សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ខេត្តចំនួន ៣ រួមមាន ខេត្តកំពង់ធំ បាត់ដំបង និងខេត្តព្រៃវែង បាន និងកំពុងជំរុញការអនុវត្តកម្មវិធីជំរុញផលិតកម្មស្រូវ និងការនាំចេញអង្ករ (Rice-SDP) ដោយទទួលបានហិរញ្ញប្បទានបន្ថែមពីធនាគារអភិវឌ្ឍន៍អាស៊ី ឬអេឌីប៊ី (ADB)។ នេះបើតាមអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ។
Rice-SDP ត្រូវបានអនុវត្តដោយក្រសួងចំនួន៤ និងរដ្ឋបាលខេត្តចំនួន៣ រួមមាន ក្រសួងសេដ្ឋកិច្ច និងហិរញ្ញវត្ថុ, ក្រសួងកសិកម្ម រុក្ខាប្រមាញ់ និងនេសាទ, ក្រសួងធនធានទឹក និងឧតុនិយម និងក្រសួងរៀបចំដែនដីនគរូបនីយកម្ម និងសំណង់ដែលជាភ្នាក់ងារអនុវត្តន៍នៅថ្នាក់ជាតិ។
ខេត្តបាត់ដំបង ខេត្តព្រៃវែង និងខេត្តកំពង់ធំ សរុបមាន ១៣ស្រុក ៩០ឃុំ និងអ្នកទទួលផលដោយផ្ទាល់ចំនួន ២២ ០០០នាក់ និងដោយប្រយោលចំនួន ៦៦ ០០០នាក់ ដែលភាគច្រើនជាកសិករ សហគមន៍កសិកម្ម កសិដ្ឋាន/ស្ថានីយកសិកម្ម ក្រុមអ្នកផលិតគ្រាប់ពូជស្រូវ រោងម៉ាស៊ីនកិនស្រូវ និងមន្ត្រីនៃមន្ទីរកសិកម្ម រុក្ខាប្រមាញ់ និងនេសាទខេត្ត។
យោងតាមអគ្គនាយកដ្ឋានកសិកម្ម បានឱ្យដឹងថាកាលពីថ្ងៃទី២៩ ខែឧសភា ក្នុងកិច្ចប្រជុំស្តីពីការចុះកិច្ចព្រមព្រៀងផលិតគ្រាប់ពូជស្រូវចំណាត់ថ្នាក់វិញ្ញាបនបត្រសម្រាប់ឆ្នាំ២០២៣-២០២៤ ក្រោមក្របខ័ណ្ឌកម្មវិធីជំរុញផលិតកម្មស្រូវ និងការនាំចេញអង្ករ ដែលបានទទួលហិរញ្ញប្បទានបន្ថែម ពីធនាគារអភិវឌ្ឍន៍អាស៊ី តាមរយៈហិរញ្ញប្បទានADB នៅក្នុងឆ្នាំ២០២៣នេះ។
អគ្គនាយកនៃអគ្គនាយកដ្ឋានកសិកម្ម ឯកឧត្តម ងិន ឆាយ បានលើកឡើងថា
“អង្គភាព MAFF-NIO នឹងផលិតគ្រាប់ពូជស្រូវចំណាត់ថ្នាក់វិញ្ញាបនបត្រចំនួន ១ ៨០០ តោន។ក្នុងចំណោមគ្រាប់ពូជនេះ ប្រភេទពូជស្រូវផ្ការំដួល ចំនួន ៩៧០ តោន និងសែនក្រអូប ចំនួន ៨៣០ តោន បានធ្វើការចុះកិច្ចព្រមព្រៀងជាមួយកសិដ្ឋាន/ស្ថានីយកសិកម្ម ចំនួន៤ និងសហគមន៍កសិកម្ម ចំនួន១៥ ស្ថិតនៅក្នុងខេត្តគោលដៅទាំងបី រួមមានខេត្តកំពង់ធំ បាត់ដំបង និងព្រៃវែង។”
តាមរយៈកិច្ចប្រជុំដដែលនោះ ភាគីពាក់ព័ន្ធ បានលើកឡើងពីបញ្ហា ដែលធ្លាប់កើតមានក្នុងអំឡុងពេលនៃការអនុវត្តកិច្ចសន្យា និងពិភាក្សារួមគ្នាដើម្បីរកដំណោះស្រាយឈានទៅការពង្រឹងផលិតកម្មគ្រាប់ពូជស្រូវឱ្យកាន់តែមានគុណភាពល្អប្រកបដោយភាពជឿជាក់ និងមានការទទួលស្គាល់កាន់តែទូលំទូលាយពីកសិករ សហគមន៍កសិកម្ម ក្រុមកសិករផលិតស្រូវ និងវិនិយោគិននានានៅទូទាំងប្រទេស។
ប្រធានសហគមន៍កសិកម្មបាភ្នំមានជ័យ នៃខេត្តព្រៃវែង លោក ឃុន សាអែម បានបង្ហាញពីការសំណូមពរមួយចំនួន ទៅកាន់អគ្គនាយកដ្ឋានកសិកម្ម និងADBទាក់ទងនឹងបញ្ហាបច្ចេកទេសនិងការគាំទ្រផ្តល់ឃ្លាំងសម្រាប់ស្តុកពូជ ដែលអាចរក្សាគុណភាពពូជស្រូវឱ្យបានល្អ រួមទាំងការផ្តល់សម្បកវេចខ្ចប់មកកាន់សហគមន៍ ដោយលោកបានស្នើដល់ខាងគម្រោងថ្នាក់ជាតិ (MAFF-NIO for Rice-SDP) បោះពុម្ពផ្លាកសញ្ញារបស់សហគមន៍ភ្ជាប់ទៅជាមួយផង ព្រោះ គុណភាពពូជស្រូវរបស់សហគមន៍មានស្តង់ដារខ្ពស់ និងមានការទទួលស្គាល់ពីអ្នកប្រើប្រាស់ច្រើន។
សព្វថ្ងៃសហគមន៍កសិកម្មបាភ្នំមានជ័យ ខេត្តព្រៃវែង មានសមាជិក២២៦គ្រួសារ នឹងបង្កើនចំនួនសមាជិកថែមទៀត ដើម្បីជំរុញឱ្យការផលិតពូជស្រូវសុទ្ធ ជាពិសេសផ្ការំដួល និងសែនក្រអូប០១នេះ គ្រប់ទៅតាមផែនការដែលបានកំណត់ ដោយគ្រាប់ពូជស្រូវផលិតដោយសហគមន៍កសិកម្មបាភ្នំមានជ័យ នៃខេត្តព្រៃវែងមិនត្រឹមតែលក់នៅក្នុងខេត្តព្រៃវែងប៉ុណ្ណោះទេ ថែមនាំចេញទៅលក់នៅតាមបណ្តាខេត្តផ្សេងៗទៀត ដូចជា ខេត្តកំពង់ធំ កំពង់ចាម តាកែវ ស្វាយរៀង មណ្ឌលគិរី រតនគិរី បន្ទាយមានជ័យ និងខេត្តកំពង់ឆ្នាំងជាដើម។
សូមបញ្ជាក់ថា កម្មវិធីជំរុញផលិតកម្មស្រូវ និងការនាំចេញអង្ករ (Rice-SDP) ដែលទទួលបានជំនួយហិរញ្ញប្បទានពីធនាគារអភិវឌ្ឍន៍អាស៊ី ចែកចែញជាពីរប្រភេទ ទី១- កម្មវិធីកម្ចី (Program Loan) ជាកម្ចីដែលទ្រទ្រង់ថវិការបស់ជាតិឱ្យមានតុល្យភាព តែត្រូវអនុវត្តទៅតាមកម្មវិធី ដែលអេឌីប៊ីតម្រូវ(បំពេញលក្ខខណ្ឌ) ដូចជាការធ្វើច្បាប់ និងកំណែទម្រង់។ ដោយឡែក ទី២- គម្រោងកម្ចី(Projec Loan) គឺជាការធ្វើសកម្មភាពនៃថវិកាដែលបានខ្ចីនៅក្នុងគម្រោងតែម្តង។ជំនួយហិរញ្ញប្បទានរបស់ អេឌីប៊ី នេះ គឺជាជំនួយសម្រាប់ទ្រទ្រង់វិស័យកសិកម្ម នៅក្នុងកម្ចីដែលទ្រទ្រង់ថវិកាជាតិ ឱ្យមានតុល្យភាព៕
Account
Security
Favourite Content