សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ សង្គ្រាមពាណិជ្ជកម្មដែលកំពុងឡើងកម្ដៅរវាងទីក្រុងវ៉ាស៊ីនតោន និងអូតាវ៉ា បានឈានដល់ចំណុចប្រកាសអាសន្ន ដោយថ្នាក់ដឹកនាំប្រទេសកាណាដាបានគំរាមកាត់ផ្តាច់ការផ្គត់ផ្គង់ថាមពលអគ្គិសនីតាមលំនៅដ្ឋាន និងអាជីវកម្មរបស់អាមេរិកប្រមាណជាង ១,៥ លានកន្លែង។ ការព្រមាននេះបានធ្វើឡើងភ្លាមៗដើម្បីឆ្លើយតបទៅនឹងវិធានការតម្លើងពន្ធនាំចូលរថយន្ត និងទំនិញជាច្រើនទៀតរបស់កាណាដាដល់ទៅ៥០ភាគរយពីសំណាក់ប្រធានាធិបតីអាមេរិក Donald Trump។
តាមការចេញផ្សាយរបស់សារព័ត៌មាន RT បានឲ្យដឹងថា នៅពេលដែលការចរចាពាណិជ្ជកម្មទ្វេភាគីបានទទួលបរាជ័យ មន្ត្រីជាន់ខ្ពស់របស់កាណាដាបានបង្ហាញអំពីផែនការសងសឹកដែលនឹងមិនមានកម្រិតត្រឹមតែពន្ធគយបែបប្រពៃណីនោះឡើយ។
លោក Doug Ford អភិបាលខេត្ត Ontario បានកំណត់យកកិច្ចការងារផ្គត់ផ្គង់ថាមពលសំខាន់ៗមកចរចាដោយផ្ទាល់ ដោយព្រមានថា Ontario អាចនឹងពិចារណាតម្លើងថ្លៃអគ្គិសនី ឬបញ្ឈប់ការផ្គត់ផ្គង់អគ្គិសនីទាំងស្រុងពេលណាក៏បាន ខណៈដែល Ontario គឺជាអ្នកផ្គត់ផ្គង់ថាមពលដល់លំនៅដ្ឋាន និងក្រុមហ៊ុនអាជីវកម្មអាមេរិកមិនតិចជាង ១,៥ លាន នោះទេ ជាពិសេសនៅតាមរដ្ឋព្រំដែន ដូចជា ញូវយ៉ក មីឈីហ្គាន និងមីនីសូតា ជាដើម។ ប្រសិនបើរដ្ឋាភិបាលវ៉ាស៊ីនតោននៅតែបន្តព្យាយាមបំផ្លាញវិស័យផលិតកម្មកាណាដា ប្រធានាធិបតីអាមេរិក គួរតែត្រៀមថ្មពិលទុកឱ្យហើយទៅ។
គួរឲ្យដឹងដែរថា ការគំរាមកំហែងនេះបានកើតឡើងបន្ទាប់ពីប្រធានាធិបតី Trump បានប្រកាសថា ពន្ធលើរថយន្តដឹកទំនិញ គ្រឿងបន្លាស់ និងដែកថែប របស់កាណាដា នឹងកើនឡើងដល់ ៥០ភាគរយ ហើយនឹងអនុវត្តចាប់ពីថ្ងៃទី ១ ខែមករា ឆ្នាំ ២០២៧ ខាងមុខនេះ។ វិធានការនេះគឺកើនឡើងទ្វេដងនៃអត្រាពន្ធ ២៥ភាគរយធៀបនឹងបច្ចុប្បន្ន។
សូមបញ្ជាក់ថា នាយករដ្ឋមន្ត្រីកាណាដា លោក Mark Carney បានបង្ហាញប្រតិកម្មយ៉ាងខ្លាំង ព្រមទាំងបដិសេធយ៉ាងដាច់អហង្ការចំពោះការទាមទាររបស់រដ្ឋាភិបាលក្រុងវ៉ាស៊ីនតោន ដោយលើកឡើងថា លក្ខខណ្ឌពាណិជ្ជកម្មដែលបានរៀបចំនេះគឺមិនយុត្តិធម៌ គ្មានផលចំណេញសេដ្ឋកិច្ច និងត្រូវបានធ្វើឡើងដើម្បីឱ្យមូលដ្ឋានឧស្សាហកម្មរបស់កាណាដាចុះខ្សោយប៉ុណ្ណោះ។ យ៉ាងណាក្តី ដោយសារការចរចាពាណិជ្ជកម្មផ្លូវការបានដើរដល់ផ្លូវទាល់ច្រក លោក Carney បានសន្យាថា កាណាដា នឹងឆ្លើយតបវិញស្មើភាពគ្នាតាមរយៈពន្ធសងសឹកដែលនឹងចាប់ផ្តើមអនុវត្តនៅថ្ងៃទី ៨ ខែកញ្ញា ឆ្នាំ២០២៦ ។
វិធានការសងសឹកនេះនឹងតម្រង់គោលដៅទៅលើទំនិញនាំចេញរបស់អាមេរិកជាច្រើន រួមមាន ដែកថែប ផលិតផលកសិកម្ម គ្រឿងបរិក្ខារក្នុងផ្ទះ និងឧបករណ៍អេឡិចត្រូនិក ខណៈដែលរដ្ឋាភិបាលទាំងពីរមិនព្រមថយក្រោយ ហើយរឹតតែប្រឈមមុខដាក់គ្នាតាមរយៈថាមពល និងខ្សែច្រវាក់ផ្គត់ផ្គង់ដែលមិនធ្លាប់មានពីមុនមកនោះឡើយ៕
Account
Security
Favourite Content