សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាត់ទុកជាសញ្ញាល្អប្រសើរឡើងវិញសម្រាប់ស្ថានភាពនៃការវិនិយោគនៅក្នុងប្រទេសកម្ពុជានាដើមឆ្នាំ ២០២៤នេះ ជាក់ស្ដែងរយៈពេលតែ២ខែប៉ុណ្ណោះ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគទាំងគម្រោងវិនិយោគថ្មី និងគម្រោងពង្រីកផលិតកម្មសរុបចំនួន៦៩គម្រោង និងមានទឹកប្រាក់សរុបជាង១៣០០លានដុល្លារអាមេរិក ។ នេះបើតាមរបាយការណ៍របស់ក្រុមប្រឹកក្សាអភិវឌ្ឍន៍កម្ពុជាចេញផ្សាយនៅពេលថ្មីៗនេះ ។
យោងតាមរបាយការណ៍បានបង្ហាញឱ្យឃើញថា ក្នុងខែមករា ក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគទាំងថ្មី និងគម្រោងពង្រីកផលិតកម្មនៅក្នុងប្រទេសចំនួន៣២គម្រោង និងមានទុនវិនិយោគចំនួន ១៨៧លានដុល្លារអាមេរិក ។ ក្នុងនោះដែរ របាយការណ៍ក៏បានបង្ហាញថា គម្រោងវិនិយោគប្រមាណ ៧៨,៧៣ភាគរយជាគម្រោងវិនិយោគរបស់វិនិយោគិនចិន ដោយផ្ដោតលើទៅលើវិស័យឧស្សាហកម្ម ។ ក្រៅពីនេះក៏មានគម្រោងវិនិយោគរបស់វិនិយោគិនក្នុងស្រុក គម្រោងវិនិយោគពីកូរ៉េខាងត្បូង ពីសិង្ហបុរី និងពីសហរដ្ឋអាមេរិកជាដើម ។
ដោយឡែកនៅក្នុងខែកុម្ភៈ កន្លងទៅនេះ ក្រុមប្រឹក្សាអភិវឌ្ឍន៍កម្ពុជាក៏បានចុះបញ្ជីវិនិយោគទាំងគម្រោងវិនិយោគថ្មី និងគម្រោងពង្រីកការវិនិយោគនៅក្នុងប្រទេសកម្ពុជាចំនួន៣៧គម្រោងផងដែរ ដែលមានទឹកប្រាក់វិនិយោគសរុបចំនួន១,២ពាន់លានដុល្លារអាមរិក ។
របាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា ក្នុងចំណោមគម្រោងទាំង៣៧គម្រោងដែលបានអនុម័តចុះបញ្ជីក្នុងខែកុម្ភៈ ២០២៤ មាន២៤គម្រោងស្ថិតនៅក្រៅតំបន់សេដ្ឋកិច្ចពិសេស និង១៣គម្រោងស្ថិតនៅក្នុងតំបន់សេដ្ឋកិច្ចពិសេស ។
គម្រោងធំៗដែលបានចុះបញ្ជីនៅក្នុងខែកុម្ភៈឆ្នាំ ២០២៤ឃើញថា ទី១ . គម្រោងសាងសង់វារីអគ្គិសនីស្ទឹងមេទឹក អានុភាព១៥០មេហ្កាវ៉ាត់ ស្ថិតនៅស្រុកមណ្ឌលសីមា ខេត្តកោះកុង មានទុនវិនិយោគចំនួន៤៤០លានដុល្លារអាមេរិក ទី២. គម្រោងពង្រីកផលិតកម្មរបស់គម្រោងវិនិយោគផលិតសំបកកង់រថយន្តនៅក្នុងតំបន់សេដ្ឋកិច្ចពិសេសឈីលូ ជានពុចាយ នៅខេត្តស្វាយរៀង ដោយមានទុនវិនិយោគប្រមាណ២១២លានដុល្លារអាមេរិក ។
ក្នុងខែកុម្ភៈឆ្នាំ ២០២៤នេះដែរ វិស័យដែលទាក់ទាញគម្រោងវិនិយោគច្រើនជាងគេនៅតែជាវិស័យឧស្សាហកម្ម ដែលមានចំណែករហូតដល់៨១ភាគរយ ក្រៅពីនោះ មានវិស័យហេដ្ឋារចនាសម្ព័ន្ធ១១ភាគរយ និងវិស័យកសិកម្ម និងកសិ-ឧស្សាហកម្មមាន៨ភាគរយ ដោយវិនិយោគិនកម្ពុជាបានបោះទុនវិនិយោគច្រើនជាងគេក្នុងខែកុម្ភៈ ដែលមានរហូតដល់៥៨,៤១ភាគរយ បន្ទាប់មកពីវិនិយោគិនចិន ដែលមានចំណែក៣៣,១៩ភាគរយ និងក្រៅពីនោះមានវៀតណាម និងសិង្ហបុរី ៕
Account
Security
Favourite Content