សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឆ្នាំ២០២៤នេះ គម្រោងវិនិយោគក្នុងវិស័យសំណង់ទូទាំងប្រទេសមានចំនួន ២ ៦៣៣គម្រោង មានផ្ទៃក្រឡាកម្រាលសំណង់សរុបចំនួនជាង១០លានម៉ែត្រក្រឡា និងមានតម្លៃប៉ាន់ស្មានទុនវិនិយោគប្រមាណ៤,៣៣ពាន់លានដុល្លារអាមេរិក ។ នេះបើយោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី២៥ ខែវិច្ឆិកា ឆ្នាំ២០២៤នេះ។
យោងតាមរបាយការណ៍ដដែលបានឱ្យដឹងថា ទាំងចំនួនគម្រោងវិនិយោគ ទុនវិនិយោគ និងផ្ទៃក្រឡាសាងសង់ដែលអនុម័តសម្រាប់ឆ្នាំ ២០២៤នេះ មានការថយចុះប្រមាណ ១៥,១៧ភាគរយ ធៀបនឹងឆ្នាំ ២០២៣ ដោយក្នុងនោះដែរ គម្រោងវិនិយោគក្នុងឆ្នាំ២០២៣មានចំនួន ២ ៩២៤គម្រោង មានផ្ទៃក្រឡាសំណង់ចំនួនជាង ១២លានម៉ែត្រក្រឡា និងមានទុនវិនិយោគប្រមាណ ៥,១ពាន់លានដុល្លារអាមេរិក ។
នៅក្នុងចំណោមគម្រោងវិនិយោគទាំង២ ៦២២គម្រោង ឃើញថា ក្នុងដែនសមត្ថកិច្ចរបស់ក្រសួងមានចំនួន ២៩៣គម្រោង មានផ្ទៃក្រឡាសំណង់សរុបជាង៩,២លានម៉ែត្រក្រឡា និងមានតម្លៃប៉ាន់ស្មានប្រមាណ ៨៨០លានដុល្លារអាមេរិក ធៀបនឹងឆ្នាំ ២០២៣មានថយចុះប្រមាណ១៧,២៦ភាគរយ ។ ដោយឡែកគម្រោងវិនិយោគដែលស្ថិតក្នុងដែនសមត្ថកិច្ចរដ្ឋបាលរាជធានី/ខេត្ត មានចំនួន ២ ៣២៩គម្រោង ផ្ទៃក្រឡាកម្រាលសំណង់ចំនួន ១,១៦ លានម៉ែត្រក្រឡា មានទុនវិនិយោគប្រមាណ ៤៥៣លានដុល្លារអាមេរិក ធៀបនឹងឆ្នាំ ២០២៣មានការកើនឡើង៨,៣១ភាគរយ ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញឱ្យដឹងថា គិតចាប់ពីឆ្នាំ ២០០០ ដល់ឆ្នាំ ២០២៤ ក្រសួងរៀបចំដែនដី នគរូបនីយកម្ម និងសំណង់បានចេញលិខិតអនុញ្ញាតសាងសង់នៅទូទាំងប្រទេសចំនួន ៦៧ ៦៩៦គម្រោង មានផ្ទៃក្រឡាកម្រាលសំណង់សរុបចំនួនជាង ១៩៧លានម៉ែត្រក្រឡា និងមានតម្លៃប៉ាន់ស្មានទុនវិនិយោគសរុបប្រមាណ ៧៨ ៩៦៩លានដុល្លារអាមេរិក ។
របាយការណ៍ដដែលបានឱ្យដឹងថា គិតចាប់ពីឆ្នាំ២០០០ ដល់ឆ្នាំ ២០២៤ គម្រោងអគារខ្ពស់ៗ ចាប់ពី៥ជាន់ឡើងនៅទូទាំងប្រទេសមានចំនួន ២ ៩០៣អគារ ដោយនៅរាជធានីភ្នំពេញមានចំនួន ១ ៨២៤អគារ ខេត្តព្រះសីហនុ មានចំនួន៧៣៨អគារ ខេត្តបន្ទាយមានជ័យមានចំនួន ២៧២អគារ និងបណ្ដាខេត្តនិងតំបន់ផ្សេងទៀតមានចំនួន ៦៩អគារ ។
អ្នកជំនាញនៃវិស័យអចលនទ្រព្យកម្ពុជាជាច្រើនបាន់បានលើកឡោះងស្រដៀងគ្នាថា ការវិនិយោគលើវិស័យអចលនទ្រព្យ ដូចជា ការវិនិយោគលើអគារខុនដូ អាផាត់មិន និងអគារផ្សេងៗទៀតនៅក្នុងឆ្នាំ ២០២៤នេះ នៅតែមិនទាន់មានភាពល្អប្រសើរដូចមុនឆ្នាំ២០២០នោះទេ ដោយអគារដែលបានវិនិយោគកាលពីមុនពេលមានវិបត្តិនៅមិនទាន់បានបញ្ចប់ និងត្រូវការវិនិយោគិនមកបញ្ចប់គម្រោងអគារទាំងនោះ ខណៈដែលរដ្ឋាភិបាលក៏បានព្យាយាមរកដំណោះស្រាយដើម្បីស្វែងរកវិនិយោគិនមកបញ្ចប់គម្រោងអគារដែលជាប់គាំង។ ជាក់ស្ដែង កាលពីពេលកន្លងទៅ ក្រសួងរៀបចំដែនដី នគរូបនីយកម្ម និងសំណង់ បានប្រកាសពីភាពជោគជ័យក្នុងការដោះស្រាយលើបញ្ហាគម្រោងអភិវឌ្ឍន៍សំណង់ដែលជាប់គាំងមួយចំនួនជាបន្តបន្ទាប់ ជាពិសេស ថ្មីៗនេះ ក្រសួងបានសម្របសម្រួល និងដោះស្រាយបញ្ហាជាប់គាំងរបស់ផ្សារ TCC របស់ក្រុមហ៊ុនចិនមួយនៅក្នុងខណ្ឌឬស្សីកែវ រាជធានីភ្នំពេញ ដោយបានអនុញ្ញាតឱ្យវិនិយោគិនផ្សេងចូលមកបន្តសាងសង់គម្រោងនេះដើម្បីបញ្ចប់ជូនអតិថិជន ៕
Account
Security
Favourite Content