សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ធនាគារជាតិនៃកម្ពុជា នឹងរៀបចំ “ទិវាសន្សំអាស៊ានលើកទី៦ នៅថ្ងៃទី៣១ ខែតុលា ឆ្នាំ២០២៥ នៅទីរួមខេត្តកំពត ដែលអនុញ្ញាតឱ្យចូលរួមដោយសេរី ដើម្បីលើកកម្ពស់ការយល់ដឹងជាសាធារណៈចំពោះសារៈសំខាន់នៃការសន្សំប្រាក់។ តាមរយៈការចូលរួមកម្មវិធីនេះ សាធារណជននឹងទទួលបានចំណេះដឹងផ្នែកហិរញ្ញវត្ថុ ទស្សនាការតាំងបង្ហាញពីសេវាសន្សំផ្លូវការ ព្រមទាំងទទួលបានការកម្សាន្ត និងវត្ថុអនុស្សាវរីយ៍ផងដែរ។
«ទិវាសន្សំអាស៊ាន» គឺជាគំនិតផ្តួចផ្តើមរបស់ធនាគារជាតិនៃកម្ពុជាក្រោមកិច្ចសហការជាមួយសមាគមធនាគារនៅកម្ពុជា(ABC), សមាគមមីក្រូហិរញ្ញវត្ថុកម្ពុជា(CMA) និងចូលរួមឧបត្ថម្ភដោយគ្រឹះស្ថានធនាគារ និងមីក្រូហិរញ្ញវត្ថុ។
យោងតាមធនាគារជាតិនៃកម្ពុជា «ទិវាសន្សំ អាស៊ាន» មានគោលបំណងបន្តផ្សព្វផ្សាយវប្បធម៌នៃការសន្សំប្រាក់ និងលើកកម្ពស់ការយល់ដឹងរបស់សាធារណជនអំពីសារៈសំខាន់នៃការសន្សំប្រាក់បង្កើនការយល់ដឹងទៅលើចំណេះដឹងផ្នែកហិរញ្ញវត្ថុពាក់ព័ន្ធនឹងការសន្សំប្រាក់ ជំរុញការប្រើប្រាស់ផលិតផល និងសេវាហិរញ្ញវត្ថុផ្លូវការតាមប្រព័ន្ធឌីជីថល និងបង្កើនទំនុកចិត្តសាធារណជនចំពោះការប្រើប្រាស់សេវាហិរញ្ញវត្ថុផ្លូវការ។
ឯកឧត្តម ចាន់ ថា អភិបាលរងនៃគណៈអភិបាលខេត្តកំពត នឹងអញ្ជើញថ្លែងសុន្ទរកថា ស្វាគមន៍នៅក្នុងកម្មវិធី ខណៈឯកឧត្តម យឹម លាត ទេសាភិបាលរងនៃធនាគារជាតិនៃកម្ពុជានឹងថ្លែងសុន្ទរកថាបើកវេទិកា។ ជាងនេះទៅទៀត នឹងមានកម្មវិធីប្រកួតប្រជែងរបស់និស្សិត ក្រោមប្រធានបទ «សន្សំប្រាក់ដោយភាពវៃឆ្លាត សន្សំប្រាក់ដោយក្តីស្រលាញ់»និងការប្រកាសជ័យលាភី ប្រគល់រង្វាន់។ ការចាក់បញ្ចាំងវីដេអូអំពីប្រវត្តិនៃទិវាសន្សំអាស៊ាន ជាពិសេសមានកិច្ចពិភាក្សាដ៏សំខាន់មួយក្រោមប្រធានបទ «ទម្លាប់ និងវិធីសាស្រ្តក្នុងការសន្សំប្រាក់» ព្រមទាំងការតាំងពិព័រណ៍ផលិតផល និងសេវាសន្សំ និងការឆ្លើយសំណួរល្បងប្រាជ្ញាទាក់ទងនឹងការសន្សំ និងចាប់រង្វាន់ពីគ្រឹះស្ថានធនាគារ និងហិរញ្ញវត្ថុ។
សូមជម្រាបថា៖ កម្មវិធីទិវាសន្សំអាស៊ាន គឺស្របតាមកិច្ចខិតខំប្រឹងប្រែងរបស់ប្រទេសសមាជិកអាស៊ានទាំងអស់ ដើម្បីជំរុញបរិយាបន្នហិរញ្ញវត្ថុ ក៏ដូចជាបង្កើននូវទម្លាប់សន្សំទៅដល់ប្រជាពលរដ្ឋ។ នៅក្នុងប្រទេសកម្ពុជាវិញ គំនិតផ្តួចផ្តើមនេះ គឺឆ្លើយតបទៅនឹងការអនុវត្តយុទ្ធសាស្រ្តជាតិ ស្តីពីបរិយាបន្នហិរញ្ញវត្ថុ ឆ្នាំ២០១៩-២០២៥ ដែលត្រូវបានបង្កើតឡើងដើម្បីផ្តល់នូវសេវាហិរញ្ញវត្ថុឱ្យបានកាន់តែទូលំទូលាយ ដោយប្រាកដថា ពលរដ្ឋកម្ពុជាគ្រប់រូបអាចចូលរួម និងទទួលបានអត្ថប្រយោជន៍ពីភាពរីកចម្រើនសេដ្ឋកិច្ចរបស់កម្ពុជា៕ ដោយ ញ៉ែម សុផល
Account
Security
Favourite Content