ភ្នំពេញ ៖ នៅក្នុង​សម័យ​ប្រជុំ​ពេញអង្គ​គណៈរដ្ឋមន្ត្រី​ កាលពីថ្ងៃសុក្រ​ទី ​១៣ ខែមករា ឆ្នាំ ២០២៣​ សប្ដាហ៍​កន្លង​ទៅនេះ​ រាជ​រដ្ឋា​ភិបាល​​នៃព្រះរាជាណាចក្រក​ម្ពុជា​បានជំរុញ និង​ពន្លឿ​នការ​សិក្សា​ផ្លូវ​រថ​ភ្លើង​ល្បឿនលឿន​ពីភ្នំពេញ​ទៅ​ក្រុងព្រះសីហនុ និង​ពី​ភ្នំពេញទៅកាន់​ក្រុង​ប៉ោយប៉ែត ​ដើម្បី​បម្រើ​ឱ្យ​វិស័យ​ដឹកជញ្ជូនកាន់តែសម្បូរបែប និងជំរុញកំណើន​សេដ្ឋកិច្ច​ជាតិ។

នៅក្នុង​លទ្ធផល​នៃ​កិច្ច​ប្រជុំ​នោះ រាជរដ្ឋាភិបាលជំរុញឱ្យក្រសួង​សដ្ឋកិច្ច​និងហិរញ្ញវត្ថុ​  និងក្រសួង​សាធារណ​ការ​និងដឹកជញ្ជូន ឱ្យ​ពន្លឿន​ការ​សិក្សា​គម្រោង​សាងសង់ផ្លូវរថភ្លើង​ល្បឿនលឿនពីភ្នំពេញ ទៅ​ខេត្តព្រះសីហុ និងផ្លូវរថភ្លើង​ពី រាជធានីភ្នំពេញ​ទៅ​ក្រុង​ប៉ោយ​ប៉ែត​ ដោយអភិវឌ្ឍន៍​លើផ្លូវ​រថភ្លើង​ដែលមានស្រាប់​ដើម្បី​បម្រើ​ឱ្យ​វិស័យ​ដឹកជញ្ជូនកាន់តែសម្បូរបែប ជំរុញកំណើន​សេដ្ឋកិច្ច​ សង្គម​ កម្ពុជាឱ្យ​កាន់តែរីក​ចម្រើន បង្កើន​ប្រាក់​ចំណូល​និងលើក​កម្ពស់​ជីវភាព​ប្រជាជន។

បន្ថែមពីលើនេះ មានប្រសាសន៍ក្នុងឱកាសជួបសំណេះសំណាល ជាមួយអ្នកសារព័ត៌មាន នៅក្នុងប្រទេសកម្ពុជា ដែលជាជំនួបលើកទី៥ កាលថ្ងៃទី ១៤ ខែមករា ឆ្នាំ ២០២៣ កន្លងមកនេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសថា សម្ដេចនឹងធ្វើដំណើរបំពេញទស្សនកិច្ចជាថ្មី នៅប្រទេសចិន នាខែកុម្ភៈ ឆ្នាំ២០២៣ ខាងមុខនេះ។ សម្ដេចតេជោ សង្ឃឹមថា ទស្សនកិច្ចរបស់សម្ដេច នាពេលខាងមុខនេះ នឹងមានគម្រោងថ្មីៗ បន្ថែមទៀត ដែលត្រូវពឹងពាក់ពីមិត្ដចិត្ដ ដើម្បីអភិវឌ្ឍន៍កម្ពុជា ដោយក្នុងនោះ ប្រហែលជាត្រូវរៀបចំ អំពីគម្រោងទាក់ទិនជាមួយនឹងផ្លូវរត់ភ្លើងល្បឿនលឿនផងដែរ។

ក្រៅពីគម្រោងសិក្សាផ្លូវរថភ្លើងល្បឿនលឿនទាំងនេះ កម្ពុជា​បានអភិវឌ្ឍន៍​ផ្លូវ​ល្បឿនលឿន​មួយខ្សែ​ និងបានដាក់ដំណើរការ​ជា​ផ្លូវការ​រួច​ហើយ ដោ​យ​ទទួលបានការគាំទ្រ​ពីសំណាក់​ប្រជាពលរដ្ឋ​កម្ពុជា​ ហើយរាជរដ្ឋាភិបាលក៏គ្រោងនឹង​សាងសង់​ផ្លូវល្បឿ​ន​លឿ​ន​មួយខ្សែទៀត​តភ្ជាប់ពីភ្នំពេញ​ទៅកាន់ក្រុងបាវិត​នៃខេត្តស្វាយរៀង​ព្រំដែនកម្ពុជា​ វៀតណាម​ ហើយក៏​គ្រោង​​នឹង​សិក្សា​ផ្លូ​វល្បឿនលឿន​ទី ៣ ពីភ្នំពេញ​ទៅ​កាន់ខេត្តសៀមរាប​ផងដែរ។

លោកឧកញ៉ា ស៊ិន ចន្ធី ​ប្រធាន​សមាគម​ភស្តុភារកម្ម​កម្ពុជា បានលើកឡើងថា ការ​អភិ​វឌ្ឍ​​ហេដ្ឋារចនាសម្ព័ន្ធ ក្នុងវិស័យដឹកជញ្ជូននៅក្នុងប្រទេស​កម្ពុជា កាន់តែច្រើន​កាន់តែជួយសម្រួល​ដល់ការ​ដឹក​ជញ្ជូន​បានលឿនរហ័ស និងអាចជំរុញឱ្យ​សេដ្ឋកិច្ចកម្ពុជា​កាន់តែរីកចម្រើន​ឆាប់រហ័សផងដែរ។

លោកឧកញ៉ា បាន​បន្តថា​ នៅពេល​យើងមានផ្លូវ​មានប្រព័ន្ធដឹកជញ្ជូនកាន់តែទំនើបកាន់តែច្រើន​ នឹងធ្វើឱ្យ​តម្លៃដឹ​ក​​ជញ្ជូនកាន់តែអស់តិច នឹងធ្វើឱ្យ​សេដ្ឋកិច្ច​របស់​យើង​កាន់តែរីកចម្រើន ពីព្រោះក្នុងមួយថ្ងៃៗ យើងអាច​ដឹក​ទំនិញ​បានច្រើនជើង​ច្រើន​ដង ហើយក៏​ធ្វើឱ្យ​ទំនិញ​របស់​យើង​មានភាពប្រកួត​ប្រជែង​នៅលើទីផ្សារ​ផងដែរ។​

ការ​កសាងហេដ្ឋារចនាសម្ព័ន្ធ​ គឺជាការងារ​ចម្បងរបស់រដ្ឋាភិបាលកម្ពុជា ​ ដោយ​បច្ចុប្បន្ន​នេះ​ រាជរដ្ឋាភិបាល​បាន​អភិវឌ្ឍន៍​ហេដ្ឋារចនាសម្ព័ន្ធជាច្រើន​ខ្សែ​ទាំងផ្លូវ​ថ្នល់ ផ្លូ​វដែក ផ្លូវ​ល្បឿនលឿន និង​ផ្លូវ​ទឹក​ផងដែរ ដែលការអភិវឌ្ឍ​ទាំងនេះ​បានសម្រួល​ដល់ការ​ដឹកជញ្ជូន និងពន្លឿន​ដល់ការអភិវឌ្ឍ​សេដ្ឋកិច្ច​របស់​ប្រ​ទេស​​​កម្ពុជា​ផងដែរ។​

នៅក្នុង​ឆ្នាំ ២០២៣ ​នេះដែរ រាជរដ្ឋាភិបាល​បាន​អនុវត្តន៍គម្រោងសាងសង់​ហេដ្ឋារចនាសម្ព័ន្ធជាច្រើន​ ដែល​គម្រោងអភិវឌ្ឍន៍​ទាំងនេះ​ រំពឹងថានឹង​ជំរុញ​សកម្មភាពសេដ្ឋកិច្ច​ក្នុងប្រទេស​កាន់តែមានភាព​ជឿន​លឿន​​ជាង​មុ​នមួយកម្រិតទៀត ដូចជាស្ពាន​ឆ្លងកាត់ទន្លេ​មេគង្គ​​ មិនធ្លាប់មាន គម្រោងសាងសង់​លើក​ក​ម្រិត​គុ​ណ​​​ភាព​ផ្លូ​វ​មួយចំនួន​ រួមមាន​ផ្លូវ​លេខជាតិ ៤១ ផ្លូវ​លេខ ​៣១ ផ្លូវលេខ ​៣៣ ផ្លូវ​ជាតិលេខ​ ៧ ​ពីស្គន់​ទៅ​ក្រុង​កំពង់​ចា​ម​ជា​ដើ​ម៕​