ភ្នំពេញ៖ វេទិកា និងពិព័រណ៍កសិកម្មកម្ពុជាឆ្នាំ២០២៥ (CAFE25) ដែលជាព្រឹត្តិការណ៍កសិកម្មដ៏ធំលើកដំបូងបង្អស់នៅកម្ពុជា នឹងប្រារព្ធធ្វើរយៈពេល៤ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែវិច្ឆិកា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ។ ព្រឹត្តិការណ៍នេះ ដឹកនាំរៀបចំដោយក្រសួងកសិកម្ម រុក្ខាប្រមាញ់ និងនេសាទ (MAFF) ដោយមានកិច្ចសហការពីក្រសួង ស្ថាប័នពាក់ព័ន្ធ អង្គការស្បៀង និងកសិកម្មនៃសហប្រជាជាតិ (FAO) ដៃគូអភិវឌ្ឍន៍ និងវិស័យឯកជននានាជាច្រើន។

រហូតមកដល់ពេលនេះ ស្តង់ផលិតផលកសិកម្ម និងក្រុមហ៊ុនដែលធ្វើការពាក់ព័ន្ធលើវិស័យកសិកម្មចំនួន ៣៥០ស្តង់ បានចុះឈ្មោះរួចរាល់ ខណៈនៅសល់ចំនួនតែ៥០ស្តង់តែប៉ុណ្ណោះ ដែលបន្តបើកឱកាសឱ្យអាជីវករ និងកសិករបានចូលរួមដាក់តាំងលក់នូវផលិតផលកសិកម្មរបស់ពួកគេ។

ថ្លែងនៅក្នុងកិច្ចប្រជុំជាមួយបណ្ដាអ្នកសារព័ត៌មានជាតិជាង១០ស្ថាប័ន នាថ្ងៃទី២៨ ខែតុលា ឆ្នាំ២០២៥ នៅទីស្តីការក្រសួងកសិកម្ម  លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា៖ CAFE25 គឺជាព្រឹត្តិការណ៍ក្នុងវិស័យកសិស្បៀងអាហារដែលមានទំហំ និងវិសាលភាពធំបំផុតលើកដំបូងបង្អស់នៅព្រះរាជាណាចក្រកម្ពុជា ដោយមានរួមបញ្ចូលវេទិកាកសិកម្មកម្រិតខ្ពស់រយៈពេល ២ថ្ងៃ និងពិព័រណ៍កសិកម្មរយៈពេល ៤ថ្ងៃ។

លោកជំទាវបានបន្ថែមថា ព្រឹត្តិការណ៍ CAFE25 គឺជាវេទិកាដ៏សំខាន់សម្រាប់ភាគីពាក់ព័ន្ធទាំងអស់ក្នុងខ្សែច្រវ៉ាក់តម្លៃកសិកម្ម រួមមាន កសិករ អ្នកផលិត អ្នកកែច្នៃ ពាណិជ្ចករ វិនិយោគិន អ្នកតាក់តែងគោលនយោបាយ និងដៃគូអភិវឌ្ឍន៍ ដើម្បីផ្សារភ្ជាប់ទំនាក់ទំនង ផ្លាស់ប្តូរគំនិត និងចាប់យកឱកាសថ្មីៗសម្រាប់ការធ្វើពាណិជ្ជកម្ម និងការវិនិយោគក្នុងវិស័យកសិស្បៀងអាហារនៅកម្ពុជាដែលកំពុងរីកចម្រើន។

លោកជំទាវ អ៊ឹម រចនា បានបញ្ជាក់ថា ៖

«ពិព័រណ៍កសិកម្មរយៈពេល ៤ថ្ងៃ នឹងមានស្តង់ពិព័រណ៍៤០០កន្លែង សម្រាប់ដាក់តាំងបង្ហាញផលិតផលកសិកម្ម គ្រឿងចក្រកសិកម្មទំនើបៗ បច្ចេកវិទ្យាដ្រូនកសិកម្ម បច្ចេក​វិទ្យាកែច្នៃធាតុចូលកសិកម្ម និងសេវាកម្មផ្សេងៗ តែយ៉ាងណាមិញ យើងអាចវាយតម្លៃបានថា ទទួលបានជោគជ័យខ្ពស់កម្រិតណានោះទេ ដែលមកទល់នឹងពេលនេះ មានស្តង់ប្រមាណជាង៣០០ស្តង់បានចូលរួមវេទិការដ៍ល្អឥតខ្ចោះមួយនេះ ហើយខ្ញុំសូមអំពាវនាវដល់បងប្អូនដទៃទៀត ដែលមិនទាន់បានចុះឈ្មោះតាំងបង្ហាញផលិតផលរបស់ខ្លួនក្នុងពិព័រណ៍កសិកម្មកម្ពុជា (CAFE25) សូមចុះឈ្មោះ និងដាក់ពាក្យឱ្យបានរួសរាន់»។

លោក ជុង ស៊ីនឆាយ តំណាងមកពីក្រុមហ៊ុន One Event Planner បានលើកឡើងពីវឌ្ឍនភាព និងការរៀបចំព្រឹត្តិការណ៍ទាំងមូល ពោលគឺមកទល់នឹងពេលនេះ គឺមានស្តង់ផលិតផលចំនួន៣៥០ស្តង់ហើយ បានចុះឈ្មោះចូលរួមនៅក្នុងវេទិកា និងពិព័រណ៍កសិកម្មកម្ពុជា (CAFE25) ខណៈភាគច្រើនផ្ដោតសំខាន់ទៅលើផលិតផលកសិកម្ម គ្រឿងចក្រកសិកម្មទំនើបៗ បច្ចេកវិទ្យាដ្រូនកសិកម្ម បច្ចេកវិទ្យាកែច្នៃ ធាតុចូលកសិកម្ម និងសេវាកម្មផ្សេងៗ។

ជាមួយគ្នានេះ លោកក៏បានអំពាវនាវទៅកាន់ក្រុមហ៊ុន សិប្បកម្ម និងក្រុមហ៊ុនកសិ-ឧហ្សាកម្មទាំងអស់ មេត្តាចូលរួមព្រឹត្តិការណ៍ដ៏ធំសម្បើមប្រចាំឆ្នាំទាំងអស់គ្នា ខណៈចំនួនស្តង់ផលិតផលដែលត្រូវលក់ជូនអតិថិជនគឺមានចំនួនកំណត់៕