បរទេស៖ តម្លៃមាសបានបន្តធ្លាក់ចុះ ខណៈដែលតម្លៃប្រាក់ដុល្លារអាម៉េរិកបានហក់ឡើងដល់កម្រិតខ្ពស់បំផុតក្នុងរយៈពេលមួយឆ្នាំចុងក្រោយនេះ ដោយសារមានការព្យាករណ៍ថា ធនាគារកណ្តាលអាម៉េរិកអាចនឹងដំឡើងអត្រាការប្រាក់ដើម្បីទប់ទល់នឹងអតិផរណា។

នៅត្រឹមព្រឹកថ្ងៃទី២៤ ខែមិថុនា នេះ តម្លៃជួញដូរមាសបានធ្លាក់ចុះ ១,៤ ភាគរយ ពោលគឺមកនៅត្រឹម ៤,១៣១ ដុល្លារក្នុងមួយអោននៅលើទីផ្សារអន្តរជាតិ ខណៈនៅលើទីផ្សារកម្ពុជា តម្លៃមាសធ្លាក់ចុះនៅត្រឹម ៤ ៨៩៣ ដុល្លារក្នុងមួយតម្លឹង និង ៤៨៩ ដុល្លារក្នុងមួយជី។ ផ្ទុយទៅវិញ តម្លៃប្រាក់ដុល្លារអាម៉េរិកបានហក់ឡើងក្នុងកម្រិតខ្ពស់បំផុតមិនធ្លាប់មានក្នុងរយៈពេលជាងមួយឆ្នាំកន្លងមកនេះ។

លោក Bob Haberkorn អ្នកជំនាញយុទ្ធសាស្ត្រទីផ្សារជាន់ខ្ពស់នៅ StoneX បានលើកឡើងថា ទីផ្សារសេរីនាពេលនេះមិនសូវយកចិត្តទុកដាក់ទៅលើបញ្ហានៅមជ្ឈិមបូព៌ានោះទៀតទេ ប៉ុន្តែពួកគេកំពុងតែតាមដានយ៉ាងដិតដល់លើធនាគារកណ្តាលអាម៉េរិក បន្ទាប់ពីមានការប្រជុំកាលពីសប្តាហ៍មុនពាក់ព័ន្ធទៅនឹងអត្រាការប្រាក់។

ប្រធានធនាគារកណ្តាលអាម៉េរិកដែលទើបតែឡើងកាន់តំណែងថ្មី លោក Kevin Warsh បានប្តេជ្ញាចិត្តខ្ពស់ក្នុងការដំឡើងអត្រាការប្រាក់ដើម្បីទប់ទល់នឹងអតិផរណា ដែលធ្វើឱ្យអ្នកវិនិយោគបង្កើនការភ្នាល់គ្នាទៅលើលទ្ធភាពនៃការដំឡើងអត្រាការប្រាក់។

យោងតាមការវាស់ស្ទង់ពី CME FedWatch បានឲ្យដឹងថា ការរំពឹងទុកពីក្រុមអាជីវករបានកើនឡើងដល់ ៨៦ ភាគរយ ពាក់ព័ន្ធនឹងលទ្ធភាពដែលធនាគារកណ្តាលអាម៉េរិកនឹងដំឡើងអត្រាការប្រាក់នៅក្នុងខែធ្នូ។ ការព្យាករណ៍នេះកើនឡើងពី ៦១​ ភាគរយមុនពេលធនាគារកណ្តាលអាម៉េរិកបើកកិច្ចប្រជុំកាលពីសប្តាហ៍មុន។ ជាទូទៅ មាសត្រូវបានចាត់ទុកជាឧបករណ៍ការពារហានិភ័យប្រឆាំងនឹងអតិផរណា ប៉ុន្តែវាតែងតែរងផលប៉ះពាល់អវិជ្ជមាននៅក្នុងស្ថានភាពដែលមានអត្រាការប្រាក់ខ្ពស់ ដោយសារវាមិនបានផ្តល់ការប្រាក់ត្រឡប់មកវិញដូចជាការផ្ញើលុយសុទ្ធនៅធនាគារ ឬ ការទិញប័ណ្ណបំណុលរបស់រដ្ឋាភិបាលនោះទេ។

នៅលើផ្នែកភូមិសាស្ត្រនយោបាយវិញ អាម៉េរិកបានយល់ព្រមលើកលែងទណ្ឌកម្មលើអ៊ីរ៉ង់ក្នុងរយៈពេល ៦០ ថ្ងៃ បន្ទាប់ពីមានការចរចាជាលើកដំបូងនៅក្រោមពង្រាងកិច្ចព្រមព្រៀងសន្តិភាពថ្មីមួយ បើទោះបីជាការវាយប្រហារគ្នានៅក្នុងប្រទេសលីបង់នៅតែបន្តក៏ដោយ។

អនុប្រធានាធិបតីអាម៉េរិក លោក JD Vance បានថ្លែងថា ការចរចាជាមួយមន្ត្រីអ៊ីរ៉ង់នៅក្នុងប្រទេសស្វីសបង្កើតបានជាគ្រឹះដ៏ល្អមួយសម្រាប់កិច្ចព្រមព្រៀងសន្តិភាពចុងក្រោយ ខណៈដែលចរាចរណ៍តាមរយៈច្រកសមុទ្រ Hormuz ចាប់ផ្តើមមានសកម្មភាពឡើងវិញ។ កត្តានេះបានធ្វើឱ្យតម្លៃប្រេងធ្លាក់ចុះបន្តិច ដោយតម្លៃ Brent ធ្លាក់ចុះ ០,៥ ភាគរយនៅត្រឹម ៧៦.៧១ ដុល្លារក្នុងមួយបារ៉ែល ហើយតម្លៃប្រេង WTI  ធ្លាក់ចុះ ០,៥ ភាគរយមកនៅត្រឹម ៧២.៨៥ ដុល្លារក្នុងមួយបារ៉ែល៕