សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ខណ្ឌសែនសុខ ជាតំបន់មួយដែលមានការសក្ដានុពលក្នុងការទាក់ទាញគម្រោងវិនិយោគ ដោយតំបន់នេះមានផ្លូវធំៗឆ្លងកាត់ និងជាតំបន់ដែលមានការចាប់អារម្មណ៍ពីសំណាក់អ្នកវិនិយោគក្នុងនិងក្រៅប្រទេសផងដែរ ។ ជាការកត់សម្គាល់ ក្នុងមួយរយៈពេលចុងក្រោយនេះ តំបន់សែនសុខ ហាក់ទទួលបានការវិនិយោគច្រើនលើវិស័យផ្សារទំនើប លំនៅឋានប្រណីត និងជាមណ្ឌលពាណិជ្ជកម្មជាដើម ដែលធ្វើឱ្យដីធ្លីនៅក្នុងតំបន់មានតម្លៃខ្ពស់ធៀបនឹងតំបន់មួយចំនួនក្នុងរាជធានីភ្នំពេញ ។
យោងតាមរបាយការណ៍របស់ក្រុមហ៊ុនអចលនទ្រព្យ CBRE Cambodia បានបង្ហាញពីតម្លៃដីធ្លីតាមតំបន់សំខាន់ៗមួយចំនួនក្នុងតំបន់ខណ្ឌសែនសុខ ដែលគិតត្រឹមឆមាសទី២ ឆ្នាំ២០២៤កន្លងទៅ ដោយក្នុងនោះឃើញថា តំបន់ដែលមានតម្លៃទាបបំផុតយ៉ាងហោចក៏មានតម្លៃ៣០០ដុល្លារអាមេរិកក្នុងមួយម៉ែត្រការ៉េ ហើយតំបន់ដែលមានតម្លៃខ្ពស់បំផុតអាចមានតម្លៃរហូតដល់ ២៥០០ដុល្លារអាមេរិកក្នុងមួយម៉ែត្រការ៉េ ។
តាមរបាយការណ៍ដដែលនេះឱ្យដឹងថា ដីធ្លីនៅតាមបណ្ដោយផ្លូវកប់ស្រូវ ឬមហាវិថីឈ្នះឈ្នះ ដែលស្ថិតនៅក្នុងសង្កាត់ឃ្មួញដីធ្លីមានតម្លៃចន្លោះពី៦០០ដុល្លារ ទៅ ៨០០ដុល្លារអាមេរិកក្នុងមួយម៉ែត្រការ៉េ ខណៈដីដែលស្ថិតនៅតាមបណ្ដោយមហាវិថីហាណូយ អាចមានតម្លៃចន្លោះពី ៨០០ដុល្លារ ទៅ ១០០០ដុល្លារអាមេរិក និងមានតំបន់ខ្លះអាចមានតម្លៃខន្លោះពី ១០០០ដុល្លារ ទៅដល់ ១៤០០ដុល្លារអាមេរិកក្នុងមួយម៉ែត្រការ៉េ ។
សម្រាប់តំបន់ដែលដីមានតម្លៃខ្ពស់ក្នុងខណ្ឌសែនសុខ ស្ថិតនៅតាមបណ្ដោយផ្លូវសហព័ន្ធរុស្ស៊ី ក្នុងសង្កាត់ទឹកថ្លា ដែលមានវាមានតម្លៃចន្លោះពី ១៥០០ដុល្លារ ដល់ ២៥០០ដុល្លារអាមេរិកក្នុងមួយម៉ែត្រការ៉េ ។ សង្កាត់ទឹកថ្លាជាសង្កាត់មានផ្ទៃដីតូចជាងគេក្នុងចំណោមបណ្ដាសង្កាត់ទាំង៦ក្នុងខណ្ឌសែនសុខ ប៉ុន្តែមានប្រជាជនរស់នៅច្រើនជាងគេលំដាប់ទី២ ហូតដល់ជាង ៤ម៉ឺន ៤ពាន់ ៥០០នាក់ឯណោះ ។ ចំណែកសង្កាត់អូរបែកក្អមដែលជាសង្កាត់ស្ថិតនៅជាប់គ្នានឹងសង្កាត់ទឹកថ្លាដែរនោះ ក៏ឃើញថា តម្លៃដីធ្លីស្ថិតនៅកម្រិតខ្បស់គួរសមដែរ ដោយក្នុងមួយម៉ែត្រការ៉េ តំបន់ខ្លះអាចមានតម្លៃចន្លោះពី ១៣០០ដុល្លារ ដល់ ១៦០០ដុល្លារអាមេរិក ។
ដោយឡែក តំបន់ភ្នំពេញថ្មី សម្រាប់ទីតាំងដីនៅតាមបណ្ដោយផ្លូវមួយចំនួនក៏ឃើញថាមានតម្លៃមិនចាញ់អូរបែកក្អមប៉ុន្មានដែរ ។ តាមរបាយការណ៍ ដីធ្លីនៅតាមបណ្ដោយផ្លូវសំខាន់ៗមួយចំនួនក្នុងសង្កាត់ភ្នំពេញថ្មី មានតម្លៃចន្លោះពី ១២០០ដុល្លារ ដល់ ១៥០០ដុល្លារអាមេរិកក្នុងមួយម៉ែត្រការ៉េ ចំណែកសង្កាត់គោកឃ្លាង តម្លៃដីស្ថិតនៅចន្លោះ ៩០០ដុល្លារអាមេរិក ដល់ ១៥០០ដុល្លារអាមេរិក ។
ក្រលេកទៅមើលតំបន់ដីនៅក្នុងសង្កាត់ក្រាំងធ្នង់វិញ តម្លៃដីធ្លីនៅមានកម្រិតទាបនៅឡើយ ដែលជាឱកាសល្អសម្រាប់វិនិយោគិនក្នុងការស្វែងរកដីសម្រាប់វិនិយោគ និងអភិវឌ្ឍន៍ ។ ក្នុងរបាយការណ៍ដដែលបានបង្ហាញឱ្យឃើញថា ដីធ្លីដែលស្ថិតនៅក្នុងតំបន់នៃសង្កាត់ក្រាំងធ្នង់ មានតម្លៃចន្លោះពី ៣០០ដុល្លារអាមេរិក ទៅ ៥០០ដុល្លារអាមេរិកប៉ុណ្ណោះ ពីព្រោះតំបន់នេះមិនទាន់មានផ្លូវធំៗ និងគ្រាន់តែជាតំបន់ឧស្សាហកម្ម និងលំនៅឋាន ហើយដីធ្លីនៅទំនេរធំៗ ក៏ច្រើនដែលងាយស្រួលសម្រាប់វិនិយោគិនក្នុងការស្វែងរកសម្រាប់អភិវឌ្ឍន៍ ។
គួរបញ្ជាក់ថា នៅក្នុងឆ្នា២០២៥នេះ បើតាមអ្នកជំនាញ និងអ្នកអភិវឌ្ឍន៍អចលនទ្រព្យមួយចំនួនបានបង្ហាញទស្សនស្រដៀងគ្នាថា វិស័យអចលនទ្រព្យទាំងមូលនៅក្នុងប្រទេសកម្ពុជា នៅមិនទាន់មានភាពប្រសើរ ឬក៏រីកចម្រើនលូតលាស់ដូចមុនវិបត្តិកូវីដ១៩នៅឡើយទេ ប៉ុន្តែផ្នែកខ្លះនៃវិស័យនេះ វិនិយោគិនអាចចាប់ផ្ដើមបណ្ដាក់ទុនវិនិយោគបាន ដូចជាឃ្លាំងស្តុកទំនិញ និងការវិនិយោគលើអគាររោងចក្រជាដើម ៕
Account
Security
Favourite Content