សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិស័យបង់រំលស់ មិនថារំលស់ផ្ទះ ខុនដូ និងសម្ភារៈប្រើប្រាស់ដទៃទៀត បានកើនឡើងគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ហើយក៏បានចូលរួមចំណែកសំខាន់ក្នុងជួយសម្រួលដល់ពលរដ្ឋដែលមិនមានលទ្ធភាពគ្រប់គ្រាន់ក្នុងការទិញរបស់ដោយបង់ផ្ដាច់ ឬជាលុយសុទ្ធ ។ ដោយឡែក សម្រាប់ការទិញផ្ទះ ឬខុនដូ ដោយបង់រំលស់ក្នុងប្រទេសកម្ពុជាក៏រីកចម្រើនគួរឱ្យកត់សម្គាល់ដូចគ្នា ដោយគិតត្រឹមដំណាច់ត្រីមាសទី៣ ឆ្នាំ២០២៤នេះ មានអ្នកទិញផ្ទះ និងខុនដូ បង់រំលស់ជាមួយក្រុមហ៊ុនគិតជាទឹកប្រាក់ជិត១ពាន់លានដុល្លារអាមេរិក ។
យោងតាមឯកឧត្តម ជូ វណ្ណៈ អគ្គនាយកនៃនិយ័តករអាជីវកម្មអចលនវត្ថុ និងបញ្ចាំ ថ្លែងក្នុងវេទិកាតុមូលកាលពីរសៀលថ្ងៃទី៤ ខែធ្នូ ឆ្នាំ២០២៤ បានឱ្យដឹងថា ពលរដ្ឋដែលទិញផ្ទះក្នុងបុរី និងខុនដូ និងបង់រំលស់ជាមួយក្រុមហ៊ុនអភិវឌ្ឍន៍ គិតមកដល់ឆ្នាំ២០២៤នេះ នៅជំពាក់បុរី និងអ្នកអភិវឌ្ឍន៍ខុនដូ មានចំនួន ជិត១ពាន់លានដុល្លារអាមេរិក។
ឯកឧត្តមបន្តថា សម្រាប់តួលេខនេះ គឺគិតតែគម្រោងបុរី និងអគារសហកម្មសិទ្ធិ ឬខុនដូ ដែលបានស្នើសុំអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ ប៉ុណ្ណោះ ។ សម្រាប់អ្នកអភិវឌ្ឍន៍ដែលមិនបានស្នើសុំអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ ខាងនិយ័តករ មិនមានទិន្នន័យនោះទេ ។
ឯកឧត្តមបន្ថែមថា សម្រាប់ក្រុមហ៊ុន ឬអ្នកអភិវឌ្ឍន៍លំនៅឋាន ទៅខ្ចីលុយ ឬកំពុងជាប់ជំពាក់បំណុលធនាគារ និងមីក្រុហិរញ្ញវត្ថុ មាន ចំនួន ៨៣បុរី ឬក្រុមហ៊ុន បើគិតជាទឹកប្រាក់ប្រមាណជាង ២ពាន់លានដុល្លារអាមេរិក ទាំងអ្នកដែលទៅខ្ចីបំណុលពីធនាគារ និងមីក្រូហិរញ្ញវត្ថុ ដោយប្រើរូបវ័ន្តបុគ្គល និងជាលក្ខណៈនីតិបុគ្គល ( ក្រុមហ៊ុន ឬបុរី )។
ឯកឧត្តមបន្ថែមទៀតថា ៖
« វិស័យសំណង់ និងអចលនទ្រព្យ បានដើរតួនាទីសំខាន់ណាស់ក្នុងការរួមចំណែកសេដ្ឋកិច្ច មិនថាតែប្រទេសកម្ពុជានោះទេ រួមទាំងប្រទេសនានានៅក្នុងតំបន់អាស៊ាន និងលើសកលលោក។ នៅក្នុងអំឡុងពេលមុនមានវិបត្តិកូវីដ១៩ វិស័យអចលនទ្រព្យមានការរីកចម្រើនខ្លាំងនៅក្នុងប្រទេសកម្ពុជា ក្នុងនោះទីផ្សារលំនៅឋាន បុរី និងអគារសហកម្មសិទ្ធិ ក៏មានការរីកលូតលាស់ដូចគ្នា និងមានតម្រូវការទិញលក់ច្រើន ។ អ្នកមានលុយបានទិញដោយបង់ផ្ដាច់ ខ្លះទៀតបានទិញដោយបង់ជាដំណាក់កាល និងមួយចំនួនទៀតបានទិញដោយបង់រំលស់»។
ឯកឧត្តមបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជបណ្ឌត្យសភាកម្ពុជា បានថ្លែងការ អ្នកដែលទិញផ្ទះដោយបង់រំលស់ជាមួយក្រុមហ៊ុនអភិវឌ្ឍន៍អចលនទ្រព្យ ដូចជា ទិញលំនៅឋានក្នុងបុរី និងអ្នកទិញខុនដូជាដើម មិនត្រូវបានរាប់បញ្ចូលក្នុងប្រព័ន្ធស៊ីប៊ីស៊ីនោះទេ ហើយអ្នកទិញទាំងនោះ បើសិនជាយកប្រវត្តិទៅឆែកក្នុងប្រព័ន្ធស៊ីប៊ីស៊ីនោះនឹងឃើញថា ប្រវត្តិរបស់គាត់ល្អ និងអាចដាក់ស្នើសុំកម្ចីពីធនាគារ ឬមីក្រូហិរញ្ញវត្ថុបានទៀតផង ។
ឯកឧត្តមបន្តថា ៖
«កាលពីមុនវិបត្តិកូវីដ១៩ អ្នកខ្លះបានទិញផ្ទះ ២ ទៅ ៣ ល្វែង ដោយរំពឹងថានឹងលក់ចេញដើម្បីរកប្រាក់ចំណេញ តែពេលវិបត្តិចូលមកដល់ ចំណូលក៏ធ្លាក់ ដែលធ្វើឱ្យពួកគាត់ត្រូវលក់ផ្ទះដែលទិញរំលស់នោះវិញក្នុងតម្លៃខាតដើម»។
អ្នកជំនាញនៃវិស័យហិរញ្ញវត្ថុជាច្រើនបានផ្ដល់យោបល់ដល់ពលរដ្ឋដែលមានបំណងទិញផ្ទះដោយបង់រំលស់ត្រូវថ្លឹងថ្លែងជាមួយនឹងចំណូល ដើម្បីជៀសវាងបញ្ហាណាមួយកើតឡើងនៅពេលមានវិបត្តិ ដោយការទិញផ្ទះដែលបង់រំលស់មានរយៈពេលវែង គឺមិនត្រូវឱ្យលើសពី៣០ភាគរយនៃចំណូលនោះទេ ។ ឧទាហរណ៍ថា ពីរនាក់ប្តីប្រព័ន្ធរកចំណូលបាន១០០០ដុល្លារអាមេរិកក្នុងមួយខែ ការទិញផ្ទះបង់រំលស់មិនត្រូវឱ្យលើសពី ៣០០ដុល្លារអាមេរិកនោះទេក្នុងមួយខែ ៕
Account
Security
Favourite Content