ភ្នំពេញ ៖ ព្រឹត្តិការណ៍ Gumball 3000 ដែលជាព្រឹត្តិការណ៍លំដាប់ពិភពលោកនឹងរៀបចំឡើងនៅព្រះរាជាណាចក្រកម្ពុជារយៈពេល ៣ថ្ងៃ ចាប់ពីថ្ងៃទី១៥ ដល់ថ្ងៃទី១៧ ខែកញ្ញាឆ្នាំ២០២៤។ ក្បួនកំពូលរថយន្តទំនើប​ៗ នឹងធ្វើដំណើរចូលមកកម្ពុជាតាមច្រកទ្វារព្រំដែនអន្តរជាតិបាវិត នាថ្ងៃទី១៥ ខែកញ្ញា ស្នាក់នៅរាជធានីភ្នំពេញ១យប់ និងស្នាក់នៅខេត្តសៀមរាប១យប់ រួចត្រឡប់ទៅវិញតាមច្រកទ្វារព្រំដែនអន្តរជាតិប៉ោយប៉ែត នាថ្ងៃទី១៧ ខែកញ្ញា។ ព្រឹត្តិការណ៍ Gumball 3000 រៀបចំដោយក្រុមហ៊ុន ជីប ម៉ុង សហការជាមួយក្រសួងទេសចរណ៍​ និងស្ថាបនិក Gumball 3000 ។

ព្រឹត្តិការណ៍ Gumball 3000 បានត្រូវបានចាត់ទុកថាជាមហាព្រឹត្តិការណ៍ដ៏អស្ចារ្យ និងកម្រសម្រាប់ប្រទេសកម្ពុជា ដោយសារអ្នកចូលរួមជិះរថយន្តសុទ្ធតែជាអ្នកមានឥទ្ធិពល ជាមហាសេដ្ឋី ជាធុរជនមានឈ្មោះបោះសម្លេង កីឡាករល្បីៗ កំពូលតារាលំដាប់ពិភពលោក ហើយក៏មានសែរាជវង្សផងដែរ។ កាន់តែពិសេសជាងនេះទៅទៀតនោះ Gumball 3000 ប្រមូលផ្តុំទៅដោយរថយន្តកំពូលទំនើប ប្រណីតៗ ដែលមានតម្លៃថ្លៃៗ។ ក្រៅពីបង្ហាញរថយន្ត Supercar ជាច្រើនគ្រឿងក៏មានការប្រគំតន្ត្រីពីសំណាក់ DJ, តារាចម្រៀង និងក្រុមតារាចម្រៀងរ៉េបកំពុងពេញនិយម LA CIMA CARTEL ផងដែរ។

តាមរយៈមហាព្រឹត្តិការណ៍ Gumball 3000 នេះ នឹងលើកមុខមាត់ជាតិកម្ពុជា ក៏ដូចជាផ្តល់ផលចំណេញផ្នែកសេដ្ឋកិច្ច ជួយផ្សព្វផ្សាយលើវិស័យទេសចរណ៍យ៉ាងសម្បើមទៅកាន់ពិភពលោក។ ចំណែកថវិកាដែលរៃអង្គាសបានពីព្រឹត្តិការណ៍នេះ នឹងយកទៅឧបត្ថម្ភដល់មន្ទីរពេទ្យកុមារអង្គរ។

ឧកញ៉ា លាង ពៅ (ភីធើរ) អគ្គនាយកពហុពាណិជ្ជកម្មក្រុមហ៊ុន ជីប ម៉ុង បានថ្លែងនៅក្នុងសន្និសីទសារព័ត៌មានប្រកាសជាផ្លូវការអំពីព្រឹត្តិការណ៍ Gumball 3000 នៅកម្ពុជា កាលពីរសៀលថ្ងៃទី១០ ខែសីហា ឆ្នាំ​២០២៤នៅផ្សារទំនើប ជីប ម៉ុង ២៧១ មេហ្គាម៉ល ថា ៖

«ព្រឹត្តិការណ៍ Gumball 3000 នេះមិនមែនជាព្រឹត្តិការណ៍ដែលបង្កើតឡើងក្នុងគោលបំណងបង្អួតរថយន្តទំនើបៗពីសំណាក់អភិជននៅកម្ពុជាទេ ផ្ទុយទៅវិញ​វាជាព្រឹត្តិការណ៍ដែលរៀបចំឡើងក្នុងគោលបំណងសំខាន់ៗចំនួន៤ គឺ៖ ១). ការជំរុញវិស័យទេស​ចរណ៍នៅកម្ពុជា និងកេរ្តិ៍ឈ្មោះរបស់ប្រទេសកម្ពុជាទៅកាន់ពិភពលោក ២). ការចូលរួមចំណែកក្នុងសប្បុរសធម៌ដ៏ធំទៅកាន់មន្ទីរពេទ្យកុមារអង្គរខេត្តសៀមរាប ៣). ការបើកឱកាសរវាងវិនិយោគគិនឯកជនបរទេស និងនៅក្នុងស្រុកបានជួបគ្នា និង៤). ការបង្កើតកំណត់ត្រាពិភពលោកហ្គីណេស ”ការចូលរួមចតរថយន្តច្រើនជាងគេនៅមុខប្រាសាទអង្គរវត្ត”។»

លោកឧកញ៉ា មានជំនឿថា ៖ Gumball 3000ជាព្រឹត្តិការណ៍ដ៏អស្ចារ្យដែលអាចទាក់ទាញ និងលើកស្ទួយមុខមាត់របស់ប្រទេសកម្ពុជា ដោយសារអ្នកចូលរួមព្រឹត្តិការណ៍ទាំងអស់ ជាពិសេសគណៈប្រតិភូដែលចូលបើករថយន្ត សុទ្ធតែអភិជន និងជាអ្នកជំនួញល្បីៗ បុគ្គលមានកិត្តិយស កេរ្តិ៍ឈ្មោះ កីឡាករ សិល្បករល្បីៗ តារាហូលីវូដ ជាច្រើននៅលើពិភពលោក ។អ្នកដែលចូលរួមជាមនុស្សល្បីៗ ពួកគាត់មានអ្នកគាំទ្រ(Fan)មានបណ្តាញសង្គមជាច្រើន។

លោកឧកញ៉ា លាង ពៅ បានបញ្ជាក់ថា៖ Gumball 3000 ឆ្នាំ២០២៤នេះ មានចម្រុះជាតិសាសន៍ជាង៤០ប្រទេសចួលរួមបើកបរឆ្លងកាត់៥ប្រទេសដែលក្នុងនោះមានប្រទេសកម្ពុជាផងដែរ និងមានរថយន្តទំនើបៗ១៤០គ្រឿងទៅ១៥០គ្រឿង។

លោកបានបញ្ជាក់ថា៖

«ព្រឹត្តិការណ៍នេះ ជំរុញវិស័យទេសចរណ៍នៅកម្ពុជានិងកេរ្តិ៍ឈ្មោះរបស់ប្រទេសទៅកាន់ពិភពលោក ព្រោះអ្នកដែលចូលរួមសុទ្ធតែជាមនុស្សល្បីៗ ពួកគាត់មានអ្នកគាំ្រទ្រ(Fan) មានបណ្តាញសង្គម ពេលដែលគាត់ដើរក្នុងព្រឹត្តិការណ៍នេះម្តងៗមានអ្នកមើលបណ្តាញសង្គមរបស់គាត់ជាង១០ប៊ីលានដង តាមTik Tok ,You Tube ,Facebook ,IG និងតាមបណ្តាញសង្គមផ្សេងៗទៀត។ជាពិសេសនៅពេលចប់កម្មវិធី ពួកគាត់នឹងបង្កើតឯកសារ(Documentary) ហើយចាក់ផ្សាយនៅលើ Netflix ដែលមាន subscriber ជាង១០០ប្រទេសនៅលើពិភពលោក។ដូច្នេះយើងបានផ្សព្វផ្សាយអំពីប្រទេសកម្ពុជា ជាពិសេសទេសចរណ៍យើងទៅកាន់ពិភពលោក»។

លោកឧកញ៉ាបានលើកឡើងថា៖ កម្ពុជា ជាប្រទេសមួយមានវប្បធម៌ ចែករំលែក វប្បធម៌ស្នេហាជាតិ ស្រឡាញ់ប្រជាជន ដូច្នេះយុទ្ធនាការរៃអង្គាសថវិកាទៅជួយមន្ទីរពេទ្យកុមារអង្គរខេត្តសៀមរាប ជាទង្វើសប្បុរសធម៌ដ៏ប្រពៃ ហើយលោកមានជំនឿថា ថវិកាដែលនឹងបានពីការបរិច្ចាកមិនតិច២០ម៉ឺនដុល្លារទេ។

លោកអគ្គនាយកពហុពាណិជ្ជកម្មក្រុមហ៊ុន ជីប ម៉ុង បានឱ្យដឹងទៀតថា៖ ព្រឹត្តិការណ៍ Gumball 3000 នឹងផ្តល់ផលប្រយោជន៍ផ្នែកសេដ្ឋកិច្ច និងការវិនិយោគនៅកម្ពុជា តាមរយៈកម្មវិធីជំនួបពាណិជ្ជកម្មរវាងពាណិជ្ជករក្នុងស្រុក និងក្រៅប្រទេស។អ្នកចូលរួមវេទិកាធុរកិច្ចនេះ ប្រមាណ៤០ភាគរយ​ជាពាណិជ្ជករធំៗ និងសេដ្ឋីវាល់លានមកពីប្រទេសជាច្រើន។នេះជាឱកាសដែលអ្នកធុរកិច្ចកម្ពុជា ភ្ជាប់ទំនាក់ទំនង និងស្វែងរកដៃគូពាណិជ្ជកម្ម ។ចំណែកវិស័យសណ្ឋាគារ ភោជនីយដ្ឋាន អ្នកប្រករបរអាជីវករទេសចរណ៍ នឹងទទួលបានចំណូលពីព្រឹត្តិការណ៍នេះ។

កា់ន់តែអស្ចារ្យទៅទៀតនោះ សម្តេចធិបតី ហ៊ុន ម៉ាណែត នាយករដ្ឋមន្ត្រី បានប្រកាសគាំទ្រព្រឹត្តិការណ៍ Gumball 3000 និងបញ្ជាឱ្យអាជ្ញាធរនិងដៃគូពាក់ព័ន្ធកម្ពុជា  សម្របសម្រួល និងចូលរួមក្នុងព្រឹត្តិការណ៍នេះ ព្រមទាំងត្រៀមបដិសណ្ឋារកិច្ចដ៏កក់ក្តៅ និងរាក់ទាក់៕

​