បរទេស៖ យោងតាមប្រភពពីរ៉យទ័រ បានរាយការណ៍ថា តម្លៃប្រេងបានឡើងថ្លៃជាង ១ ដុល្លារបន្ថែមទៀតបន្ទាប់ពីកូនប្រុស ៣ នាក់របស់មេដឹកនាំក្រុមហាម៉ាសម្នាក់ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលនៅតំបន់ហ្គាហ្សា ដោយផ្តល់ការព្រួយបារម្ភថាកិច្ចចរចាបទឈប់បាញ់អាចនឹងជាប់គាំង។

ទន្ទឹមនឹងនេះ តម្លៃប្រេងឆៅម៉ាក Brent ឡើងថ្លៃ ១,២ ភាគរយ ឬ ៩០,៤៨ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) ឡើងថ្លៃ ១,២ ភាគរយ ឬ ៨៦,២១ ដុល្លារក្នុងមួយបារ៉ែល។

លោក John Kilduff ដៃគូស្ថាបនិក Again Capital LLC លើកឡើងថា ទីផ្សារប្រេងមានប្រតិកម្មយ៉ាងខ្លាំងចំពោះព័ត៌មានចេញពីតំបន់ហ្គាហ្សា។ យោធា​អ៊ីស្រាអែល​បាន​បញ្ជាក់​ថា ​ពិតជា​ធ្វើ​ការ​វាយ​ប្រហារមែន​ក្រោមហេតុផលថា​កូន​ប្រុស​ទាំង​ ៣ ​នោះ ​ជា​អ្នក​ប្រតិបត្តិ​ក្នុង​ក្រុម​ប្រដាប់​អាវុធ​ហាម៉ាស។

កាលពីថ្ងៃអង្គារកន្លងទៅនេះ ក្រុមហាម៉ាសបាននិយាយថា ពួកគេកំពុងតាមដានសំណើបទឈប់បាញ់របស់អ៊ីស្រាអែលនៅក្នុងសង្គ្រាមហ្គាហ្សារយៈពេលជាងប្រាំមួយខែ ប៉ុន្តែបានហៅថា វាអសកម្ម ដោយសារអ៊ីស្រាអែល មិនបានបំពេញតាមការទាមទារណាមួយរបស់ប៉ាឡេស្ទីនឡើយ។ មិនត្រឹមតែប៉ុណ្ណោះ ជម្លោះ​បន្ត​អាច​អូស​បន្លាយ​ក្នុង​ប្រទេស​ផ្សេង​ទៀត ជាពិសេស​អ៊ីរ៉ង់​ដែល​ជា​អ្នក​ផលិត​ធំ​ជាង​គេ​ទី​បី​ក្នុង​អង្គការ​នៃ​ប្រទេស​នាំ​ចេញ​ប្រេង (OPEC) បានគាំទ្រ​ក្រុម​ហាម៉ាស ។

ទន្ទឹមនឹងនេះ ការសម្រេចចិត្តរបស់ម៉ិកស៊ិកក្នុងការទប់ស្កាត់ការនាំចេញប្រេងឆៅក្នុងគោលបំណងផ្គត់ផ្គង់រោងចក្រចម្រាញ់ប្រេងក្នុងស្រុកក៏បានជំរុញតម្លៃផងដែរ និងនាំឱ្យមានការនាំចូលប្រេងឆៅរបស់ម៉ិកស៊ិកទៅសហរដ្ឋអាម៉េរិកធ្លាក់ចុះកាលពីដើមខែមេសា។ កាលពីលើកមុន តម្លៃប្រេងបានធ្លាក់ចុះបន្ទាប់ពីទិន្នន័យរបស់រដ្ឋាភិបាលសហរដ្ឋអាមេរិកបានបង្ហាញថាស្តុកប្រេងឆៅ និងឥន្ធនៈបានកើនឡើងលើសពីការរំពឹងទុក ខណៈដែលមានតម្រូវការខ្សោយ និងការនាំចេញប្រេងទាប។ កាលពីសប្តាហ៍មុន ស្តុកប្រេងឆៅរបស់សហរដ្ឋអាម៉េរិកបានកើនឡើងចំនួន ៥,៨ លានបារ៉ែលដែលច្រើនជាងការព្យាករណ៍ ២,៤ លានបារ៉ែល។ លើសពីនេះ ស្តុកសម្រាប់ផលិតផលចម្រាញ់បានកើនឡើងលើសពីការរំពឹងទុក ដោយប្រេងសាំងកើនឡើង ៧០០ ០០០ បារ៉ែល និងប្រេងចម្រាញ់ចំនួន ១,៧ លានធុង។

ទោះជាយ៉ាងណាក្តី គេកំពុងព្រួយបារម្ភថា ប្រសិនបើក្រុមប្រទេសនាំចេញប្រេង OPEC+ បន្តកាត់បន្ថយទិន្នផលប្រេង នោះពួកគេនឹងកាន់តែមានអំណាចក្នុងទីផ្សារប្រេង។ លើសពីនេះ OPEC + មានសម្ព័ន្នភាពជាមួយបណ្តាប្រទេសផលិតកំពូលៗនៅមជ្ឈិមបូព៌ា និងប្រទេសរុស្ស៊ី។ ប្រសិនបើពួកគេរក្សាការកាត់បន្ថយបច្ចុប្បន្នរបស់ខ្លួន នោះទីផ្សារប្រេងនឹងតឹងតែងខ្លាំងនៅក្នុងឆមាសទីពីរនៃឆ្នាំនេះ។ នៅឆ្នាំនេះផងដែរ តម្លៃ​ប្រេង​ត្រូវបាន​ជួញដូរ​ក្នុង​ចន្លោះ​ពី ៨០ ទៅ ១០០ ដុល្លារ​ក្នុង​មួយ​បារ៉ែល​នៅ​ឆ្នាំ​នេះ។

មិនត្រឹមតែប៉ុណ្ណោះ Morgan Stanley ក្រុមហ៊ុនវិនិយោគធំមួយរបស់អាម៉េរិក មើលឃើញថា ការកើនឡើងនៃហានិភ័យភូមិសាស្ត្រនយោបាយបានជំរុញឱ្យតម្លៃប្រេងឡើងថ្លៃដល់ ៩៤ ក្នុងមួយបារ៉ែល។ ក្នុងប៉ុន្មានសប្តាហ៍ថ្មីៗនេះ ធនាគារនានា រួមទាំង JP Morgan បាននិយាយថា តម្លៃប្រេងអាចឡើងដល់ ១០០ ដុល្លារក្នុងមួយបារ៉ែលនៅចុងរដូវក្តៅនេះ។ យ៉ាងណាមិញ គេជឿជាក់ថា ប្រសិនបើតម្លៃឡើងដល់ ១០០ ដុល្លារក្នុងមួយបារ៉ែល OPEC + អាចនឹងបន្ធូរបន្ថយការការកាត់បន្ថយទិន្នផលប្រេង៕