បរទេស៖ យោងតាមប្រភពព័ត៌មានពី The Nation បានរាយការណ៍ថា វិស័យឯកជនរបស់ប្រទេសថៃបានជំរុញឱ្យរដ្ឋាភិបាលរបស់ខ្លួនពង្រឹងស្ថិរភាពនយោបាយ និងស្ដារសេដ្ឋកិច្ចឡើងវិញ ដើម្បីកសាងទំនុកចិត្តអាជីវកម្មរយៈពេលវែង ខណៈពេលដែលបច្ចុប្បន្ននេះ កំពុងដាំក្បាលចុះ។ សូមជម្រាបដែរថា បច្ចុប្បន្ននេះ សេដ្ឋកិច្ចថៃត្រូវបានព្យាករណ៍ថានឹងកើនឡើងត្រឹមតែ ០,៣% ប៉ុណ្ណោះក្នុងត្រីមាសទី ៤ ឆ្នាំនេះ ប្រសិនបើមិនមានវិធានការជំរុញបន្ថែមទៀតនោះទេ។

លោក Nava Chantanasurakon អនុប្រធានសហព័ន្ធឧស្សាហកម្មថៃ (FTI) បានលើកឡើងថា បញ្ហាប្រឈមសំខាន់សម្រាប់រដ្ឋាភិបាលថ្មីនៅឆ្នាំក្រោយ គឺការប្រែក្លាយគោលនយោបាយរបស់ខ្លួនទៅជាលទ្ធផលជាក់ស្តែង ជាពិសេសតាមរយៈការជំរុញការប្រើប្រាស់ផលិតផលក្នុងស្រុក ខណៈដែលរដ្ឋាភិបាលថ្មីទទួលបានសំណើគោលនយោបាយពីវិស័យឯកជនជាច្រើន ប៉ុន្តែអ្វីដែលពួកគេចង់បានបំផុតគឺការជំរុញឱ្យមានការប្រើប្រាស់ផលិតផលក្នុងស្រុក (Made in Thailand) ។ FTI បានលើកឡើងថា សមត្ថភាពផលិតក្នុងឧស្សាហកម្មមួយចំនួនបានធ្លាក់ចុះក្នុងកំឡុងត្រីមាសទី ៣ និងដើមត្រីមាសទី ៤ ដោយសារតម្រូវការក្នុងស្រុកធ្លាក់ចុះខ្សោយ ស្របពេលដែលការនាំចេញក៏ធ្លាក់ចុះយ៉ាងគំហុកផងដែរ។​

អ្នកស្រី Jareeporn Jarukornsakul ប្រធានគណៈកម្មាធិការប្រតិបត្តិនៃសាជីវកម្ម WHA បានលើកឡើងថា ឆ្នាំ២០២៦ នឹងក្លាយជាឆ្នាំដែលមានការប្រកួតប្រជែងខ្លាំង ដោយសារភាពមិនច្បាស់លាស់ទាំងក្នុងស្រុក និងពិភពលោក ជាពិសេសផលប៉ះពាល់នៃគោលនយោបាយសេដ្ឋកិច្ច និងអត្រាពន្ធរបស់សហរដ្ឋអាម៉េរិក។ មិនត្រឹមតែប៉ុណ្ណោះ នយោបាយគឺជាកត្តាហានិភ័យដ៏សំខាន់មួយទៀត ជាពិសេសការផ្លាស់ប្តូររដ្ឋាភិបាល និងការឈប់សម្រាករបស់សភារយៈពេលបួនខែ។ ដូច្នោះហើយ ថៃត្រូវការរដ្ឋាភិបាលខ្លាំងដែលយល់អំពីវិស័យធុរកិច្ចទាំងកម្រិតជាតិ និងពិភពលោក ដើម្បីពង្រឹងគោលនយោបាយឡើងវិញ។ ប្រសិនបើរដ្ឋាភិបាលថៃអាចដំណើរការប្រកបដោយប្រសិទ្ធភាពក្នុងអំឡុងពេលនេះ នោះលទ្ធផលវិជ្ជមានអាចនឹងបង្ហាញនៅចុងឆ្នាំនេះ។ យ៉ាងណាមិញ អ្នកស្រីបានកត់សម្គាល់ពីសញ្ញាអវិជ្ជមានដែលលេចឡើងក្នុងវិស័យទេសចរណ៍ ជាពិសេសការធ្លាក់ចុះនៃភ្ញៀវទេសចរ និងតម្លៃប្រាក់បាតឡើងថ្លៃ។ ការឡើងថ្លៃនៃប្រាក់បាតមិនអំណោយផលសម្រាប់អ្នកនាំចេញ និងបង្កើនក្ដីព្រួយបារម្ភក្នុងចំណោមអ្នកវិនិយោគបរទេស។

មិនត្រឹមតែប៉ុណ្ណោះ សហគ្រាសធុនតូច និងមធ្យមថៃប្រឈមនឹងហានិភ័យធំៗចំនួន ៣។ បញ្ហាប្រឈមទី១ គឺការកើនឡើងនៃបំណុលគ្រួសារ និងអាជីវកម្មកំពុងរារាំងសហគ្រិនមិនឱ្យពង្រីក ឬវិនិយោគបន្ថែមទៀត។ ហានិភ័យធំទី២ គឺភាពតានតឹងភូមិសាស្ត្រនយោបាយ ជាពិសេសបញ្ហាដែលកំពុងបន្តរវាងសហរដ្ឋអាម៉េរិក និងចិន រួមជាមួយនឹងគូប្រជែងដែលកំពុងរីកចម្រើនជាង ដែលប៉ះពាល់ដោយផ្ទាល់ដល់វិស័យពាណិជ្ជកម្ម និងការនាំចេញរបស់ថៃ។ ហានិភ័យចុងក្រោយ គឺពាក់ព័ន្ធនឹងសមត្ថភាពការងារ និងបច្ចេកវិទ្យា ជាពិសេសតម្រូវការចាំបាច់ក្នុងការធ្វើពង្រឹងជំនាញរបស់ធនធានមនុស្ស ដើម្បីរក្សាល្បឿនជាមួយនឹងបច្ចេកវិទ្យា និងឌីជីថល ដែលជាគន្លឹះនៃការប្រកួតប្រជែងនាពេលអនាគត។

អ្នកនាង Watanya Bunnag សហនាយកប្រតិបត្តិនៃ Liberator Securities បានលើកឡើងថា រចនាសម្ព័ន្ធសេដ្ឋកិច្ចថៃដើរយឺតជាងនិន្នាការសកល ខណៈដែលបញ្ហាសំខាន់ៗមួយចំនួនទាមទារការយកចិត្តទុកដាក់ពីរដ្ឋាភិបាលជាបន្ទាន់។ កង្វល់ដ៏ធំបំផុតគឺការកើនឡើងនៃប្រជាជនវ័យចំណាស់ ដែលនាំឱ្យមានការថយចុះនៃកម្លាំងពលកម្ម និងផលិតភាពការងារធ្លាក់ចុះ ខណៈដែលរដ្ឋាភិបាលត្រូវបែងចែកចំណែកនៃថវិកាដែលកើនឡើងដល់សុខុមាលភាពសម្រាប់មនុស្សចាស់។ ទន្ទឹមនឹងនេះ ផលិតភាពរបស់ថៃនៅឆ្ងាយពីស្តង់ដារសកល ជាពិសេសក្នុងការរួមបញ្ចូលបច្ចេកវិទ្យាថ្មីៗទៅក្នុងប្រព័ន្ធផលិតកម្ម និងបណ្តាញផ្គត់ផ្គង់របស់ខ្លួន។ ការអភិវឌ្ឍន៍ជំនាញមានសារៈសំខាន់សម្រាប់សេដ្ឋកិច្ច ហើយនេះគឺជាបញ្ហាប្រឈមដ៏សំខាន់សម្រាប់រដ្ឋាភិបាល។ ទោះបីជារដ្ឋាភិបាលបច្ចុប្បន្ននៅសល់ពេលកាន់អំណាចតែបួនខែទៀតក៏ដោយ ប៉ុន្តែពួកគេគួររៀបចំកំណែទម្រង់រចនាសម្ព័ន្ធរយៈពេលវែងសម្រាប់រដ្ឋបាលបន្ទាប់អនុវត្តបន្ត៕