បរទេស ៖ នាយករដ្ឋមន្ត្រីបារាំង លោក Francois Bayrou នៅសប្តាហ៍នេះបានបង្ហាញរបាយការណ៍ដ៏គួរឲ្យភ្ញាក់ផ្អើលមួយដែលប្រាក់បំណុលជាតិកំពុងស្ថិតក្នុងកម្រិតដ៏អាក្រក់បំផុតជាមួយនឹងអត្រាកើនឡើងជាង៥០០០អឺរ៉ូ (៥៧៨៤ដុល្លារអាម៉េរិក)ក្នុងមួយវិនាទី។

នៅក្នុងវិដេអូមួយដែលបានបង្ហោះលើបណ្តាញយូធូបកាលពីថ្ងៃអង្គារ លោកនាយករដ្ឋមន្ត្រីបានធ្វើការព្រមានទៅដល់ពលរដ្ឋបារាំងជាសាធារណៈ និងសំណូមពរឲ្យមានការគាំទ្រនូវយុទ្ធសាស្ត្រកាត់បន្ថយប្រាក់ចំណាយដែលរដ្ឋាភិបាលរបស់លោកកំពុងរៀបចំ។ វាគឺជាកិច្ចការងារដ៏មានសារៈសំខាន់បំផុតក្នុងការរៀបចំផែនការថវិកាឡើងវិញដើម្បីអាចជៀសវាងបញ្ហាវិបតិ្តដ៏ធ្ងន់ធ្ងរមួយដែលនឹងអាចកើតឡើង។

កម្មវិធីកាត់បន្ថយឱនភាពថវិកាក្នុងទំហំប្រមាណជាជិត៤៤ពាន់លានអឺរ៉ូដែលត្រូវបានប្រកាសកាលពីខែកក្កដា គឺជាផ្នែកមួយនៃយុទ្ធសាស្ត្ររបស់រដ្ឋាភិបាលបារាំង។ បារាំងបានមើលឃើញចន្លោះនៃខ្ទង់ចំណាយ និងចំណូលជាតិទៅដល់ ៥,៨ភាគរយនៃផលិតផលក្នុងស្រុកសរុប GDP កាលពីឆ្នាំកន្លងទៅគឺជាគម្លាតខុសគ្នាខ្លាំងណាស់ធៀបទៅនឹងអ្វីដែលប្លុកអឺរ៉ុបមានត្រឹមតែ៣ភាគរយប៉ុណ្ណោះ។ លោកនាយករដ្ឋមន្ត្រីបានព្រមានថា ក្នុងដំណាក់កាលដ៏គ្រោះថ្នាក់នេះ ចំណាត់ការនានាដែលដាក់ចេញត្រូវតែចាំបាច់អនុវត្តឲ្យខានតែបាន។

លោកនាយករដ្ឋមន្ត្រីក៏បានគូសបញ្ជាក់ដែរថា ប្រសិនបើកិច្ចខិតខំមិនមានមានប្រសិទ្ធភាពទេនោះ ប្រទេសបារាំងនឹងអាចឈានទៅដល់ការចំណាយលុយ១០០ពាន់លានអឺរ៉ូជារៀងរាល់ឆ្នាំនៅត្រឹមឆ្នាំ២០២៩ គឺគ្រាន់តែជាការទូទាត់អត្រាការប្រាក់ទៅម្ចាស់បំណុលប៉ុណ្ណោះ ហើយបំណុលសរុបរបស់ជាតិនឹងអាចឡើងទៅដល់ ៣,៤ទ្រីលានអឺរ៉ូ។

គួរឲ្យដឹងដែរថា សំណើរមួយចំនួនដែលរដ្ឋាភិបាលបារាំងកំពុងរៀបចំក្នុងការអនុវត្តនោះមានដូចជា ការលុបចោលនូវថ្ងៃឈប់សម្រាកប្រចាំឆ្នាំឬ Public Holiday ចំនួន២ថ្ងៃ ដើម្បីបង្កើនផលិតភាពការងារឡើងវិញ ការកាត់បន្ថយការងារក្នុងវិស័យសេវាសាធារណៈ និងការលុបចោលការទូទាត់ថវិកាសាធារណៈមួយចំនួនទៀត។

យ៉ាងណាក្តី គេសង្កេតឃើញថា ថវិកាការពារជាតិរបស់ប្រទេសបារាំងត្រូវបានកំណត់ក្នុងខ្ទង់ចំណាយបានកើនឡើងដល់ ៦៤ពាន់លានអឺរ៉ូក្នុងឆ្នាំ២០២៧ ដែលស្ទើរតែពីរដងនៃកម្រិតកាលពីឆ្នាំ២០១៧។
ក្នុងនោះប្រធានាធិបតី Emmanuel Macron បានសន្យាបន្ថែមចំនួនថវិកា ៦,៥ពាន់លានអឺរ៉ូក្នុងរយៈពេល២ឆ្នាំខាងមុខ ដោយលើកឡើងពីការគំរាមកំហែងកាន់តែខ្លាំងឡើងចំពោះសន្តិសុខអឺរ៉ុបទាំងមូល។

ដូច្នេះ បារាំងក៏នឹងធ្វើការពិនិត្យឡើងវិញលើវិស័យការពារជាតិផងដែរ ខណៈដែលមានការព្រមានថា សង្រ្គាមដ៏ធំអាចនឹងផ្ទុះឡើងនៅឆ្នាំ២០៣០​ ដោយការដាក់បញ្ចូលប្រទេសរុស្សីក្នុងចំណោមការគំរាមកំហែងធំៗរបស់ប្រទេសក្នុងសមរភូមិនាពេលអនាគត៕