បរទេស៖ តម្លៃ​ប្រេង​​ឡើង​ថ្លៃបន្តិច ខណៈដែលវិនិយោគិនរំពឺងពីការកាត់បន្ថយអត្រាការប្រាក់ពី​ធនាគារ​កណ្តាល​អាម៉េរិក និង រង់ចាំមើល​ការ​ចរចា​សន្តិភាពរុស្ស៊ី-​អ៊ុយក្រែន។  នេះបើយោងតាមការរាយការណ៍ពីរ៉យទ័រ។

ទន្ទឹមនឹងនេះ តម្លៃប្រេងឆៅ US West Texas Intermediate (WTI) ឡើងថ្លៃ ១,២២% ឬ ៥៩,៦៧ ដុល្លារខណៈដែលតម្លៃប្រេងឆៅ Brent ឡើងថ្លៃ ០,៩៤% ឬ ៦៣,២៦ ដុល្លារក្នុងមួយបារ៉ែល។ បន្ថែមពីនេះ ទីផ្សារប្រេងឆៅរបស់អាម៉េរិកឡើងថ្លៃបន្ថែមជាង ១ ដុល្លារក្នុងមួយបារ៉ែល ដោយសារការកើនឡើងនៃក្តីសង្ឃឹមថា ធនាគារកណ្តាលនឹងកាត់បន្ថយអត្រាការប្រាក់បន្ទាប់ពីទិន្នន័យបង្ហាញពីការធ្លាក់ចុះនៅក្នុងទីផ្សារការងារ។ មិនត្រឹមតែប៉ុណ្ណោះ តម្លៃប្រាក់ដុល្លារធ្លាក់ថ្លៃរយៈពេល ១០ ថ្ងៃជាប់ៗគ្នា ធៀបនឹងរូបិយប័ណ្ណសំខាន់ៗ ដែលធ្វើឲ្យប្រេងឆៅ​អាម៉េរិកមានតម្លៃថោកសម្រាប់អ្នកទិញដែលកាន់រូបិយប័ណ្ណផ្សេងទៀត។

លោក Phil Flynn អ្នកវិភាគជាន់ខ្ពស់នៅក្រុមហ៊ុន Price Futures Group លើកឡើងថា៖ វិនិយោគិនកំពុងរង់ចាំមើលការកាត់បន្ថយអត្រាការប្រាក់ជាងអ្វីៗផ្សេងទាំងអស់នាពេលឥឡូវនេះ ដែលជំរុញឱ្យតម្លៃប្រេងឆៅឡើងថ្លៃ។ លើសពីនេះ ការកើនឡើងនៃភាពតានតឹងផ្នែកយោធារវាងអាម៉េរិក និងវេណេហ្ស៊ុយអេឡាក៏ជាចំណែកធ្វើឲ្យតម្លៃប្រេងឡើងថ្លៃផងដែរ ដោយ​សារ​មានការព្រួយបារម្ភលើការផ្គត់ផ្គង់ប្រេងនឹងធ្លាក់ចុះ។

កត្តាមួយទៀតដែលធ្វើឲ្យតម្លៃប្រេងឡើងថ្លៃ គឺការជាប់គាំងនៃផែនការសន្តិភាពសម្រាប់អ៊ុយក្រែន ខណៈដែលកិច្ចចរចាសន្តិភាពជាមួយរុស្ស៊ីហាក់ដូចមិនបង្ហាញពីសញ្ញាបញ្ចប់សង្គ្រាមនោះទេ។ កាលពីថ្ងៃពុធថា អ៊ុយក្រែនបានវាយប្រហារបំពង់បង្ហូរប្រេង Druzhba របស់រុស្ស៊ី ដែលជាការវាយប្រហារលើកទី ៥ ទៅលើបំពង់បង្ហូរប្រេងរបស់រុស្ស៊ីបញ្ជូនទៅកាន់ប្រទេស​ហុងគ្រី និងស្លូវ៉ាគី។ ទីភ្នាក់ងារប្រឹក្សា Kpler ព្យាករថា ការវាយប្រហារដោយយន្តហោះគ្មានមនុស្សបើករបស់អ៊ុយក្រែនលើហេដ្ឋារចនាសម្ព័ន្ធប្រេងរបស់រុស្ស៊ី នឹងធ្វើឲ្យការចម្រាញ់ប្រេងរបស់រុស្ស៊ីធ្លាក់ចុះដល់ប្រហែល ៥ លានបារ៉ែលក្នុងមួយថ្ងៃចន្លោះខែកញ្ញា ដល់ ខែវិច្ឆិកា ដោយទិន្នផលប្រេងសាំងរងការប៉ះពាល់ខ្លាំងបំផុត។កាលពីមុន ការកើនឡើងនៃក្តីសង្ឃឹមសម្រាប់កិច្ចចរចាសន្តិភាពបានធ្វើឲ្យតម្លៃប្រេងធ្លាក់ថ្លៃ​ ដោយសារពាណិជ្ជករមើលឃើញថា កិច្ចព្រមព្រៀងមួយនឹងអនុញ្ញាតឱ្យប្រេងរុស្ស៊ីត្រឡប់ទៅទីផ្សារពិភពលោកដែលមានការផ្គត់ផ្គង់លើសតម្រូវការស្រាប់ទៅហើយ៕