ភ្នំពេញ ៖ គម្រោង​អគារ​ខុនដូ Time Square 10 ដែលមានទីតាំង​នៅតាម​បណ្ដោយឆ្នេរ​អូរត្រេះ បានចាប់ផ្ដើម​បើក​ការដ្ឋានសាងសង់​ជាផ្លូវការ​ហើយ កាលពីព្រឹកថ្ងៃទី​០៤​ ខែធ្នូ ឆ្នាំ ២០២៥​នេះ បើទោះបីជា​ស្ថានភាព នៃវិស័យអចលនទ្រព្យ​នៅកម្ពុជា​មិនទាន់ប្រសើរ​ដូច​មុន​ឆ្នាំ ២០១៩​ក្ដី ។​ ការ​សាងសង់គម្រោង​ខុនដូ នេះ នឹង​រួមចំណែក​ក្នុងចាក់បញ្ចូល​ខុនដូ ចូលទៅក្នុង​ទីផ្សារ​នៅកម្ពុជា​ ជាពិសេស​ខេត្តព្រះសីហនុ ។

អ្នកជំនាញនៃទីផ្សារ​ខុនដូ នៅកម្ពុជា បានលើកឡើងថា ស្ថានភាព​ទីផ្សារ​ខុនដូនៅកម្ពុជា នាពេលប​ច្ចុប្បន្ននេះ អ្នកមានទុនគ្រប់គ្រាន់អាច​ដំណើរទៅមុខបាន តែសម្រាប់អ្នកដែលមិនមានទុន​គ្រប់គ្រាន់​អាច​នឹងមាន​បញ្ហានៅអំឡុងពេល​សាងសង់​ បើសិនជា​មិនមានការ​គាំទ្រពីអតិថិជន ។

លោក​ខន គង្គា នាយក​ប្រតិបត្តិ​នៃក្រុមហ៊ុន ERA Cambodia បានមានប្រសាសន៍​ប្រាប់​ASM Economy នៅរសៀល​ថ្ងៃទី ០៤ ធ្នូ ២០២៥​នេះថា៖​ គម្រោង​សាងសង់​ខុនដូ​ Time Square 10 នៅខេត្តព្រះសីហនុ​ បើតាមលោកទទួលព័ត៌មាន​មក​ថា​នឹង​បញ្ចប់​នៅរយៈពេល​៣ឆ្នាំខាង​មុខ ហើយគម្រោង​នេះ នឹង​រួច​ចំណែក​ដល់​វិស័យអចលនទ្រព្យ​ជាពិសេស​ទីផ្សារខុនដូ សណ្ឋាគារ​ និងពាណិជ្ជកម្ម ។

លោក​បន្តថា អ្នក​អភិវឌ្ឍន៍គម្រោង​មួយនេះ មិនមែនជា​អ្នក​វិនិយោគ​ដែលទើបមកដល់​កម្ពុជា​ថ្មីៗនោះទេ តែ​ពួកគាត់​បានមករស់នៅ និងវិនិយោគនៅកម្ពុជា​ប្រមាណជាង​២០ឆ្នាំមកហើយ ដូច្នេះ ពួកគាត់​បានដឹងពី​ស្ថានភាព និងទីផ្សារ​នៅកម្ពុជា​ច្បាស់លាស់​ណាស់ ។ ម្យ៉ាងវិញទៀត នេះ​ក៏មិនមែនជា​គម្រោងទី១របស់ពួកគាត់ដែរ ពោលគឺ​គម្រោង​Time Square 10 គឺជា​គម្រោងទី​១០​ហើយ​នៅកម្ពុជា ដែលមានន័យថាពួកគាត់មានបទពិសោធន៍​គ្រប់គ្រាន់​​ ឬច្បាស់​ក្នុង​ការ​វិនិយោគនៅកម្ពុជា ។​

លោក​គង្គា​បាន​បញ្ជាក់ថា៖ សម្រាប់​ទីផ្សារ​ខុនដូ នៅកម្ពុជា​បច្ចុប្បន្ន​នេះ អ្នកអភិវឌ្ឍន៍​ដែលមានទុនគ្រប់គ្រាន់​នៅតែអាច​ដំណើរការ​វិនិយោគបាន​ដោយរលូន ប៉ុន្តែសម្រាប់អ្នកដែលមានទុនមិនគ្រប់គ្រាន់ អាច​នឹង​រារែក​ក្នុងការ​ដំណើរ​គម្រោង​ព្រោះតែមិនទាន់ច្បាស់ពីទីផ្សារថា​នឹង​ល្អដូចមុន​វិញ ឬយ៉ាងណា​ ។

គួរ​បញ្ជាក់ថា គម្រោង​Time Square 10 គឺជាគម្រោងខុនដូស្ថិតនៅមុខឆ្នេរអូរត្រេះ ដែលមានទេសភាពសមុទ្រដ៏ស្រស់ស្អាត។ គម្រោងនេះ មានកម្ពស់​៣៩ជាន់ ស្ថិតនៅក្នុងតំបន់​ដែលមានសក្ដានុពល មានហាងកាហ្វេ​ល្បីៗ និង​រមណីយដ្ឋាន​ល្បីស្រាប់​នាពេល​បច្ចុប្បន្ន​ ។​​​ គម្រោង Time Square 10 អភិវឌ្ឍដោយក្រុមហ៊ុន Megakim World Corporation ដែលជាក្រុមហ៊ុនដែរទទួលបានទំនុកចិត្តខ្លាំងពីសំណាក់អ្នកវិនិយោគ​​​ និងប្រជាជនកម្ពុជា។ Time Square 10 មានផ្ទៃដីសរុប ៥,៦២៩ ម៉ែត្រការ៉េ អាគារមួយជាប់គ្នា ដែលបែងជា៣ប្រភេទ​ Ocean Diamond, Ocean Gold និង Ocean Crystal ។

បើតាមរបាយការណ៍របស់​ក្រុមការងារជំរុញការ​វិនិយោគ​ខេត្តព្រះសីហនុ​ បានបង្ហាញ នាថ្មីៗនេះចាប់តាំ​ងពី​រាជរដ្ឋាភិបាល​បានប្រកាស​ឱ្យ​អនុវត្ត​កម្មវិធីពិសេសជំរុញការ​វិនិយោគ ខេត្តព្រះសីហនុ នាដើមឆ្នាំ២០២៤មក ឃើញថា​មានវិនិយោគិន​ក្នុងនិងក្រៅប្រទេស​ជាច្រើន​ចូលមក​បណ្ដាក់ទុនវិនិយោគ​ជា​បន្ត​បន្ទាប់ ដែលគិតត្រឹមខែវិច្ឆិកា ២០២៥ គម្រោង​វិនិយោគប្រមាណ៤០០គម្រោង មានទុនវិនិយោគប្រមាណ ៨ពាន់​លានដុល្លារអាមេរិក​  ៕