សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជំរុញឱ្យអ្នកជំនាញសាងសង់ក៏ដូចជាអ្នកពាក់ព័ន្ធក្នុងវិស័យសំណង់ គួរគិតគូរកំណត់ប្រភេទគ្រឿងបង្គុំសំណង់ដែលគួរប្រើ និងមិនគួរប្រើដើម្បីអាចធានាបាននូវគុណភាពសំណង់ និងសុខភាពសាធារណៈផងដែរ ។
ថ្លែងក្នុងកិច្ចប្រជុំលទ្ធផលនៃការចុះពិនិត្យសិក្សា និងវាយតម្លៃសំណង់អគារអតីតសណ្ឋាគារអង្គរមានជ័យ នាព្រឹកថ្ងៃទី២៣ ខែធ្នូ ឆ្នាំ២០២៤ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា នេះគឺដល់ពេលវេលាហើយដែលត្រូវកំណត់ឱ្យបានច្បាស់លាស់នូវប្រភេទគ្រឿងបង្គុំសំណង់ណាខ្លះដែលត្រូវប្រើប្រាស់ និងមិនគួរប្រើប្រាស់ ដោយក្នុងនោះអគ្គនាយកដ្ឋានសំណង់ ក្រុមប្រឹក្សាជាតិ និងមន្ទីរពិសោធន៍ ត្រូវសហការគ្នាដើម្បីគិតគូរពីបញ្ហានេះ ពីព្រោះមិនអាចអនុវត្តទៅតាមទម្លាប់ដែលមានពីមុនមកដែលដោះស្រាយត្រឹមតែបញ្ហាប្រឈមចំពោះមុខនោះទេ។
ឯកឧត្តមឧបនាយករដ្ឋមន្ត្រីបានបន្តថា ៖
«ដល់ពេលហើយដែលយើងត្រូវតែគិតគូរ និងកំណត់ឱ្យបានច្បាស់លាស់ និងត្រឹមត្រូវនូវប្រភេទគ្រឿងបង្គុំសំណង់ណាដែលគួរប្រើ និងគ្រឿងសំណង់ណាមិនគួរប្រើ ដើម្បីប្រាកដថាអាចធានាបាននូវគុណភាពសំណង់ និងសុខភាពសាធារណៈផងដែរ។ យើងត្រូវរួមគ្នាគិតគូរដោះស្រាយបញ្ហាជារួមដែលនឹងអាចបង្កជាហានិភ័យទៅថ្ងៃអនាគត»។
ឯកឧត្តមឧបនាយករដ្ឋមន្ត្រី សាយ សំអាល់ បញ្ជាក់ថា ជាក់ស្ដែងចំពោះសារធាតុអាបេស្តុស ដែលមាននៅក្នុងគ្រឿងបង្គុំសំណង់ មានតម្លៃថោក ងាយស្រួលក៏ពិតមែន ប៉ុន្តែវាមានផលប៉ះពាល់ត្រឡប់មកវិញពិតជាធ្ងន់ធ្ងរសម្រាប់សុខភាពសាធារណៈ ដូច្នេះត្រូវបញ្ឈប់ការប្រើប្រាស់សារធាតុអាបេស្តុសនេះ។
ក្នុងពេលជាមួយគ្នានេះ ឯកឧត្តម ក៏បានលើកឡើងដែរថា ក្នុងសង្គមជាតិ ប្រសិនបើអាចកាត់ផ្ដាច់បាននូវភាពជ្រុលនិយម នោះកម្ពុជានឹងទទួលបានសេចក្តីសុខជារៀងរហូត។ អ្វីដែលរាជរដ្ឋាភិបាលកម្ពុជាចង់បាននោះគឺចង់ឱ្យប្រទេសជាតិ និងប្រជាជនកម្ពុជាមានបាន និងមានរហូត ដូច្នេះក្រសួងរៀបចំដែនដី នគរូបនីយកម្ម និងសំណង់ ក៏បានចូលរួមដាក់ចេញនូវយុទ្ធសាស្ត្រជម្រះចោលនូវភាពសៅហ្មង ភាពចម្រូងចម្រាស់នានាទាក់ទិននឹងបញ្ហាដីធ្លី សំណង់មិនរៀបរយ និងវិវាទនានាក្នុងសង្គមជាតិ ដើម្បីជំរុញឱ្យប្រទេសជាតិអាចឈានឆ្ពោះទៅមុខបានប្រកបដោយភាពរីកចម្រើនស្របតាមចក្ខុវិស័យរបស់ប្រមុខរាជរដ្ឋាភិបាលកម្ពុជា ៕
Account
Security
Favourite Content