សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ នៅក្នុងកិច្ចប្រជុំផ្សព្វផ្សាយស្ដីពីការកំណត់លក្ខខណ្ឌនៃការប្រើប្រាស់ដី និងការគ្រប់គ្រងនគរូបនីយកម្ម និងសំណង់ ក្នុងតំបន់រមណីយដ្ឋានបេតិកភណ្ឌពិភពលោកអង្គរ កាលពីថ្ងៃទី០៩ ខែមិថុនា ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជំរុញឱ្យក្រុមការងារអន្តរក្រសួងបញ្ចប់ការដោះស្រាយវិវាទរបស់ពលរដ្ឋក្នុងតំបន់អង្គរឱ្យបានឆាប់ ដើម្បីលើកកម្ពស់ជីវភាព និងការរស់នៅរបស់ពលរដ្ឋ។
នៅក្នុងកិច្ចប្រជុំនោះ ឯកឧត្តម សាយ សំអាល់ បានមានប្រសាសន៍ថា ការជួបជុំគ្នានាពេលនេះគឺជាឱកាសដែលក្រុមការងារក្រសួងរៀបចំដែនដី នគរូបនីយកម្ម និងសំណង់ បង្ហាញជូនអំពីការកំណត់លក្ខខណ្ឌនៃការប្រើប្រាស់ដីឡើងវិញ និងការគ្រប់គ្រងនគរូបនីយកម្ម និងសំណង់ ក្នុងតំបន់រមណីយដ្ឋានបេតិកភណ្ឌពិភពលោកអង្គរ ដែលនេះជាជំហានថ្មីមួយផ្សារភ្ជាប់ទៅនឹងជំហានដែលមានពីមុនមក ។
តាមរយៈកិច្ចប្រជុំនេះ ឯកឧត្តមឧបនាយករដ្ឋមន្ត្រី បានស្នើឱ្យសមាជិកអង្គប្រជុំដែលជាអន្តរក្រសួង ស្ថាប័នពាក់ព័ន្ធ ផ្ដល់មតិយោបល់ និងធាតុចូលបន្ថែមទៀត ថាតើអ្វីដែលក្រុមការងារក្រសួងបានបង្ហាញជូននាពេលនេះ អាចទទួលយកបាន ឬយ៉ាងណា ដើម្បីបញ្ចប់វិវាទរវាងអាជ្ញាធរជាតិអប្សរា និងប្រជាពលរដ្ឋឱ្យបានឆាប់រហ័ស ។
ឯកឧត្តម បានបញ្ជាក់ថា ៖
«វិវាទដែលអូសបន្លាយរវាងអាជ្ញាធរជាតិអប្សរា និងប្រជាពលរដ្ឋនេះមិនមានផលចំណេញដល់អ្នកណាម្នាក់ឡើយ ហើយផ្ទុយទៅវិញមានតែការខាតបង់ចំពោះគ្រប់ភាគីទាំងអស់ ដូច្នេះត្រូវជំរុញការដោះស្រាយវិវាទនេះឱ្យបានឆាប់រហ័ស ។ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ធ្លាប់បានមានប្រសាសន៍ថា ចាប់ពីពេលនេះតទៅមុខទៀត យើងទាំងអស់គ្នាត្រូវរៀបចំផ្ទះសម្បែងរបស់យើងឱ្យបានត្រឹមត្រូវ ពង្រឹងទាំងខឿនសេដ្ឋកិច្ច និងសេចក្តីសុខរបស់ប្រជាជន ហើយធ្វើយ៉ាងណាឱ្យការអនុវត្តច្បាប់ទម្លាប់នានាអាចទទួលយកបានពីប្រជាជនដែលហៅថា លក្ខខណ្ឌប្រជាធិបតេយ្យប្រជាជន មានន័យថា ប្រជាជនអាចទទួលយកបាន ហើយអ្នកអនុវត្តច្បាប់ក៏អាចទទួលយកបានដូចគ្នាដែរ ដើម្បីរួមគ្នាកសាង និងអភិវឌ្ឍន៍ប្រទេសជាតិឱ្យរីកចម្រើន»។
ចំពោះការកំណត់លក្ខខណ្ឌនៃការប្រើប្រាស់ដីសម្រាប់ ១១៤ ភូមិនៅក្នុងតំបន់រមណីយដ្ឋានបេតិកភណ្ឌពិភពលោកអង្គរ គឺមិនមែនប្រើប្រាស់លក្ខខណ្ឌតែមួយនោះទេ ពោលគឺមានគោលការណ៍រួម ប៉ុន្តែត្រូវញែកលក្ខខណ្ឌទាំងនោះស្របទៅតាមស្ថានភាពជាក់ស្តែងនៃភូមិនីមួយៗ។
ឯកឧត្តមឧបនាយករដ្ឋមន្ត្រី សាយ សំអាល់ សង្ឃឹមថា បន្ទាប់ពីបញ្ចប់កិច្ចប្រជុំនេះរួច នឹងមានឯកសារជាក់លាក់ដើម្បីពិគ្រោះពិភាក្សាជាមួយអង្គការ UNESCO ហើយឈានទៅបន្តពិភាក្សាជាមួយ ICC នាពេលខាងមុខនេះ ហើយការងារបញ្ចប់វិវាទនេះនឹងត្រូវដោះស្រាយបានរួចរាល់ដើម្បីងាកមករួមគ្នាពិនិត្យមើលថា តើត្រូវរៀបចំ និងកសាងអ្វីខ្លះនៅក្នុងតំបន់អង្គរសំរាប់ទាក់ទាញភ្ញៀវទេសចរជាតិ និងអន្តរជាតិឱ្យមកទស្សនាកំសាន្តបានកាន់តែច្រើនថែមទៀត ក្នុងគោលដៅបង្កើនប្រាក់ចំណូលសម្រាប់ប្រជាពលរដ្ឋ និងប្រទេសជាតិតាមរយៈវិស័យទេសចរណ៍ ៕
Account
Security
Favourite Content