សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រុមហ៊ុនចំនួន ២ របស់ប្រទេសហ្វីលីពីន បានចាប់អារម្មណ៍រកឱកាសវិនិយោគនៅប្រទេសកម្ពុជាលើវិស័យកសិឧស្សាហកម្ម និង សុខភិបាល ដោយក្នុងនោះរួមមានក្រុមហ៊ុន Excellent Associates Group ដែលជាក្រុមហ៊ុនធ្វើប្រតិបត្តិការពាណិជ្ជកម្មលើវិស័យសំណង់ ឧស្សាហកម្មរ៉ែ ការផលិតដែក សំណ និងស័ង្កសី របស់ហ្វីលីពីន បានសម្តែងឆន្ទៈចង់វិនិយោគលើវិស័យសួនឧស្សាហកម្ម និងកសិ-ឧស្សាហកម្ម ព្រមទាំងការកែច្នៃ និងនាំចេញអង្ករទៅកាន់ទីផ្សារសំខាន់ៗដូចជាហុងកុង ប្រទេសចិន ព្រោះតែអង្ករកម្ពុជាមានគុណភាពខ្ពស់ និង ទទួលបានចំណាត់ថ្នាក់ល្អច្រើនឆ្នាំជាប់ៗគ្នា។ ចំណែកក្រុមហ៊ុន World Citi Group បានបង្ហាញពីចំណាប់ចង់ពង្រីកអាជីវកម្មនៅក្នុងវិស័យអប់រំបណ្តុះបណ្តាលវិជ្ជាជីវៈ ពិសេសក្នុងវិស័យសុខាភិបាលនៅកម្ពុជា ដើម្បីពង្រីកទំនាក់ទំនងប្រទេសទាំងពីរ។
ការបង្ហាញពីគោលបំណងចាប់អារម្មណ៍វិនិយោគនៅកម្ពុជារបស់ក្រុមហ៊ុនទាំងពីរនេះ ក្នុងឱកាសដែលប្រធានក្រុមហ៊ុន បានជួបពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា កាលពីថ្ងៃទី១០ ខែកុម្ភៈ ឆ្នាំ២០២៥ នៅទូទាំងក្រុងម៉ានិល។
ជាការឆ្លើយតប សម្តេចធិបតី បានបញ្ជាក់អំពីការដាក់ចេញនូវគោលនយោបាយ និងវិធានការរបស់រាជរដ្ឋាភិបាលក្នុងការគាំទ្រដល់ការរៀបចំបង្កើតតំបន់សេដ្ឋកិច្ចពិសេស។ ពាក់ព័ន្ធនឹងវិស័យកសិ-ឧស្សាហកម្ម សម្តេចបវរធិបតី បានលើកទឹកចិត្តឱ្យក្រុមហ៊ុនពិចារណាការវិនិយោគលើទំនិញកសិ-ឧស្សាហកម្មមួយចំនួនបន្ថែមទៀត ដែលអាចចូលរួមបំពេញតម្រូវការក្នុងច្រវាក់ផលិតកម្មនៃវិស័យកសិកម្ម ក៏ដូចជា ការផលិតជីបែបធម្មជាតិ និងជីគីមី ជាដើម។
ក្នុងឱកាសនៃជំនួបជាមួយប្រធានក្រុមហ៊ុន World Citi Group សម្ដេចធិបតី ហ៊ុន ម៉ាណែត បានវាយតម្លៃខ្ពស់ចំពោះចំណាប់អារម្មណ៍វិនិយោគរបស់ក្រុមហ៊ុននៅកម្ពុជា ពិសេសក្នុងវិស័យអប់រំផ្នែកសុខាភិបាល និងបណ្ដុះបណ្ដាលវិជ្ជាជីវៈនានា ខណៈសម្តេចបានគូសបញ្ជាក់អំពីអាទិភាពរបស់រាជរដ្ឋាភិបាលកម្ពុជាលើវិស័យសុខាភិបាល ស្របពេលដែលកម្ពុជានឹងមានតម្រូវការខ្ពស់ចំពោះអ្នកជំនាញការផ្នែកសុខាភិបាល ជាពិសេសគិលានុបដ្ឋាយិកា សម្រាប់បម្រើ និងផ្ដល់សេវាសុខាភិបាលជូនដល់ប្រជាពលរដ្ឋ រួមទាំងជនចាស់ជរា៕
Account
Security
Favourite Content