សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អាជីវកម្មបរិយាបន្ន គឺជាគំរូអាជីវកម្មថ្មីដែលផ្ដល់ផលប្រយោជន៍ដល់ភាគីពាក់ព័ន្ធដោយវិលជុំ។ អាជីវកម្មប្រភេទនេះមិនត្រឹមតែផ្ដល់ប្រយោជន៍ដល់សហគ្រិនតែឯកឯងនោះទេ ប៉ុន្តែនឹងជះផលវិជ្ជមានដល់សង្គម ក៏ដូចជាផ្ដល់ប្រយោជន៍បន្តទៀតដល់មនុស្សជាតិ និងសេដ្ឋកិច្ចជាតិ។ និយាយដោយឡែក ការក្លាយខ្លួនពីអាជីវកម្មធម្មតាទៅជាអាជីវកម្មបរិយាបន្ននេះ នឹងផ្ដល់អត្ថប្រយោជន៍ជាច្រើនដល់ម្ចាស់អាជីវកម្ម ជាពិសេសគឺធានានូវនិរន្តរភាពរបស់អាជីវកម្មទៅថ្ងៃខាងមុខ។
ក្រុមហ៊ុនថែទាំសុខភាពចល័ត (MUCH Mobile Healthcare) ជាអាជីវកម្មគំរូមួយដែលបានក្លាយខ្លួនជាអាជីវកម្មបរិយាបន្នកាលពីពេលថ្មីៗនេះ។ ឆ្លងកាត់បទពិសោធន៍ជាច្រើន អ្នកស្រី ឌី ផនភិរម្យ នាយិការក្រុមហ៊ុនថែទាំសុខភាពថល័តនេះបានឱ្យដឹងថា អ្វីដែលម្ចាស់អាជីវកម្មគួរយល់ដឹងមុនគេនោះគឺថា តើអ្វីទៅជាអាជីវកម្មបរិយាបន្ន?
សម្រាប់អាជីវកម្មរបស់លោកស្រីផ្ទាល់ ពីដំបូងឡើយក៏លោកស្រីមិនទាន់បានយល់ច្បាស់អំពីប្រភេទអាជីវកម្មបរិយាបន្ននោះដែរ ប៉ុន្តែដោយការចង់ចេះចង់ដឹង លោកស្រីក៏បានចូលរួមតាមវគ្គបណ្ដុះបណ្ដាលនានា និងសុំការណែនាំពីអ្នកមានបទពិសោធន៍ជាច្រើននាក់។ បន្ទាប់ពីយល់ដឹងកាន់តែច្បាស់អំពីអាជីវកម្មបរិយាបន្ននេះហើយ លោកស្រីបានចាប់ផ្ដើមសម្រួចផែនការអាជីវកម្មរបស់ខ្លួនបន្ថែម ដើម្បីធ្វើយ៉ាងណាបង្កើតផលជះវិជ្ជមានកាន់តែធំទៅដល់អ្នកពាក់ព័ន្ធក្នុងសង្គម។
លោកស្រី ឌី ផនភិរម្យ បានរៀបរាប់ថា៖
«ផលជះបែបវិជ្ជមាននេះគឺជារឿងសំខាន់មែនទែន ដែលម្ចាស់អាជីវកម្មបរិយាបន្នគ្រប់រូបត្រូវតែមានជាដាច់ខាត។ ដោយសារតែអាជីវកម្មរបស់ខ្ញុំមានគោលដៅស្រដៀងគ្នានេះស្រាប់ ដូច្នេះខ្ញុំគ្រាន់តែត្រូវការសម្រួចបន្ថែម និងពង្រឹងចំណុចខ្វះខាតមួយចំនួនទៀតប៉ុណ្ណោះ»។
ដោយឡែក ក្រុមហ៊ុនរបស់លោកស្រីបច្ចុប្បន្ននេះគឺមានផ្ដល់ជាសេវាកម្មថែទាំសុខភាពចល័ត ដោយផ្ដោតសំខាន់លើមនុស្សចាស់ និងអ្នកជំងឺដែលពិបាកក្នុងការធ្វើដំណើរទៅព្យាបាលនៅមន្ទីរពេទ្យ។
អាជីវកម្មរបស់លោកស្រី បានជួយទៅដល់សុខមាលភាពរបស់ប្រជាជនវ័យចំណាស់ ក៏ដូចជាជួយផ្ដល់ការងារទៅដល់និស្សិតពេទ្យ។ មិនត្រឹមតែប៉ុណ្ណោះ លោកស្រីក៏បានមើលឃើញ ពីទុក្ខលំបាករបស់ស្ត្រីដែលមានបន្ទុកថែទាំឪពុកម្ដាយដោយមិនអាចចេញទៅប្រកបការងារបាន។ ដូច្នេះហើយ តាមរយៈសេវាកម្មដែលក្រុមហ៊ុនលោកស្រីផ្ដល់ជូន គឺប្រៀបបានទៅនឹងការផ្ដល់ឱកាសដល់ស្ត្រីឱ្យមានពេលវេលាសម្រាប់ធ្វើការងារ ឬរៀនសូត្រ ហើយប្រសិនបើបង្គោលគ្រួសារអាចមានលទ្ធភាពរកចំណូល នោះគ្រួសារក៏អាចចៀសផុតពីបន្ទាត់ក្រីក្រដែរ។
តាមរយៈផលវិជ្ជមានដែលអាជីវកម្មអ្នកស្រីផ្ដល់ដល់សង្គមនេះហើយ ដែលជាមូលហេតុសំខាន់មួយជួយជំរុញឱ្យលោកស្រីអាចឈ្នះការប្រកួតពានរង្វាន់ធុរកិច្ចបរិយាបន្ន IB Super Star។ ប៉ុន្តែយ៉ាងណាក៏ដោយ រហូតមកដល់ពេលនេះ អាជីវកម្មបរិយាបន្ននៅកម្ពុជាគឺនៅមានចំនួនតិចតួចនៅឡើយ ដូច្នេះលោកស្រីបានបង្ហាញការលើកទឹកចិត្ត និងជំរុញឱ្យម្ចាស់អាជីវកម្មចាប់ផ្ដើមងាកមកស្វែងយល់ពីគំរូអាជីវកម្មថ្មីនេះ។
ពីបទពិសោធលោកស្រីផ្ទាល់ អាជីវកម្មរបស់លោកស្រីស្គាល់នូវភាពរីកចម្រើនជាលំដាប់បន្ទាប់ពីបានក្លាយខ្លួនជាអាជីវកម្មបរិយាបន្ន ដែលក្នុងនោះក៏រួមមាននូវលទ្ធភាពក្នុងការចាប់យកទីផ្សារក្រៅប្រទេសផងដែរ៕
Account
Security
Favourite Content