សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទ្រឹស្តីសេដ្ឋកិច្ចបានលើកឡើងថា នៅពេលមានការផ្គត់ផ្គត់លើសតម្រូវការនឹងធ្វើឱ្យផលិតផលធ្លាក់ថ្លៃ ប៉ុន្តែប្រសិនបើមានតម្រូវការទីផ្សារខ្ពស់នោះផលិតផលប្រាកដជាលក់បានក្នុងតម្លៃថ្លៃមិនខាន។ អាស្រ័យហេតុនេះ ដើម្បីជួយលើកកម្ពស់វិស័យស្វាយចន្ទីកម្ពុជា និងរក្សាតម្លៃឱ្យបានកម្រិតខ្ពស់ជូនប្រជាកសិករ រដ្ឋាភិបាល ដែលមានក្រសួងពាណិជ្ជកម្មជាសេនាធិការ បានខិតខំផ្សព្វផ្សាយពីសក្តានុពល និងគុណភាពស្វាយចន្ទីកម្ពុជាយ៉ាងទូលាយនៅលើទីផ្សារអន្តរជាតិ ដែលជាលទ្ធផល ក្រៅពីប្រទេសចិន ជប៉ុន និងសហភាពអឺរ៉ុប បច្ចុប្បន្ននៅមានប្រទេសចំនួន៤ទៀត បាន និងកំពុងបញ្ជាទិញ។
ក្នុងគោលបំណងពង្រឹង និងពង្រីកទីផ្សារស្វាយចន្ទីកម្ពុជាទៅក្រៅប្រទេសឱ្យបានកាន់តែទូលំទូលាយ កាលពីទីថ្ងៃ២៣ ខែមករា ឆ្នាំ២០២៥ លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម បានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការពង្រឹង និងពង្រីកទីផ្សារអន្តរជាតិជូនក្រុមហ៊ុនស្វាយចន្ទី និងស្វាយកែវរមៀតកម្ពុជា រវាង (១) ក្រុមហ៊ុនអ៊ែមភល អាហ្គ្រោប្រដាក់ ឯ.ក និងក្រុមហ៊ុន TRACKINTECH SOLUTIONS SND BHD ម៉ាឡេស៊ី និង (២) ក្រុមហ៊ុនគីរីរម្យ ហ្វ៊ូដ ប្រដាក់សិន ឯ.ក និងក្រុមហ៊ុន TRACKINTECH SOLUTIONS SDN BHD ម៉ាឡេស៊ី។
ពិធីចុះអនុស្សរណរណៈនេះ មានការអញ្ជើញចូលរួមពី ឯកអគ្គរាជទូតម៉ាឡេស៊ីប្រចាំនៅព្រះរាជាណាចក្រកម្ពុជា និងមន្ត្រីពាក់ព័ន្ធរបស់ក្រសួងពាណិជ្ជកម្ម ព្រមទាំងសហព័ន្ធស្វាយចន្ទីកម្ពុជា ក្រុមហ៊ុនស្វាយចន្ទី ក្រុមហ៊ុនស្វាយក្រុមហ៊ុនម៉ាឡេស៊ី និងអង្គការជាច្រើនរូបផងដែរ។ ស្មារតីនៃការចុះអនុស្សរណៈខាងលើនេះក្រុមហ៊ុន TRACKINTECH SOLUTIONS SND BHD ម៉ាឡេស៊ី នឹងធ្វើការបញ្ជាទិញស្វាយចន្ទីកែច្នៃពីក្រុមហ៊ុនអ៊ែមភលអាហ្គ្រោប្រដាក់ ឯ.ក និងស្វាយសម្ងួតពីក្រុមហ៊ុនគីរីរម្យ ហ្វ៊ូដ ប្រដាក់សិន ឯ.ក ក្នុងគោលបំណងលើកកម្ពស់ផលិតផលស្វាយចន្ទី និងស្វាយកែវរមៀតកម្ពុជាបង្កើតលក្ខខណ្ឌដែលអ្នកចែកចាយ និងមានសិទ្ធិផ្តាច់មុខក្នុងការធ្វើទីផ្សារ និងដាក់លក់នៅក្នុងប្រទេសម៉ាឡេស៊ី ឥណ្ឌូនេស៊ី សិង្ហបុរី និងប្រ៊ុយណេ។
ដោយឡែក លោក នី កាន់ឌី ឈ្មួញប្រមូលទិញស្វាយចន្ទីរនៅក្នុងខេត្តកំពង់ធំបានលើកឡើងថា ឆ្នាំនេះគ្រាប់ស្វាយចន្ទីរលក់បានថ្លៃជាងឆ្នាំមុន អាចទទួលយកបានដោយមួយគីឡូក្រាមពេលប្រមូលផលដើមដៃមានតម្លៃ ៦០០០រៀល ហើយកណ្តាលដៃមានតម្លៃ ៥០០០រៀល រហូតដល់ពេលប្រមូលផលចុងដៃមានតម្លៃប្រមាណជា ៤០០០រៀល ឬ ៤២០០រៀល។ មានតម្លៃល្អជាងឆ្នាំមុនខណៈកាលពីឆ្នាំ២០២៤ ដើមដៃលក់ចេញបានថ្លៃប្រមាណជា ៥៥០០រៀលក្នុងមួយគីឡូក្រាម ហើយកណ្តាលដៃ និងចុងដៃលក់ចេញបានចន្លោះពី ៤២០០រៀល ទៅ ៥២០០រៀលប៉ុណ្ណោះ។
លោកថា ការប្រមូលទិញចន្ទីររបស់គ្រួសារលោកមានលក្ខណៈតិចតួច ចំណែកការកែច្នៃក៏នៅមានកម្រិតមិនទាន់អាចប្រកួតប្រជែងយកទៅលក់នៅទីផ្សារក្រៅប្រទេសបានឡើយ។
ពាក់ព័ន្ធទៅនឹងទីផ្សារស្វាយចន្ទី និងការពង្រីកទីផ្សារ អ្នកជំនាញបាននិយាយថា ដើម្បីអាចប្រកួតប្រជ្រែងនៅលើទីផ្សារអន្តរជាតិបាន ម្ចាស់សហគ្រាសត្រូវខិតខំកែច្នែផលិតផលស្វាយចន្ទីឱ្យស្របតាមស្តង់ដារគុណភាព សុវត្ថិភាព អនាម័យ និងការវេចខ្ចប់ឱ្យបានត្រឹមត្រូវជាចាំបាច់។ ដូច្នេះ ដើម្បីអាចឈានទៅបំពេញតម្រូវការទីផ្សារទាំងក្នុងស្រុក និងប្រកួតប្រជែងនៅលើទីផ្សារអន្តរជាតិបាន ម្ចាស់សហគ្រាស ឬក្រុមហ៊ុនកែច្នៃចាំបាច់ត្រូវតែបំពេញតាមលក្ខខណ្ឌទីផ្សារ ជាពិសេស កំណត់អត្តសញ្ញាណនៃផលិតផលរបស់ខ្លួនដើម្បីអាចបង្កើនទំនុកចិត្ត និងផ្សព្វផ្សាយពីភាពអស្ចារ្យនៃគ្រាប់ស្វាយចន្ទីកម្ពុជាទៅកាន់ឆាកអន្តរជាតិ៕ អត្ថបទ ៖ វិន ឈុនហ៊ាត
Account
Security
Favourite Content