សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងទៅតាមប្រភពព័ត៌មានពី Weforum បានរាយការណ៍ថា ការទិញសម្លៀកបំពាក់កាន់តែច្រើននៅទូទាំងពិភពលោក បាន និងកំពុងធ្វើឱ្យប៉ះពាល់ដល់បរិស្ថាន ដោយសារការផលិតម៉ូដសំលៀកបំពាក់រួមចំណែកបាន ១០ ភាគរយនៃការបំភាយកាបូន ធ្វើឱ្យប្រភពទឹកស្ងួត និងមានការបំពុលប្រភពទឹក។
ចាប់តាំងពីឆ្នាំ២០០០មក ការផលិតសម្លៀកបំពាក់បានកើនឡើងទ្វេដង ដោយសារភាគច្រើនក្រុមហ៊ុនម៉ូដសម្លៀកបំពាក់នៅអឺរ៉ុបបានចេញខូលិកសិនយ៉ាងតិចចំនួនពីរនៅក្នុងមួយឆ្នាំៗ។ ម៉ាកមួយចំនួនបានបញ្ចេញខូលិកសិនច្រើនដូចជា ម៉ាក Zara បញ្ចេញខូលិកសិន ២៤ និង H&M ចេញខូលិកសិនចន្លោះពី ១២ ទៅ ១៦ ក្នុងមួយឆ្នាំៗ ។
អ្នកស្រាវជ្រាវបានរកឃើញថា ការបោះចោលសម្លៀកបំពាក់ស្មើនឹងឡានសំរាមមួយដែលពោរពេញទៅដោយសំលៀកបំពាក់ត្រូវបានដុត ឬបោះចោលក្នុងកន្លែងចាក់សំរាមរៀងរាល់វិនាទី។ វាយនភណ្ឌសម្លៀកបំពាក់ប្រហែល ៨៥ ភាគរយត្រូវបានចោលនៅកន្លែងចាក់សំរាមជារៀងរាល់ឆ្នាំ ខណៈដែលការបោកគក់សម្លៀកបំពាក់បានបញ្ជូនសារធាតុប្លាស្ទិក ឬបាក់តេរីផ្សេងៗ ៥០០ ០០០ តោនដែលស្មើនឹងដបប្លាស្ទិកចំនួន ៥០ ពាន់លានដបទៅក្នុងមហាសមុទ្រក្នុងមួយឆ្នាំៗដែលបង្កផលប៉ះពាល់ដ៏ខ្លាំងមកលើភពផែនដី។
សរសៃក្រណាត់ទាំងនោះភាគច្រើនមានសារធាតុ polyester ដែលជាប្លាស្ទិកមាននៅក្នុងសម្លៀកបំពាក់ប្រមាណ ៦០ ភាករយ ហើយការផលិតសារធាតុ polyester បញ្ចេញកាបូនច្រើនជាងកប្បាស ២ ទៅ ៣ ដង ហើយវាមិនអាចបំបែកនៅក្នុងមហាសមុទ្របាននោះទេ។
យោងទៅតាមប្រភពពីសហភាពអន្តរជាតិសម្រាប់ការអភិរក្សធម្មជាតិ (IUCN) បានប៉ាន់ប្រមាណថា ៣៥ ភាគរយនៃមីក្រូប្លាស្ទិកទាំងអស់មិនដែលខូចទ្រង់ទ្រាយជីវសាស្រ្តរបស់ពួកវានោះទេ ហើយពួកវារួមចំណែកនៃការបំពុលនៅក្នុងមហាសមុទ្ររហូតដល់ ៣១ ភាគរយ។ ប្រសិនបើវិស័យម៉ូដសម្លៀកបំពាក់នៅតែបន្តលើគន្លងបច្ចុប្បន្ន នោះការរួមចំណែកនៃថវិកាកាបូនអាចនឹងកើនឡើងដល់ ២៦ ភាគរយនៅឆ្នាំ២០៥០។
មិនត្រឹមតែប៉ុណ្ណោះ ឧស្សាហកម្មម៉ូដសម្លៀកបំពាក់ គឺជាអ្នកប្រើប្រាស់ទឹកធំជាងគេទីពីរនៅទូទាំងពិភពលោក។ ការផលិតខោខូវប៊យ និងអាវដែលផលិតពីរុក្ខជាតិដូចជា កប្បាស ត្រូវការប្រើប្រាស់ទឹកខ្លាំង។ វាត្រូវការទឹកប្រហែល ៧០០ លីត្រក្នុងការផលិតអាវកប្បាសមួយ ដែលស្មើនឹងមនុស្សម្នាក់ផឹកយ៉ាងហោចណាស់ប្រាំបីកែវក្នុងមួយថ្ងៃសម្រាប់រយៈពេល ៣ ឆ្នាំកន្លះ។ មួយវិញទៀត ក្នុងការផលិតខោខូវប៊យមួយត្រូវការទឹកប្រហែល ២ ០០០ លីត្រ។ នៅប្រទេសអ៊ូសបេគីស្ថាន ការធ្វើកសិកម្មកប្បាសត្រូវការប្រើប្រាស់ទឹកយ៉ាងច្រើនពីសមុទ្រអារ៉ាល់ ដែលវារីងស្ងួត ប្រហែល ៥០ ឆ្នាំមកហើយ និងបានបន្សល់ទុកនូវវាលខ្សាច់ និងស្រះតូចៗមួយចំនួនតែប៉ុណ្ណោះ។ មួយវិញទៀត វាក៏បង្កជាបញ្ហាបំពុលប្រភពទឹកផងដែរ។ ការជ្រលក់ពណ៌វាយនភ័ណ្ឌសម្លៀកបំពាក់ គឺជាការបំពុលទឹកធំជាងគេទីពីររបស់ពិភពលោក ដោយសារទឹកដែលនៅសេសសល់ពីដំណើរការជ្រលក់ពណ៌ហូរចូលទៅក្នុងប្រភពទឹកដូចជា សមុទ្រ ប្រឡាយ អូរ ឬទន្លេ។ ដំណើរការនៃការជ្រលក់ពណ៌នេះប្រើប្រាស់ទឹកយ៉ងហោចណាស់ ស្មើរនឹងអាងហែលទឹកទំហំអូឡាំពិកមួយ។ សរុបមក ឧស្សាហកម្មម៉ូដអាចនឹងមានចំណែកក្នុងការបំពុលទឹកប្រហែល ២០ ភាគរយទូទាំងពិភពលោកនាពេលអនាគត៕
Account
Security
Favourite Content