សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមដំណាច់ខែមីនា ឆ្នាំ២០២៤កន្លងទៅ វិស័យធនាគារ និងមីក្រូហិរញ្ញវត្ថុ បានផ្ដល់កម្ចីដល់អតិថិជនសម្រាប់ទិញលំនៅឋានសរុបមានទឹកប្រាក់ជាង៨ពាន់លានដុល្លារអាមេរិក ។ នេះបើតាមរបាយការណ៍របស់ក្រុមហ៊ុនការិយាល័យឥណទានកម្ពុជា ចេញផ្សាយប្រចាំត្រីមាសទី១ឆ្នាំ ២០២៤ ។
ក្នុងរបាយការណ៍បានបង្ហាញថា គិតត្រឹមដំណាច់ខែមីនា ឆ្នាំ២០២៤ ទំហំឥណទានដែលគ្រឹះស្ថានធនាគារ និងហិរញ្ញវត្ថុ បានកើនឡើងដល់ ១៥,២១ពាន់លានដុល្លារអាមេរិក មានកំណើនប្រមាណ១,៣៦ភាគរយ ធៀបទៅនឹងរយៈពេលដូចគ្នាកាលពីឆ្នាំមុន ដោយក្នុងនោះ ឥណទានសម្រាប់ផ្ដល់ជូនអតិថិជនទិញលំនៅដ្ឋានមានប្រមាណ ៥៣,២ភាគរយនៃទំហំឥណទានសរុប។ ក្រៅពីនោះ ទំហំឥណទានដែលផ្ដល់ជូនទៅអតិថិជនសម្រាប់ប្រើប្រាស់ផ្ទាល់ខ្លួនមានប្រមាណ៤៥,៦៣ភាគរយនៃទំហំឥណទានសរុប ។
របាយការណ៍ដដែលបានបង្ហាញផងដែរថា ប្រជាពលរដ្ឋប្រមាណ ១,៨៣លាននាក់បាន និងកំពុងប្រើប្រាស់ឥណទានមានលក្ខណៈបុគ្គល និងមានកំណើន ៤,០៩ភាគរយ ក្នុងនោះអ្នកប្រើប្រាស់កម្ចីសម្រាប់ទិញផ្ទះមានប្រមាណ១១,០៣ភាគរយ ឬស្មើនឹងប្រមាណ២០ម៉ឺននាក់ គិតត្រឹមដំណាច់ត្រីមាសទី១ឆ្នាំ ២០២៤ ។
តាមរយៈរបាយការណ៍នេះបានបង្ហាញថា ទោះស្ថិតនៅក្នុងវិបត្តិនៃទីផ្សារអចលនទ្រព្យ ឬមានបញ្ហាលើគម្រោងអភិវឌ្ឍន៍លំនៅឋានមួយចំនួនក្ដី តែគ្រឹះស្ថានធនាគារ និងហិរញ្ញវត្ថុនៅតែបន្តផ្ដល់ឥណទានដល់អតិថិជនក្នុងការស្វែងរកទិញលំនៅឋានដដែល ដែលធ្វើឱ្យការទិញលក់លំនៅឋាននៅតែមានជាហូរហែ។
ស្របពេលជាមួយគ្នានេះ អ្នកជំនាញនៃវិស័យអចលនទ្រព្យជាច្រើនបានលើកឡើងថា គម្រោងអភិវឌ្ឍន៍លំនៅឋានដែលមានភាពច្បាស់លាស់នៅតែទទួលបានការគាំទ្រពីអតិថិជនរបស់ខ្លួន និងមានការទិញលក់ជាហូរហែ ជាពិសេសលើគម្រោងអភិវឌ្ឍន៍ណាដែលមានកេរ្តិ៍ឈ្មោះល្អក្នុងការអភិវឌ្ឍលើទីផ្សារ ។
ទាក់ទិននឹងគម្រោងលំនៅឋាននេះដែរ រាជរដ្ឋាភិបាលក៏បានផ្ដល់ការលើកទឹកចិត្តដល់អ្នកអភិវឌ្ឍន៍ និងអ្នកទិញលំនៅឋាន ដោយលើកលែងពន្ធប្រថាប់ត្រាចំពោះលំនៅឋានទាំងឡាយណាដែលមានតម្លៃក្រោម៧ម៉ឺនដុល្លារ ដែលកាន់តែធ្វើឱ្យការទិញ-លក់លំនៅដ្ឋានប្រភេទនេះនៅតែមានសកម្មភាព៕
Account
Security
Favourite Content