មលើរថយន្ត និងកសិកម្ម ដោយសហភាពអឺរ៉ុបរក្សាពន្ធ ១០ ភាគរយលើរថយន្ត (បើធៀបនឹងអត្រា ២,៥ ភាគរយរបស់អាម៉េរិក) និងពន្ធកសិកម្មប្រហែល ១១ ភាគរយ (ច្រើនជាងអត្រាអាម៉េរិកទ្វេដង)។
ទន្ទឹមនឹងនេះ សេដ្ឋវិទូមិនអាចប៉ាន់ស្មានពីផលប៉ះពាល់ធំប៉ុណ្ណានោះទេ ប៉ុន្តែសេដ្ឋកិច្ចរបស់អឺរ៉ុបនឹងកាន់តែតានតឹង ប្រសិនបើ Donald Trump អនុវត្តការដាក់ពន្ធពិតមែននោះ។ គំរួសេដ្ឋកិច្ចមួយចំនួនបានប៉ាន់ប្រមាណថា ប្រសិនបើអាម៉េរិកដាក់ពន្ធគយ ១០ ភាគរយ នោះការនាំចេញតំបន់អឺរ៉ូទៅកាន់សហរដ្ឋអាមេរិកអាចធ្លាក់ចុះជិតមួយភាគបី។ ជាលទ្ធផល វានឹងក្លាយជាបញ្ហាប្រឈមដ៏ធំមួយ ពីព្រោះអឺរ៉ុបពឹងផ្អែកខ្លាំងលើការនាំចេញ ខណៈដែលប្រទេសដែលមានសេដ្ឋកិច្ចធំបំផុតរបស់ខ្លួនកំពុងប្រឈមមុខនឹងកំណើនយឺត និងបំណុលកើនឡើង។ Goldman Sachs ប៉ាន់ប្រមាណថា ភាពតានតឹងពាណិជ្ជកម្មជាមួយសហរដ្ឋអាមេរិកអាចនឹងធ្វើឱ្យសេដ្ឋកិច្ចតំបន់ចាយប្រាក់អឺរ៉ូធ្លាក់ចុះ ០,៩ ភាគរយ។ មិនត្រឹមតែប៉ុណ្ណោះ គំរូសេដ្ឋកិច្ចព្យាករណ៍ថា ការដាក់ពន្ធរបស់ Trump អាចប៉ះពាល់ដល់អឺរ៉ុបស្មើរ ឬច្រើនជាងប្រទេសចិន។ យោងតាមការិយាល័យតំណាងពាណិជ្ជកម្មអាមេរិក បានឲ្យដឹងថា ថ្វីត្បិតតែចិនជាអ្នកផ្គត់ផ្គង់ដ៏ធំបំផុតរបស់សហរដ្ឋអាមេរិកក៏ដោយ ប៉ុន្តែតម្លៃសរុបនៃការនាំចូលពីសហភាពអឺរ៉ុបមានលើសពីការនាំចូលពីចិនជាប្រវត្តិសាស្ត្រ។ ដូច្នោះហើយ ការដាក់ពន្ធថ្មីរបស់សហរដ្ឋអាម៉េរិកលើប្រទេសចិនក៏អាចមានឥទ្ធិពលដោយប្រយោលដល់អឺរ៉ុបផងដែរ។ ជាការឆ្លើយតបនឹងការដាក់ព្ធរបស់អាម៉េរិក ចិនអាចនឹងបង្កើនការនាំចេញរបស់ខ្លួនទៅកាន់ទ្វីបអឺរ៉ុបវិញ ដែលនឹងជួយជំរុញការផ្គត់ផ្គង់ និងជំរុញឱ្យតម្លៃទំនិញដែលជាគូប្រជែងរបស់អឺរ៉ុបធ្លាក់ចុះ។
ប្រទេសអាល្លឺម៉ង់ គឺជាក្បាលម៉ាស៊ីនសេដ្ឋកិច្ចរបស់អឺរ៉ុបអាចនឹងងាយរងគ្រោះ ដោយសារត្រូវបានកំណត់គោលដៅញឹកញាប់ដោយ Trump។ យោងតាមការិយាល័យស្ថិតិរបស់អាល្លឺម៉ង់ បានឱ្យដឹងថា ក្នុងចំណោមសហភាពអឺរ៉ុប អាល្លឺម៉ង់គឺជាប្រទេសនាំមុខគេក្នុងការនាំចេញទៅកាន់សហរដ្ឋអាម៉េរិក ជាមួយនឹងការនាំចេញទំនិញមានតម្លៃ ១៧១,៨ ពាន់លានដុល្លារក្នុងឆ្នាំ ២០២៣។ ដូច្នោះហើយ ការដំឡើងពន្ធរបស់ Trump អាចនាំឱ្យការនាំចេញទាំងនោះធ្លាក់ចុះធ្ងន់ធ្ងរ ជាមួយនឹងផលប៉ះពាល់ដ៏ធំបំផុតលើឧស្សាហកម្មរថយន្ត និងឱសថ។ Trump កំពុងសម្លឹងមើលឧស្សាហកម្មរថយន្តអាល្លឺម៉ង់ ប៉ុន្តែវិស័យនេះកំពុងជួបបញ្ហាប្រឈមនឹងការប្រកួតប្រជែងកើនឡើងពីប្រទេសចិន និងតម្រូវការចុះខ្សោយរួចទៅហើយ។ ថ្មីៗនេះ ក្រុមហ៊ុនរថយន្តដ៏ធំរបស់អាំល្លឺម៉ង់ Volkswagen ប្រកាសពីការបិទរោងចក្រជាលើកដំបូងក្នុងប្រវត្តិសាស្ត្ររបស់ខ្លួន។
លើសពីនេះ សេដ្ឋកិច្ចអាល្លឺម៉ង់នៅទ្រឹង ហើយការរំពឹងទុកនៃសង្រ្គាមពាណិជ្ជកម្មអាចធ្វើឲ្យសេដ្ឋកិច្ចកាន់តែធ្លាក់ចុះធ្ងន់ធ្ងរ។ លោក Joachim Nagel ប្រធានធនាគារកណ្តាលអាល្លឺម៉ង់ លើកឡើងថា ពន្ធថ្មីរបស់ Trump អាចធ្វើឱ្យទិន្នផលសេដ្ឋកិច្ចអាល្លឺម៉ង់ធ្លាក់ចុះ ១ ភាគរយនៅក្នុងទិន្នផលសេដ្ឋកិច្ច។ ប្រសិនជាការដាក់ពន្ធថ្មីត្រូវបានអនុម័តពិតមែន សេដ្ឋកិច្ចអាល្លឺម៉ង់នឹងធ្លាក់ចូលវិបត្តិ។ វិទ្យាស្ថានសេដ្ឋកិច្ចអាល្លឺម៉ង់ ព្យការណ៍ថា បើគិតក្នុងអាណត្តិរបស់ Trump រយៈពេលបួនឆ្នាំ ការរួមបញ្ចូលគ្នានៃពន្ធ ១០ ភាគរយរបស់សហរដ្ឋអាម៉េរិក និងការសងសឹករបស់សហភាពអឺរ៉ុបទៅលើពន្ធគយវិញអាចបណ្តាលឱ្យសេដ្ឋកិច្ចអាល្លឺម៉ង់បាត់បង់ច្រើនជាង ១៣៤ ពាន់លានដុល្លារ។ មិនត្រឹមតែប៉ុណ្ណោះ ពន្ធគយ ២០ ភាគរយពីភាគីទាំងសងខាងអាចធ្វើឱ្យសេដ្ឋកិច្ចអាល្លឺម៉ង់ខាតបង់ ១៩០ ពាន់លានដុល្លារ៕
Account
Security
Favourite Content