សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតមកដល់ពាក់កណ្ដាលខែឧសភា ឆ្នាំ២០២៣នេះ វឌ្ឍនភាពនៃសំណង់អគារច្រកអន្តរជាតិ បាណងអៀន និងផ្លូវមួយខ្សែតភ្ជាប់ទៅកាន់ផ្លូវជាតិលេខ៥សម្រេចបានប្រមាណជាង៨៥ភាគរយហើយ ដោយរំពឹងថានឹងបញ្ចប់ការសាងសង់ទាំងស្រុងនៅពេលឆាប់ៗនេះ។ នេះបើតាមសេចក្ដីប្រកាសព័ត៌មានរបស់ក្រសួងសាធារណការ និងដឹកជញ្ជូនក្នុងដំណើរទស្សនកិច្ចរបស់គណៈប្រតិភូស្ថានទូតជប៉ុនប្រចាំកម្ពុជា ។
នៅក្នុងដំណើរទស្សនកិច្ចនោះ ឯកឧត្តម នូ វឌ្ឍនៈ អនុរដ្ឋលេខាធិការក្រសួងសាធារណការ និងដឹកជញ្ជូន បានទទួលស្វាគមន៍ និងចុះពិនិត្យវឌ្ឍនភាពការងារគម្រោងសាងសង់អគារច្រកអន្តរជាតិស្ទឹងបត់ បាណងអៀន និងផ្លូវតភ្ជាប់ទៅកាន់ផ្លូវជាតិលេខ៥ ដែលដំណើរទស្សនកិច្ចនេះមានគោលបំណងស្វែងយល់នូវការចែករំលែកព័ត៌មានគម្រោង វឌ្ឍនភាពគម្រោង និងការចុះពិនិត្យផ្ទាល់ដល់ទីតាំងគោលដៅមួយចំនួនដូចជា៖ អគារច្រកត្រួតពិនិត្យ (Terminal Building) ប៉ុស្តិ៍ត្រួតពិនិត្យចេញ-ចូល (Arrival & Departure Booth Check) និងទីតាំងស្ពានមិត្តភាព កម្ពុជា-ថៃផងដែរ។
បើតាមឯកឧត្តម នូ វឌ្ឍនៈ អនុរដ្ឋលេខាធិការក្រសួងសាធារណការ និងដឹកជញ្ជូនបានឱ្យដឹងថា គម្រោងនេះមានគោលបំណងបង្កើនទំហំពាណិជ្ជកម្ម និងជួយសម្រួលដល់កិច្ចសហប្រតិបត្តិការរវាងប្រទេសទាំងពីរ តាមរយៈការសាងសង់អគាររដ្ឋបាលច្រកអន្តរជាតិស្ទឹងបត់-បាណងអៀន។ គម្រោងសាងសង់ច្រកអន្តរជាតិស្ទឹងបត់ និងខ្សែផ្លូវតភ្ជាប់ទៅកាន់ផ្លូវជាតិលេខ៥ បានដំណើរការសាងសង់ចាប់តាំងពីដើមខែឧសភា ឆ្នាំ២០២០ ហើយគិតត្រឹមថ្ងៃទី១៤ ខែឧសភា ឆ្នាំ២០២៣នេះ គម្រោងនេះសម្រេចវឌ្ឍនភាពការងារបាន ៨៥,០៤ភាគរយហើយ ។
ថ្នាក់ដឹកនាំនៃរាជរដ្ឋាភិបាលនៃប្រទេសកម្ពុជា-ថៃ នាពេលកន្លងមកនេះ បានឯកភាពក្នុងការបើកច្រកព្រំដែនថ្មីៗជាបន្តបន្ទាប់ ដើម្បីជំរុញការដឹកជញ្ជូនឆ្លងកាត់ព្រំដែនឱ្យបានកាន់តែច្រើន និងដើម្បីជំរុញទំហំពាណិជ្ជកម្មនៃប្រទេសទាំងពីរកាន់តែច្រើនឡើងបន្ថែមទៀត ។ ការបើកច្រកព្រំដែនថ្មីៗនេះដែរ ក៏បានជួយជំរុញឱ្យមានការវិនិយោគនៅនឹងតំបន់នោះបន្ថែមទៀត ហើយរាជរដ្ឋាភិបាលកម្ពុជាក៏បានសិក្សាក្នុងការបង្កើតតំបន់សេដ្ឋកិច្ចនៅតាមព្រំដែននៃប្រទេសដូចជាព្រំដែនកម្ពុជា-វៀតណាម ព្រំដែនកម្ពុជា និងថៃជាដើម ។
ចក្ខុវិស័យរបស់រាជរដ្ឋាភិបាលកម្ពុជាក៏បានកំណត់យកតំបន់ប៉ែកពាយព្យនៃប្រទេសជាសេដ្ឋកិច្ចដ៏សំខាន់ផងដែរ ហើយក្នុងនោះ រាជរដ្ឋាភិបាលក៏មានសិក្សាចប់សព្វគ្រប់នូវគម្រោងផ្លូវរថភ្លើងល្បឿនលឿនភ្នំពេញ-ប៉ោយប៉ែត ដោយរង់ចាំថវិកាសម្រាប់ការវិនិយោគប៉ុណ្ណោះ ។ គម្រោងផ្លូវល្បឿនលឿនភ្នំពេញ-សៀមរាបក៏បាន និងកំពុងសិក្សាដោយរំពឹងថានឹងចេញជាលទ្ធផលក្នុងពេលឆាប់ៗនេះផងដែរ៕
Account
Security
Favourite Content