សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សំណង់រីសតដែលជារចនាបថស្ថាបត្យកម្មខ្មែរមួយកន្លែងស្ថិតនៅក្នុងភូមិអូរស្ពាន សង្កាត់ស្ពានមានជ័យ ក្រុងសែន មនោរម្យ ខេត្តមណ្ឌលគិរី កំពុងទាក់ទាញភ្ញៀវទេសចរទាំងក្នុង និងក្រៅប្រទេស ក្នុងនាមជាផលិតផលទេសចរណ៍ថ្មីមួយនៅក្នុងខេត្តមណ្ឌលគិរី ។
សំណង់ស្ថាបត្យកម្ម ភូមិរតនៈ ជារីសតសម្រាប់ទទួលភ្ញៀវមកស្នាក់នៅ និងកម្សាន្តនៅលើកំពូលភ្នំ ក្នុងខេត្តមណ្ឌលគិរី ដែលភ្ញៀវទេសចរមកសម្រាក និងកម្សាន្តអាចទស្សនាទេសភាពជុំវិញរីសតនោះបានយ៉ាងសប្បាយរីករាយ ។
បើតាមលោក សៅ សារិន អ្នកគ្រប់គ្រងរីសត ភូមិរតនៈ បានថ្លែងថា រីសតភូមិរតនៈ គឺជាសំណង់ស្ថាបត្យកម្មបែបខ្មែរ ហើយត្រូវបានវិនិយោគដោយវិនិយោគិនក្នុងស្រុក បង្កើតជាកន្លែងស្នាក់នៅ ភោជនីយដ្ឋាន និងហាងកាហ្វេ ។ រីសតមួយនេះ កំពុងទាក់ទាញភ្ញៀវទេសចរទាំងខ្មែរ និងបរទេសដែលមកសម្រាក និងកម្សាន្តនៅក្នុងខេត្តមណ្ឌលគីរី ។
លោកបន្តថា ៖
«ភ្ញៀវទេសចរដែលមកលេងកម្សាន្តនៅក្នុងខេត្តមណ្ឌលគិរី ទោះបីជាមិនបានមកសម្រាកនៅក្នុងរីសតមួយនេះ ក៏ពួកគាត់ចូលមកលេង ថតរូបជាមួយសំណង់ដ៏អស្ចារ្យនេះ និងពិសារកាហ្វេ ក៏ដូចជាអាហារដែលមានបម្រើនៅក្នុងរីសតមួយនេះផងដែរ ។ រីសតមួយនេះ មានបន្ទប់ទទួលភ្ញៀវមិនច្រើនទេ គឺត្រឹមតែជាង៣០បន្ទប់ប៉ុណ្ណោះ ហើយជារៀងរាល់ថ្ងៃតែងតែមានភ្ញៀវមកសម្រាកក្នុងរីសតនេះ តែបើសិនជាថ្ងៃបុណ្យទានធំៗវិញ នៅក្នុងរីសតនេះមិនមានបន្ទប់គ្រប់គ្រាន់សម្រាប់ទទួលភ្ញៀវឡើយ» ។
លោក សារិន បានបន្ថែមថា សំណង់ស្ថាបត្យកម្ម រីសត ភូមិរតនៈ បានក្លាយជាផលិតផលទេសចរណ៍ថ្មីមួយក្នុងចំណោមផលិតផលទេសចរណ៍ជាច្រើនទៀតក្នុងខេត្តមណ្ឌលគិរី ជាមួយនឹងការផ្តល់ជូននូវសេវាកម្មជូនភ្ញៀវទេសចរជាតិ និងអន្តរជាតិជាទីគាប់ចិត្ត។
ឯកឧត្តម ងិន សុវិមាន អភិបាលរងខេត្តមណ្ឌលគិរី បានមានប្រសាសន៍ថា ក្នុងរយៈពេលប៉ុន្មានឆ្នាំចុងក្រោយនេះ ខេត្តមណ្ឌលគិរីទទួលបានការវិនិយោគលើរមណីយដ្ឋានថ្មីៗជាច្រើនបន្ថែមទៀត ដោយក្នុងចំណោមវិនិយោគិនទាំងអស់គឺសុទ្ធតែជាវិនិយោគិនខ្មែរ ។
ឯកឧត្តមបន្តថា ការវិនិយោគថ្មីៗ បន្ថែមពីលើគម្រោងដែលមានស្រាប់ រួមមានរមណីយដ្ឋាន សណ្ឋាគារ និងសេវាទេសចរណ៍នៅក្នុងខេត្តមណ្ឌលគិរី បានធ្វើឱ្យខេត្តមួយនេះ មានបន្ទប់ស្នាក់នៅរហូតដល់ជាង២ពាន់បន្ទប់គិតត្រឹមដើមឆ្នាំ២០២៥ និងរំពឹងថានឹងមានការកើនឡើងបន្ថែមទៀត ដើម្បីបំពេញតម្រូវការភ្ញៀវទេសចរទាំងក្នុង និងក្រៅស្រុក មកសម្រាក និងកម្សាន្ត ជាពិសេសនៅថ្ងៃបុណ្យទាន និងថ្ងៃឈប់សម្រាកធំៗ ៕
Account
Security
Favourite Content