សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងផ្លូវល្បឿនលឿនភ្នំពេញ សៀមរាប ប៉ោយប៉ែត ដែលមានប្រវែងសរុបប្រមាណ ៤២០គីឡូម៉ែត្រ ឆ្លងកាត់រាជធានី ខេត្តចំនួន៦ បច្ចុប្បន្នបាន និងកំពុងពន្លឿនការសិក្សាឈានទៅរកការបញ្ចប់ ដើម្បីអាចបើកការដ្ឋានសាងសង់ក្នុងដំណាក់កាលទី១នាពេលឆាប់ៗខាងមុខនេះ។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូនបានប្រាប់ឱ្យដឹងថា រាជធានី ខេត្តទាំង៦ ដែលស្ថិតនៅក្នុងគម្រោងសាងសង់ផ្លូវល្បឿនលឿនមួយនេះ រួមាន រាជធានីភ្នំពេញ រត់កាត់ប្រវែង ៣គីឡូម៉ែត្រប៉ុណ្ណោះ ដោយឡែកខេត្តកណ្ដាលមានប្រវែង ១៨គីឡូម៉ែត្រ, ខេត្តកំពង់ចាមប្រវែង ៤៣គីឡូម៉ែត្រ, ខេត្តកំពង់ធំមានប្រវែង ១៣១គីឡូម៉ែត្រ ខេត្តសៀមរាបមានប្រវែង ១៣០គីឡូម៉ែត្រ និងខេត្តបន្ទាយមានជ័យមានប្រវែងរត់កាត់ ៩៥គីឡូម៉ែត្រ ។
គម្រោងផ្លូវនេះ តាមការប៉ាន់ស្មានត្រូវចំណាយទឹកប្រាក់ក្នុងការសាងសង់ប្រមាណជាង ៤០០០លានដុល្លារអាមេរិក ដោយគិតជាមធ្យមតាមស្តង់ដារផ្លូវល្បឿនលឿន គឺ១គីឡូម៉ែត្រត្រូវចំណាយ១០លានដុល្លារអាមេរិក ជាក់ស្ដែងផ្លូវល្បឿនលឿន ភ្នំពេញ ក្រុងព្រះសីហនុ ដែលមានប្រវែង ១៨៧គីឡូម៉ែត្រ កំពុងដំណើរនេះ បានចំណាយទឹកប្រាក់សាងសង់ប្រមាណ២ពាន់លានដុល្លារអាមេរិក ផ្លូវល្បឿនលឿនភ្នំពេញ បាវិត ដែលមានប្រវែង ១៣៥គីឡូម៉ែត្រ គ្រោងនឹងចំណាយទឹកប្រាក់សាងសង់ប្រហាក់ប្រហែល ១,៣ពាន់លានដុល្លារអាមេរិក ។
គម្រោងផ្លូវល្បឿនលឿនភ្នំពេញ សៀមរាប ប៉ោយប៉ែត ត្រូវបានចុះហត្ថលេខាលើកិច្ចព្រមព្រៀងក្របខ័ណ្ឌសម្រាប់សិក្សាកាលពីពាក់កណ្ដាលឆ្នាំ២០២៣ រវាងក្រសួងសាធារណការនិងដឹកជញ្ជូន និងក្រុមហ៊ុន CRBC របស់ប្រទេសចិន ។
គិតមកដល់បច្ចុប្បន្ននេះ កម្ពុជាមានគម្រោងផ្លូវល្បឿនលឿនចំនួន៣ខ្សែ មានប្រវែងសរុបជាង ៧៣០គីឡូម៉ែត្រ ដោយមួយកំពុងដាក់ដំណើរការ ( ផ្លូវល្បឿនលឿនភ្នំពេញ ក្រុងព្រះសីហនុ ) មួយកំពុងសាងសង់ (ផ្លូវល្បឿនលឿនភ្នំពេញបាវិត ) និងមួយទៀតកំពុងសិក្សា ( ផ្លូវល្បឿនលឿនភ្នំពេញ សៀមរាប ប៉ោយប៉ែត ) ។
មន្ត្រីជាន់ខ្ពស់រាជរដ្ឋាភិបាលកម្ពុជា ឯកឧត្តម ឧបនាយករដ្ឋមន្ត្រី ស៊ុន ចាន់ថុល ធ្លាប់បានលើកឡើងថា រាជរដ្ឋាភិបាលនឹងមិនបញ្ចប់ត្រឹមការសាងសង់ផ្លូវល្បឿនលឿនទី៣នោះទេ តែរដ្ឋាភិបាលនឹងបន្តសិក្សាសាងសង់ផ្លូវល្បឿនលឿនបន្តបន្ទាប់ទៀត អាចមានខ្សែទី៤ ទី៥ ដើម្បីជំរុញដល់ការដឹកជញ្ជូនក្នុងប្រទេស និងភ្ជាប់ទៅក្រៅប្រទេស ។
គម្រោងផ្លូវល្បឿនលឿនភ្នំពេញ ក្រុងព្រះសីហនុ បាន និងកំពុងហុចផល និងសក្ដានុពលយ៉ាងច្រើនដល់ខេត្តនៃតំបន់សមុទ្រមួយនេះ ដែលក្រៅពីសម្រួលដល់ការដឹកជញ្ជូនទំនិញសំខាន់ៗសម្រាប់ការនាំចេញតាមរយៈកំពង់ផែអន្តរជាតិក្រុងព្រះសីហនុ នោះ សម្រាប់តែថ្ងៃសម្រាករៀងរាល់ពិធីបុណ្យជាតិ និងអន្តរជាតិម្ដងៗ ខេត្តព្រះសីហនុទទួលបានចំនួនភ្ញៀវទេសចរច្រើនទៅទស្សនា និងសម្រាកលំហែ ដែលបានជំរុញឱ្យអាជីវកម្មនានានៅក្នុងខេត្តមួយនេះកាន់តែមានសកម្មភាពមមាញឹក ៕
Account
Security
Favourite Content