បរទេស៖ យោងតាមរបាយការណ៍មួយរបស់ ADB បានបង្ហាញថា ក្នុងចំណោមអាជីវកម្មបរិយាបន្នចំនួន ១០៤ ដែលត្រូវបានពិនិត្យឡើងវិញមាន ១៧ អាជីវកម្មស្ថិតនៅក្នុងវិស័យកសិ-ពាណិជ្ជកម្ម ហើយក្នុងចំណោមនោះមានតែ ៣ ប៉ុណ្ណោះបានផ្តល់អត្ថប្រយោជន៍ជាពិសេសសម្រាប់ស្ត្រី។

ទន្ទឹមនឹងនេះ អាជីវកម្មបរិយាបន្នសម្រាប់កសិ-ពាណិជ្ជកម្មអាចផ្តល់អត្ថប្រយោជន៍ដល់ស្ត្រីដូចជា៖ បង្កើតការងារ បង្កើនប្រាក់ចំណូលរបស់អ្នកផ្គត់ផ្គង់ខ្នាតតូច និងបង្កើនផលិតភាពតាមរយៈការទទួលបានព័ត៌មាន និងបច្ចេកវិទ្យា។ ផលិតភាពនៅក្នុងកសិដ្ឋានខ្នាតតូចភាគច្រើនមានការរួមចំណែកពីស្ត្រីជាធំ។ នៅអាស៊ីខាងត្បូង ស្រ្តីស្ទើរតែ ៧០ ភាគរយមានការងារធ្វើក្នុងវិស័យកសិកម្ម។​ ស្របពេលដែលស្ត្រីមានចំណែក ៤៣ ភាគរយនៃកម្លាំងពលកម្មកសិកម្មក្នុងប្រទេសកំពុងអភិវឌ្ឍ ជា​មធ្យម​ប្រទេស​នោះអាចអនុវត្ត​ការងារ​បាន​ដល់​ទៅ ៧០ ភាគរយនៅក្នុងវិស័យកសិកម្ម។ មិនត្រឹមតែប៉ុណ្ណោះ ការទទួលបានប្រភព ឬ ទិញពីម្ចាស់អាជិវកម្មខ្នាតតូចក៏រួមចំណែកដល់ប្រាក់ចំណូលរបស់ស្ត្រីជារួមផងដែរ។ យ៉ាងណាមិញ ស្ត្រីដែលជាកសិករ ឬ ម្ចាស់អាជីវកម្មខ្នាតតូចមិនសូវមានឱកាសចូលប្រើបច្ចេកវិទ្យានោះទេ ដែលធ្វើឲ្យផលិតភាពរបស់ពួកគេមានកម្រិតទាប។ ប្រសិនបើស្ត្រីមានឱកាសយលដឹង ឬ ប្រើប្រាស់បច្ចេកវិទ្យាដូចទៅនឹងបុរសដែរ នោះពួកគេអាចបង្កើនទិន្នផលនៅលើកសិដ្ឋានរបស់ពួកគេពី ២០ ទៅ ៣០​ ភាគរយ​។ មិនត្រឹមតែប៉ុណ្ណោះ ការចូលរួមរបស់ស្ត្រីក្នុងការលើកកម្ពស់ផលិតភាពអាចជួយហិរញ្ញវត្ថុរបស់ក្រុមហ៊ុន ឬ អាជីវកម្មថែមទៀតផង។

ជាទូទៅ អាជីវកម្មបរិយាបន្នសម្រាប់កសិ-ពាណិជ្ជកម្មមានគំរូស្រដៀងគ្នា ដែលពួកគេទទួលការផ្គត់ផ្គង់ប្រភពពីកសិករខ្នាតតូចរួមមាន ទឹកដោះគោ សាច់ ស្ករ ស្រូវសាលី ផ្កាឈូករ័ត្ន កាហ្វេ តែ និងដំណាំសម្រាប់ផលិតគ្រឿងទេសជាដើម។ ក្រុមហ៊ុនអាជីវកម្មបរិយាបន្ន ៣ ដែលផ្តល់ប្រយោជន៍ដល់ស្រ្តីខ្លាំងរួមមាន៖ Akay Flavors, Engro, និង NSPDT។  Akay Flavors ជួលស្ត្រីសម្រាប់ការប្រមូលផលដំណាំ ដោយក្រុមហ៊ុននេះបានបង្កើតការងារដូចជា ស្ត្រីសម្រាប់ផ្នែកកែច្នៃគ្រឿងទេស ស្រ្តីធ្វើការនៅកសិដ្ឋាន និងស្រ្តីធ្វើការនៅកន្លែងថែទាំកុមារ។ ក្នុងនាមជាអ្នកផ្គត់ផ្គង់ទឹកដោះគោ Engro ក៏បានបណ្តុះបណ្តាលស្ត្រីទៅលើការប្រមូលទឹកដោះគោផងដែរ។ ទន្ទឹមនឹងនេះ ភ្នាក់ងារដែលជួយស្ត្រីអាចត្រូវបានពង្រឹងដោយការរៀបចំសហករណ៍ ឬរចនាសម្ព័ន្ធកសិករជាស្ត្រី។ NSPDT គឺជាអាជីវកម្ម​សហករណ៍​ធំ​បំផុត​របស់ឥណ្ឌា ដែលប្រមូលផ្តុំ​ស្ត្រី​ជា​ម្ចាស់​អាជីវកម្ម​តូចតាច និងកសិករប្រមាណជិត ៩ ០០០ នាក់។ សមាជិក NSPDT ទទួលបានអត្ថប្រយោជន៍ដូចជា៖ សេវាកម្មផលិតកម្មដែលមានគុណភាពខ្ពស់, អ្នកគ្រប់គ្រងសហគមន៍ (ផ្តល់ការគ្រប់គ្រងផលិតកម្ម ការជួយសម្រួលផ្នែកកសិដ្ឋាន), និងពេទ្យសត្វ។

ក្នុងចំណោមអាជីវកម្មទាំងនេះ Akay Flavors ត្រូវបានចាត់ទុកថាអនុវត្តគំរូអាជិវកម្មបរិយាបន្នសម្រាប់កសិ-ពាណិជ្ជកម្មល្អជាងគេ។ Akay Flavors ផលិតពណ៌អាហារធម្មជាតិ រសជាតិ និងគ្រឿងទេស ដែលទទួលបានប្រភពពីកសិករតាមរយៈកិច្ចសន្យាឯករាជ្យជាមួយនឹងកសិដ្ឋាននៅប្រទេសឥណ្ឌា និងកម្ពុជា។ Akay Flavors ផ្តល់ឱ្យស្ត្រីនូវឱកាសការងារនៅក្នុងរោងចក្រផលិតរបស់ពួកគេ និងតាមរយៈគំរូកសិកម្មដែលកសិករ​​ទទួល​បន្ទុក​ផ្គត់ផ្គង់សម្រាប់​អ្នក​ទិញ​។ ក្នុងនាមជាកសិករទទួល​បន្ទុកផ្នែក​ផ្គត់ផ្គង់​​ ស្ត្រីទាំងនោះបានបង្ហាញពីការប្តេជ្ញាចិត្តខ្ពស់ក្នុងការអនុវត្តកសិកម្មប្រសិទ្ធភាព និងទទួលបានទិន្នផលតាមគោលដៅ។ សម្រាប់ផ្នែកការផលិតនៅក្នុងរោងចក្រ ស្ត្រីមានចំនួន ៧០ ភាគរយក្នុងចំណោមបុគ្គលិក ៤០០ នាក់ ហើយក្រុមហ៊ុនតែងតែ​សង្កេត​ឃើញ​ថា​ស្ត្រី​តែង​បង្ហាញ​ខ្លួន​ទៅ​ធ្វើ​ការ​ ទោះ​បី​ជា​ពួកគេមានភារកិច្ចរវល់នៅក្នុងគ្រួសារក៏ដោយ។ នៅក្នុងរោងចក្រផលិតមួយនៅឥណ្ឌា Akay Flavors ជួលសមាគមស្ត្រីសម្រាប់ដំណើរការមុនផលិតដូចជា ការចាត់ថ្នាក់ ការសម្អាត និងដំណាក់កាលឆ្កឹះគ្រាប់ម្ទេស។

នៅ​ប្រទេស​ឥណ្ឌា ស្ត្រី​ត្រូវ​បាន​គេ​ដាក់​សម្ពាធ​ជា​ញឹក​ញាប់​ឱ្យ​ប្រគល់​ប្រាក់​ចំណូល​របស់​ពួក​គេ​ទៅ​ឱ្យប្តី។ ដូច្នោះហើយ Akay Flavors បានអនុវត្តការបង់ប្រាក់ជូនស្ត្រីទាំងនោះដោយផ្ទាល់ ដែលអនុញ្ញាតឱ្យស្ត្រីអាចទិញរបស់របរប្រើប្រាស់ក្នុងផ្ទះ និងចំណាយផ្សេងៗ ដោយមិនចាំបាច់ពឹងលើប្តីរបស់ពួកគេ និងកាត់បន្ថយសម្ពាធក្នុងការប្រគល់ប្រាក់ចំណូលរបស់ពួកគេទៅកាន់ប្តីទៀតផង។ នៅប្រទេសកម្ពុជាវិញ តាមរយៈកសិដ្ឋានគំរូរបស់ក្រុមហ៊ុន Akay Flavors បានផ្តល់កន្លែងថែទាំកុមារដើម្បីឲ្យស្ត្រីមានការងារធ្វើ។ កាលពីឆ្នាំ ២០១៤ ធនាគារអភិវឌ្ឍន៍អាស៊ី ADB បានវិនិយោគ ១៦,៥ លានដុល្លារចូលទៅក្នុងគម្រោងពង្រីកប្រតិបត្តិការរបស់ Akay Flavour ។ គម្រោងនេះមានគោលបំណងទទួលបានអត្ថប្រយោជន៍ពីកសិករជាប់កិច្ចសន្យាយ៉ាងហោចណាស់ ៥ ០០០ នាក់នៅក្នុងប្រទេសឥណ្ឌា និងកម្ពុជា។ លើសពីនេះ ផែនការសកម្មភាពយេនឌ័រត្រូវបានរៀបចំឡើងដើម្បីបង្កើនការចូលរួមរបស់ស្ត្រីនៅក្នុងកិច្ចសន្យាការធ្វើកសិកម្មយ៉ាងហោចណាស់ ៥០ ភាគរយ ដើម្បីបង្កើនឱកាសដល់ស្រ្តី ផ្តល់ការបណ្តុះបណ្តាលការធ្វើកសិកម្ម កែលម្អសុខភាពហិរញ្ញវត្ថុ និងកែសម្អបញ្ហាសមភាពយេនឌ័រ៕