បរទេស៖ យោងតាមប្រភពព័ត៌មានពី Vietnam Net បានរាយការណ៍ថា វិស័យនាំចេញគ្រឿងសមុទ្ររបស់វៀតណាមបានត្រៀមខ្លួនរួចជាស្រេចសម្រាប់កំណើនដ៏រឹងមាំនៅឆ្នាំ២០២៥ ជាមួយនឹងការរំពឹងទុកថាតម្លៃនាំចេញនឹងឈានដល់ ១១ ពាន់លានដុល្លារ។ ទន្ទឹមនឹងនេះ គោលដៅប្រកបដោយមហិច្ឆតារបស់វៀតណាមនេះបានឆ្លុះបញ្ចាំងពីភាពធន់ និងសក្ដានុពលនៃវិស័យនេះ បើទោះបីជាខ្លួនជួបប្រទះនឹងឧបសគ្គនៅក្នុងទីផ្សារពិភពលោកដែលមានការប្រកួតប្រជែងកាន់តែខ្លាំងឡើងក៏ដោយ។

វៀតណាម មានសក្តានុពលខ្លាំងក្នុងការជំរុញការនាំចេញគ្រឿងសមុទ្រទៅកាន់ទីផ្សារសំខាន់ៗដូចជា សហរដ្ឋអាមេរិក ចិន បណ្តាប្រទេសអាស៊ាន និងមជ្ឈិមបូព៌ា ដោយតំបន់ទាំងនេះត្រូវបានមើលឃើញថាមានសារៈសំខាន់សម្រាប់វៀតណាមក្នុងការសម្រេចបាននូវគោលដៅនាំចេញសម្រាប់វិស័យនេះ។ ក្នុងខែមករា ឆ្នាំ២០២៥ ការនាំចេញគ្រឿងសមុទ្ររបស់វៀតណាមបានកើនឡើងលើសពី ៤០០ លានដុល្លារ ដោយកើនឡើង ២៩ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ការនាំចេញដ៏រឹងមាំនៅដើមឆ្នាំនេះបានផ្តល់នូវទស្សនវិស័យវិជ្ជមាន និងបង្កើតមូលដ្ឋានគ្រឹះដ៏រឹងមាំសម្រាប់កំណើនបន្តពេញមួយឆ្នាំ ២០២៥។

ដូច្នេះ ដើម្បីសម្រេចបានគោលដៅក្នុងឆ្នាំ២០២៥ ឧស្សាហកម្មជលផលរបស់វៀតណាមកំពុងផ្តោតលើការលើកកម្ពស់គុណភាព និងប្រសិទ្ធភាពជាជាងការពង្រីកតំបន់កសិកម្ម។ លើសពីនេះ យុទ្ធសាស្ត្រសំខាន់ៗរួមមាន ការកែលម្អដំណើរការស៊ីជម្រៅ ដើម្បីពង្រីកខ្សែសង្វាក់តម្លៃ និងការប្រើប្រាស់វត្ថុធាតុដើមពីជលផល។ វិធីសាស្រ្តនេះមិនត្រឹមតែប្តេជ្ញាថានឹងលើកកម្ពស់តម្លៃនៃផលិតផលអាហារសមុទ្រប៉ុណ្ណោះទេ ប៉ុន្តែថែមទាំងជួយកាត់បន្ថយផលប៉ះពាល់បរិស្ថាននៃការនេសាទ និងការអនុវត្តកសិកម្មផងដែរ។

យោងតាមលោក Phung Đức Tiến អនុរដ្ឋមន្ត្រីក្រសួងកសិកម្ម និងអភិវឌ្ឍន៍ជនបទរបស់វៀតណាម បានឱ្យដឹងថា វិស័យជលផលរបស់ប្រទេសនៅតែមានកន្លែងច្រើនសម្រាប់ពង្រីកកំណើន។ លើសពីនេះ វៀតណាមគ្រោងនឹងប្រើប្រាស់ប្រព័ន្ធទឹករបស់ខ្លួនឱ្យកាន់តែមានប្រសិទ្ធភាព ជាពិសេសប្រព័ន្ធអាងស្តុកទឹក និងទន្លេ ខណៈពេលដែលរៀបចំផលិតកម្មឡើងវិញតាមរយៈការសហការ និងខ្សែសង្វាក់កសិកម្ម។ នៅឆ្នាំ២០២៥ ឧស្សាហកម្មនេះក៏នឹងផ្តោតលើការធ្វើឱ្យប្រសើរឡើងនូវគុណភាពនៃពូជក្នុងទឹក និងធានានូវការគ្រប់គ្រងយ៉ាងតឹងរ៉ឹងលើការប្រើប្រាស់ថ្នាំអង់ទីប្យូទិចក្នុងការចិញ្ចឹមវារីវប្បកម្ម។ វៀតណាមយល់ឃើញថា វិធានការទាំងនេះគឺចាំបាច់សម្រាប់និរន្តរភាព និងការប្រកួតប្រជែងរយៈពេលវែង។

ប្រធាននាយកដ្ឋានជលផល លោក Trần Đình Luân បានសង្កត់ធ្ងន់ថា ចាប់ពីចុងឆ្នាំ២០២៤ រហូតមក វិស័យគ្រឿងសមុទ្រវៀតណាមបានងើបឡើងវិញក្នុងទីផ្សារនាំចេញ។ ដូច្នោះហើយ ក្រុមហ៊ុនជាច្រើនបានចាត់វិធានការយ៉ាងសកម្មដើម្បីបង្កើនប្រសិទ្ធភាពផលិតកម្ម ព្រមទាំងធានានូវការផ្គត់ផ្គង់វត្ថុធាតុដើមប្រកបដោយស្ថិរភាពសម្រាប់ការនាំចេញដូចជាត្រីធូណា និងមឹក ដែលជាផលិតផលមានតម្លៃថ្លៃ។

គួរឲ្យបញ្ជាក់ដែរថា វៀតណាមគឺ​ជា​ប្រទេស​នាំ​ចេញ​គ្រឿងហារ​សមុទ្រ​ធំ​ជាង​គេ​ទី​ ៣ ​របស់​ពិភពលោក​បន្ទាប់​ពី​​ចិន និង​ន័រវែសនៅក្នុងឆ្នាំ ២០២៤ ជាមួយនឹងការ​នាំ​ចេញ​គ្រឿងសមុទ្រជាបានឈានដល់ជាង ១០ ពាន់លានដុល្លារ ដែលកើនឡើងប្រហែល ១៣ ភាគរយពីឆ្នាំ២០២៣។ នៅក្នុងនោះផងដែរ ការនាំចេញបង្គា​សរុប​បាន​ឈាន​ដល់​ ៣,៩ ពាន់​លាន​ដុល្លារ​អាម៉េរិក ដោយ​កើន​ឡើង ១៥ ភាគរយ​ធៀប​នឹង​ឆ្នាំ​មុន។ យ៉ាងណាក៏ដោយ បើទោះបីជាប្រឈមមុខខ្លះទៅនឹងផលប៉ះពាល់ដែលបណ្តាលមកពីបញ្ហាពាណិជ្ជកម្មក៏ដោយ ប៉ុន្តែសហរដ្ឋអាម៉េរិកនៅតែជាទីផ្សារដ៏សំខាន់បំផុតមួយសម្រាប់គ្រឿងសមុទ្រវៀតណាម ជាពិសេសបង្គា និងត្រីប្រា។ យ៉ាងណាមិញ ការកើនឡើងថ្លៃដើមសម្រាប់ចំណី ប្រេងឥន្ធនៈ និងការដឹកជញ្ជូនកំពុងបង្កើនការចំណាយផលិតកម្ម ដែលអាចធ្វើឱ្យប៉ះពាល់ដល់ការប្រកួតប្រជែងរបស់គ្រឿងសមុទ្រវៀតណាមនៅក្នុងទីផ្សារពិភពលោក៕