បរទេស ៖ យោងតាមប្រភពព័ត៌មានពីបរទេសបានរាយការណ៍ថា ទោះបីជាមានការដាក់ទណ្ឌកម្មពីសំណាក់បណ្តាប្រទេសលោកខាងលិចប្រឆាំងនឹងរុស្ស៊ីក៏ដោយ ប៉ុន្តែប្រទេសនេះបានប្រែក្លាយពីជាសេដ្ឋកិច្ចដែលមានប្រាក់ចំណូលមធ្យមកម្រិតខ្ពស់មកជាប្រទេសសេដ្ឋកិច្ចមានប្រាក់ចំណូលខ្ពស់។

ធនាគារពិភពលោកបានលើកឋានៈសេដ្ឋកិច្ចរុស្ស៊ីទៅជាប្រភេទប្រទេសមានប្រាក់ចំណូលខ្ពស់នៅក្នុងការរៀបចំចំណាត់ថ្នាក់ចុងក្រោយរបស់ខ្លួន។ ការរៀបចំចំណាត់ថ្នាក់ប្រាក់ចំណូលរបស់ប្រទេសនីមួយៗត្រូវបានធ្វើបច្ចុប្បន្នភាពរៀងរាល់ថ្ងៃទី ១ ខែកក្កដា ដោយធនាគារពិភពលោក គឺផ្អែកលើប្រាក់ចំណូលជាតិសរុបសម្រាប់មនុស្សម្នាក់(GNI) ពីឆ្នាំមុន។ GNI ត្រូវបានគិតជាដុល្លារសហរដ្ឋអាមេរិក និងគណនាតាមក្បួន Atlas ។ នៅក្នុងប្រទេសនីមួយៗ មានកត្តាមួយចំនួន ដូចជា កំណើនសេដ្ឋកិច្ច អតិផរណា អត្រាប្តូរប្រាក់ និងកំណើនប្រជាជនទាំងអស់អាចជះឥទ្ធិពលដល់កម្រិតនៃ Atlas GNI ក្នុងមនុស្សម្នាក់ៗ។

ទន្ទឹមនេះ មានចម្ងល់ជាច្រើនចង់ដឹងថា តើមូលហេតុអ្វីបានជាប្រជាជន​​រុ​ស្ស៊ី​មាន​ចំណូល​ច្រើនបើ​ទោះជា​មាន​សង្គ្រាម? យោងតាមធនាគារពិភពលោកបានឲ្យដឹងថា សកម្មភាពសេដ្ឋកិច្ចនៅក្នុងប្រទេសរុស្ស៊ីបានជះឥទ្ធិពលដោយការកើនឡើងដ៏ធំនៃសកម្មភាពទាក់ទងនឹងយោធានៅឆ្នាំ២០២៣ ខណៈពេលដែលកំណើនក៏ត្រូវបានជំរុញដោយការស្ទុះងើបឡើងវិញនៃពាណិជ្ជកម្មបន្ថែម ៦,៨ ភាគរយ វិស័យហិរញ្ញវត្ថុ ៨,៧ ភាគរយ និងសំណង់ ៦,៦​ ភាគរយ។ ជាលទ្ធផល កត្តាទាំងនេះនាំឱ្យមានការកើនឡើងដល់ផលិតផលក្នុងស្រុកសរុប (Real GDP) ៣,៦ ភាគរយនិង (Nominal GDP) ១០,៩ ភាគរយ ខណៈដែល GNI ក្នុងមនុស្សម្នាក់បានកើនឡើង ១១,២ ភាគរយ៕

Alexander Dynkin សេដ្ឋវិទូរុស្ស៊ី លើកឡើងថា រុស្ស៊ីមានធនធានថាមពល វត្ថុធាតុដើម និងស្បៀងអាហារគ្រប់គ្រាន់ដោយខ្លួនឯង រួមទាំងកម្លាំងពលកម្មជំនាញ និងទីផ្សារការងារ។ បន្ថែមពីនេះ ប្រព័ន្ធនវានុវត្តន៍ជាតិរបស់រុស្ស៊ីកំពុងដោះស្រាយបញ្ហាប្រឈមនៃអធិបតេយ្យភាពបច្ចេកវិទ្យា និងប្រើប្រាស់ទីផ្សារសេរីយ៉ាងមានប្រសិទ្ធភាព។ កាលពីខែមុន ប្រធានាធិបតី Vladimir Putin បាននិយាយថា សេដ្ឋកិច្ចរុស្ស៊ីកំពុងរីកចម្រើន ទោះបីជាមានទណ្ឌកម្មអន្តរជាតិខ្លាំងក៏ដោយ ហើយប្រទេសនេះបានពង្រីកទំនាក់ទំនងសេដ្ឋកិច្ចជាមួយបណ្តាប្រទេសនៅអាហ្វ្រិក មជ្ឈិមបូព៌ា និងអាស៊ី។

យោងតាមធនាគារអឺរ៉ុប EBRD បានឲ្យដឹងថា កំណើនសេដ្ឋកិច្ចរបស់រុស្ស៊ីនឹងកើនឡើងបន្ថែម ២,៥ ភាគរយនៅឆ្នាំនេះ បើទោះបីជាមានការដាក់ទណ្ឌកម្មពីលោកខាងលិចក៏ដោយ។ ការព្យាករណ៍នេះកើនឡើងពី ១ ភាគរយដែលត្រូវបានព្យាករណ៍កាលពីខែកញ្ញាឆ្នាំ ២០២៣ ដោយសារទីក្រុងម៉ូស្គូត្រូវទូទាត់ផលប៉ះពាល់នៃទណ្ឌកម្មជាមួយនឹងការចំណាយដ៏ច្រើនលើសង្គ្រាមរបស់ខ្លួន។ លោក Beata Javorcik ប្រធានសេដ្ឋវិទូ EBRD យល់ឃើញថា ការរំពឹងថាការដាក់ទណ្ឌកម្មប្រឆាំងនឹងរុស្ស៊ីនឹងនាំឱ្យមានវិបត្តិសេដ្ឋកិច្ច និងហិរញ្ញវត្ថុធ្ងន់ធ្ងរប្រហែលជាមិនមានប្រសិទ្ធភាពនោះទេ។ ប្រទេសរុស្ស៊ីផ្តោតលើសេដ្ឋកិច្ចរបស់ខ្លួនលើកិច្ចខិតខំប្រឹងប្រែងផ្នែកយោធា ដែលជាហេតុនាំឱ្យ​មាន​កំណើន​លឿន​ជាង ប៉ុន្តែ​ការ​រីក​ចម្រើន​នេះអាចនឹងប៉ះពាល់​សុខុមាលភាព​របស់​ប្រជាជន​កាន់​តែ​ច្រើន​៕