សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សម្រាប់ឆ្នាំ២០២៤ ខាងមុខនេះ មជ្ឈមណ្ឌលជាតិផ្ដល់ឈាមមានតម្រូវការឈាមប្រមាណជិត២០ម៉ឺនប្លោក ខណៈឆ្នាំ២០២៣នេះ មានតម្រូវការឈាម១៧ម៉ឺនប្លោក ប៉ុន្តែទទួលបានឈាមពីការបរិច្ចាគមានត្រឹមតែជាង១២ម៉ឺនប្លោកប៉ុណ្ណោះ ដូច្នេះមជ្ឈមណ្ឌលជាតិផ្តល់ឈាមបានអំពាវនាវឱ្យសប្បុរសជនចូលរួមបរិច្ចាគឱ្យបានច្រើនបន្ថែមទៀតដើម្បីសង្គ្រោះជីវិតមនុស្ស ។
នេះបើតាមប្រសាសន៍របស់លោកស្រីវេជ្ជបណ្ឌិត មើក សាមាន អនុប្រធានមជ្ឈមណ្ឌលជាតិផ្ដល់ឈាមនៅក្នុងពិធីទទួលអំណោយឈាមពីថ្នាក់ដឹកនាំ និងបុគ្គលិកធនាគារលីដាភីអិលស៊ី នាព្រឹកថ្ងៃទី២២ ខែធ្នូ ឆ្នាំ២០២៣ នៅការិយាល័យកណ្ដាលរបស់ធនាគារអេស៊ីលីដា ។
លោកស្រីបន្តថា ជាទូទៅតម្រូវការឈាម គឺមានប្រមាណ១ភាគរយនៃចំនួនប្រជាជនសរុបទូទៅប្រទេស ជាក់ស្ដែងឆ្នាំ ២០២៣នេះ ប្រជាជនកម្ពុជាសរុបមានប្រមាណជិត១៧លាននាក់ ដូច្នេះតម្រូវការឈាមគឺមានប្រមាណ១៧ម៉ឺនប្លោក ខណៈដែលមជ្ឈមណ្ឌលជាតិផ្តល់ឈាមទទួលបានតែ១២ម៉ឺនប្លោកប៉ុណ្ណោះពីការបរិច្ចាគនានា ហើយក្នុងនោះ ធនាគារអេស៊ីលីដាជាដៃគូសំខាន់មួយរបស់មជ្ឈមណ្ឌលជាតិផ្ដល់ឈាមក្នុងការបរិច្ចាគឈាមជូនមកមជ្ឈមណ្ឌលដោយក្នុងមួយឆ្នាំធនាគារឯកជនមួយនេះបានរៀបចំផ្ដល់ឈាមរហូតដល់ទៅពីរដង ហើយក្នុងមួយដងៗមានរាប់រយប្លោក ។ ដោយឡែក សម្រាប់ឆ្នាំ ២០២៤ កំណើនប្រជាជនអាចនឹងកើនឡើងបន្ថែមទៀត ដូច្នេះតម្រូវការឈាមសម្រាប់សង្គ្រោះជីវិតមនុស្សក៏នឹងកើនឡើងដូចគ្នា ដោយអាចព្យាករណ៍នឹងមានតម្រូវការប្រមាណ១៨ទៅ១៩ម៉ឺនប្លោក ដូច្នេះមជ្ឈមណ្ឌលជាតិផ្ដល់ឈាមត្រូវស្វះស្វែងរក និងសូមអំពាវនាវដល់សប្បុរសជនចូលរួមបរិច្ចាគឈាមឱ្យបានច្រើនគ្នា។
លោកស្រីវេជ្ជបណ្ឌិត ក៏បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងកម្មករនិយោជិតធនាគារ អេស៊ីលីដា ភីអិលស៊ី គ្រប់លំដាប់ថ្នាក់ ដែលបានបរិច្ចាគឈាមជូនមជ្ឈមណ្ឌលជាតិផ្តល់ឈាម ដើម្បីជួយសង្រ្គោះដល់ជនរងគ្រោះដែលត្រូវការឈាមជាចាំបាច់។
លោក លី ថៃ អនុប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ថា ការបរិច្ចាគឈាមពិតជាមានសារៈសំខាន់ខ្លាំងណាស់ក្នុងការជួយសង្គ្រោះជនរងគ្រោះ និងអ្នកជំងឺដែលត្រូវការឈាម ដើម្បីព្យាបាលជំងឺ ។ ម្យ៉ាងវិញទៀតការចូលរួមចំណែកក្នុងកិច្ចការសង្គមដ៏មានសារៈសំខាន់មួយនេះ កម្មករនិយោជិត ធនាគារ អេស៊ីលីដា បានចូលរួមបរិច្ចាគឈាមដោយស្ម័គ្រចិត្តចំនួន ០៦ដង រួចមកហើយ។
លោកបន្តថា សម្រាប់កម្មវិធីបរិច្ចាកឈាមនៅថ្ងៃនេះជាលើកទី ០៧ ហើយ ដែលកម្មករនិយោជិតធនាគារអេស៊ីលីដាគ្រប់លំដាប់ថ្នាក់នៅការិយាល័យកណ្តាល និងសាខាជុំវិញរាជធានីភ្នំពេញ សរុបចំនួន ១៧៨ នាក់ (ស្ត្រីមានចំនួន ៦៩នាក់) បានបន្តចូលរួមបរិច្ចាគឈាម ដើម្បីរួមចំណែកក្នុងសកម្មភាពសង្គម និងមនុស្សធម៌ សម្រាប់បំពេញតម្រូវការកង្វះឈាមក្នុងការជួយសង្គ្រោះអាយុជីវិតជូនដល់មជ្ឈមណ្ឌលជាតិផ្តល់ឈាម ជាពិសេសសម្រាប់ជួយជីវិតមនុស្ស ដែលត្រូវការសង្គ្រោះបន្ទាន់។ ដោយឡែក សម្រាប់កម្មករនិយោជិត ធនាគារ អេស៊ីលីដា នៅតាមបណ្តាសាខាខេត្ត សរុបចំនួន ៤១០នាក់ (ស្រ្តីចំនួន ៩៣នាក់) ក៏បានចូលរួមបរិច្ចាគឈាមនៅតាមមន្ទីរពេទ្យបង្អែកនៃខេត្តនីមួយៗផងដែរ ។
លោកបានលើកទឹកចិត្តដល់សប្បុរសជនទាំងអស់ចូលរួមបរិច្ចាគឈាម ដើម្បីជួយសង្គ្រោះជីវិតមនុស្សឱ្យបានគ្រប់ៗគ្នា ហើយការបរិច្ចាគឈាមនេះដែរ មិនប៉ះពាល់ដល់សុខភាពនោះទេ ផ្ទុយទៅវិញ វាបានធ្វើឱ្យសុខភាពរបស់យើងប្រសើរឡើង ៕
Account
Security
Favourite Content