សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រសួងទេសចរណ៍បានចាប់ផ្តើមអនុវត្តកម្មវិធីសិក្សាមុខវិជ្ជាទេសចរណ៍ដល់សិស្សវិទ្យាល័យចំណេះទូទៅ និងបច្ចេកទេសនៅថ្នាក់ទី ១០, ១១ និងទី១២ ជាការបន្ថែមពីលើមុខវិជ្ជាចំណេះដឹងទូទៅដែលមានស្រាប់ ខណៈនៅដំណាក់កាលដំបូង មានសាលាចំនួន៤កំពុងអនុវត្តកម្មវិធីសិក្សាជំនាញទេសចរណ៍នេះ។
នៅក្នុងកម្មវិធីសិក្សានេះ សិស្សនឹងទទួលបានការសិក្សាលើមុខវិជ្ជាសំខាន់ៗដូចជា សេវាកម្មម្ហូបអាហារ និងភេសជ្ជៈ ការិយាល័យជួរមុខ ផលិតកម្មម្ហូបអាហារ គេហកិច្ច ការីទេសចរណ៍ ការប្រើប្រាស់កុំព្យូទ័រ បូករួមនឹងចំណេះដឹងផ្សេងៗទៀត និងការអនុវត្តជាក់ស្ដែងផងដែរ។
ម្យ៉ាងទៀត សិស្សខ្លះ អាចមានឱកាសរកការងារធ្វើបណ្ដើរៗ បន្ទាប់ពីបានរៀនចេះដឹងហើយ ឬអាចនឹងទៅធ្វើការផ្ទាល់តែម្ដងបន្ទាប់ពីបញ្ចប់ការសិក្សា។ ក្រៅពីនេះ សិស្សានុសិស្សក៏អាចបន្តការសិក្សានៅសាកលវិទ្យាល័យទៀតបាន ដោយសញ្ញាបត្រមុខវិជ្ជាទេសចរណ៍នេះនឹងមានតម្លៃស្មើនឹងសញ្ញាបត្រមធ្យមសិក្សាទុតិយភូមិ។
ពាក់ព័ន្ធនឹងការចាប់អនុវត្តថ្មីនេះ អ្នកជំនាញទេសចរណ៍បានយល់ស្របយ៉ាងពេញទំហឹង ដោយរំពឹង ថាសិស្សានុសិស្សនឹងអាចមានចំណេះដឹងផ្នែកទេសចរណ៍តាំងពីថ្នាក់វិទ្យាល័យតទៅ។
លោកជំទាវ ឆាយ ស៊ីវលីន ដែលជាប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ថា៖
“ទាំងនេះជាអ្វីដែលអាចជួយបំភ្លឺផ្លូវដល់សិស្សឱ្យស្គាល់ទេសចរណ៍ និងដឹងថាវិស័យនេះបានជួយអ្វីខ្លះដល់ជាតិយើង យ៉ាងហោចណាស់ឱ្យបានយល់ដឹងពីទេសចរណ៍តាំងពីថ្នាក់វិទ្យាល័យឡើងទៅ”
លោកជំទាវបន្ថែមថា៖
“តាមរយៈការបង្រៀននេះ យើងអាចឱ្យគាត់យល់ដឹង ហើយបណ្ដុះគំនិតឱ្យគាត់ចេះស្រឡាញ់ធនធានធម្មជាតិ បរិស្ថាន ឱ្យពួកគាត់ឃើញនូវសក្កានុពលនៃធនធានធម្មជាតិ ប្រពៃណីវប្បធម៌ អ្វីដែលជារបស់យើងឱ្យបានច្រើន។ ជំនាញនេះមានសារៈសំខាន់ណាស់ ដោយកម្ពុជាយើងមានសក្កានុពលខ្លាំងលើវិស័យទេសចរណ៍ ដូច្នេះសិស្សត្រូវយល់ដឹងនឹងមានជំនាញ ដើម្បីអាចបម្រើសេវាកម្មបានដោយល្អទៅថ្ងៃមុខ”
ជារឿងកាន់តែសំខាន់ទៀត គឺការចាប់អនុវត្តនេះអាចជាជំហានមួយក្នុងការកសាងធនធានមនុស្ស វិស័យទេសចរណ៍ឱ្យកាន់តែទូលំទូលាយ។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានលើកឡើងផងដែរថា ការប្រកាសផ្សព្វផ្សាយកម្មវិធីសិក្សាផ្នែកអប់រំបច្ចេកទេស ផ្នែកទេសចរណ៍ នាពេលនេះ គឺជាសមិទ្ធផលថ្មីមួយទៀតក្នុងប្រព័ន្ធបណ្តុះបណ្តាលជំនាញទេសចរណ៍ជាតិ។ នេះគឺការដាក់បញ្ចូលជាលើកទី១នូវកម្មវិធីសិក្សាដល់កម្រិតវិទ្យាល័យចំណេះទូទៅ និងបច្ចេកទេស ដែលនឹងផ្តល់នូវឱកាសឱ្យសិស្សានុសិស្សអាចចាប់យកជំនាញទេសចរណ៍ទាំងនៅវ័យក្មេង និងទទួលបានសញ្ញាបត្របច្ចេកទេស និងវិជ្ជាជីវៈ ដែលមានតម្លៃសមមូលនឹងសញ្ញាបត្របាក់ឌុប។
ឯកឧត្តមរដ្ឋមន្ត្រីបានបន្តថា កម្មវិធីសិក្សានេះក៏នឹងផ្ដល់ជម្រើសការងារ និងជំនាញបន្ថែមទៀតដល់យុវជនកម្ពុជាក្នុងការចាប់យកជំនាញទេសចរណ៍ ទាំងសម្រាប់យុវជនជាប់ ឬធ្លាក់បាក់ឌុប ឬក៏យុវជនដែលបានបញ្ចប់ការសិក្សាថ្នាក់ទី៩។
គួរជម្រាបថា បច្ចុប្បន្ននេះ មានសាលាចំនួន៤ដែលកំពុងអនុវត្តកម្មវិធីសិក្សានេះ ក្នុងនោះរួមមាន៖ វិទ្យាស្ថានចំណេះទូទៅ និងបច្ចេកទេសអនុវត្តកំពង់ឈើទាល ខេត្តកំពង់ធំ វិទ្យាស្ថានចំណេះទូទៅ និងបច្ចេកទេសឯកជន សន្តហ្វ្រង់ស្វ័រ ខេត្តតាកែវ មជ្ឈមណ្ឌលអប់រំបច្ចេកទេសមិត្តភាពកម្ពុជា-ជប៉ុន ខេត្តសៀមរាប និងសាលាចំណេះទូទៅ និងបច្ចេកទេសឯកជន អេស៊ីធីរាជធានីភ្នំពេញ៕
Account
Security
Favourite Content