ទំនាក់ទំនងកាទូតរវាងចិន និងអាមេរិកបានធ្លាក់ចុះដល់កម្រិតទាបបំផុតមិនធ្លាប់មានអស់រយៈពេលជាច្រើនឆ្នាំចុងក្រោយនេះ ប៉ុន្តែជំនួបរវាងមេដឹកនាំទាំងពីរកាលពីខែវិច្ឆិកានៅឥណ្ឌូនេស៊ីដែលសង្ឃឹមថានឹងក្លាយទៅជាហ្វ្រាំងជួយកាត់បន្ថយការធ្លាក់ចុះចូលជ្រៅទៅក្នុងជម្លោះរវាងគ្នានោះហាក់ដូចជាមិនសូវទទួលបានប្រសិទ្ធភាពឡើយ។

តបតាមស្មារតីលើកកម្ពស់ទំនាក់ទំនងឡើងវិញដែលអាមេរិកបានរៀបចំផែនការរួចទៅហើយបញ្ជូនមន្ត្រីជាន់ខ្ពស់លោករដ្ឋមន្ត្រីការបរទេសទៅបំពេញទស្សនកិច្ចនាទីក្រុងប៉េកាំងបែរជាត្រូវបានខកខាន និងលុបចោលទៅវិញដោយសារតែបញ្ហាបាឡុងរយៈកំពស់ខ្ពស់មួយរបស់ចិនដែលបានហោះនៅចំពីលើទីតាំងដ៏រស៊ើបរបស់អាមេរិក។

ជាលទ្ធផលដែលមិននឹកស្មានអាមេរិកបានសម្រេចចិត្តប្រើប្រាស់យន្តហោះចម្បាំង F-22 បាញ់ទំលាក់បាឡុងដែលគេជឿជាក់ថាមានទំហំប្រហែលជារថយន្តក្រុងចំនួន៣គ្រឿងនោះចោលនិងបានចោទប្រកាន់ថាជាបាឡុងឈ្លបយកការណ៍សំងាត់របស់រដ្ឋាភិបាលក្រុងប៉េកាំងទៅវិញហើយជាបន្តបន្ទាប់បានបាញ់ទំលាក់វត្ថុមិនអាចកំណត់សំគាល់ផ្សេងទៀតចំនួន៣ផងដែរ។

ជាការឆ្លើយតបចិនបានបញ្ជាក់ហើយថាបាឡុងដែលអាមេរិកបានបាញ់ទំលាក់គឺគ្រាន់តែជាបាឡុងសម្រាប់កិច្ចការងារស្រាវជ្រាវនិងការសិក្សាពីអាកាសធាតុរបស់ក្រុមហ៊ុនឯកជនប៉ុណ្ណោះហើយបានហៅការសម្រេចចិត្តរបស់អាមេរិកគឺជាប្រតិកម្មហួសហេតុពេកទាំងដែលចិនក៏បានចោទប្រកាន់តបទៅអាមេរិកវិញដែរថាបានធ្វើការបង្ហោះបាឡុងស្រដៀងគ្នានេះប្រមាណជា១០ដងមកហើយដែលគិតត្រឹមឆ្នាំ២០២២កន្លងមក។

ទោះបីជាយ៉ាងណាក្តីបញ្ហាបាឡុងនេះមិនមែនជារឿងថ្មីនោះទេពីព្រោះថានៅចិនបច្ចេកវិទ្យាបាឡុងស្រាវជ្រាវរបស់ខ្លួនមានវត្តមានដំបូងតាំងតែពីទសវត្សឆ្នាំ១៩៧០មកម្ល៉េះហើយក៏មិនខុសទៅនឹងបណ្តាប្រទេសផ្សេងទៀតនៅលើពិភពលោកបូករួមទាំងអាមេរិកនិងលោកខាងលិចនោះដែរ។

មួយរយៈពេលជាង៥ទសវត្សរ៍មកនេះបច្ចេកវិទ្យាកាន់តែទំនើបប្រទេសជាច្រើនបានខិតខំបង្កើនសមត្ថភាពសម្រាប់កិច្ចការងារលើការប្រើប្រាស់បាឡុងរយៈកំពស់ខ្ពស់បែបនេះដូចៗគ្នា ប៉ុន្តែក្នុងនោះក៏មានការលើកឡើងពីក្រុមអ្នកជំនាញជាច្រើនផងដែរថាបាឡុងរបស់បណ្តាប្រទេសមហាអំណាចអាចត្រូវបានប្រើប្រាស់ជាឧបករណ៍ដើម្បីស៊ើបយកការណ៍ព័ត៌មានសំងាត់រវាងគ្នាទៅវិញផងដែរ។

ធ្លាប់មានការអះអាងជាច្រើនមកហើយអំពីសមត្ថភាព និងមុខងាររបស់បាឡុងប្រភេទនេះពីសំណាក់ក្រុមអ្នកវិទ្យាសាស្ត្រមកពីបណ្តាប្រទេសនានា។អ្នកជំនាញចិនកាលពីឆ្នាំ២០២១បានបង្ហាញវិដេអូនិងរៀបរាបពីសមត្ថភាពរបស់បាឡុងរយៈកំពស់ខ្ពស់របស់ខ្លួនដែលមិនត្រឹមតែអាចផ្តិតយករូបភាពពីផែនដីបានយ៉ាងច្បាស់នោះទេថែមទាំងអាចថតជាវិដេអូបានទៀតផងហើយប្រើប្រាស់ថវិកាចំណាយសម្រាប់កិច្ចការងារនេះទាបខ្លាំងធៀបទៅនឹងការចំណាយសម្រាប់ការបាញ់បង្ហោះផ្កាយរណប។

មុននោះកាលពីឆ្នាំ២០១៩ ចិនក៏ធ្លាប់បានប្រាប់ដែរថាបាឡុងដែលអភិវឌ្ឍ និងផលិតឡើងដោយសកលវិទ្យា Beihang បានធ្វើការហោះហើរជុំវិញតំបន់អាស៊ីទៅដល់អាហ្វ្រិកនិងទៅដល់អាមេរិកខាងជៀងផងជាមួយនឹងរយៈកំពស់ដល់ទៅ ២០ ០០០ម៉ែត្រ ឬត្រូវជា២០គីឡូម៉ែត្រ។

អ្នកវិទ្យាសាស្ត្រជាច្រើនបានពន្យល់ថាបើប្រៀបធៀបទៅនឹងសមត្ថភាពរបស់ផ្កាយរណប និងអត្ថប្រយោជន៍នោះបាឡុងរយៈកំពស់ខ្ពស់នេះអាចមានប្រសិទ្ធភាពខ្លាំងជាង និងមានតម្លៃធូរថ្លៃជាងហើយស័ក្ដិសមបំផុតសម្រាប់ការតាមដាន និងឃ្លាំមើលដែលមានរយៈពេលវែង។

មិនត្រឹមតែប៉ុណ្ណោះបើប្រើប្រាស់នៅក្នុងវិស័យគ្រប់គ្រងអាកាសធាតុគឺកាន់តែមានភាពច្បាស់លាស់ខ្លាំងដោយសារតែវាអាចពិនិត្យមើលឃើញលំអិតអំពីភូតហេតុធម្មជាតិបានលឿនព្រមទាំងអាចផ្តល់សញ្ញាព្រមានបានឆាប់ជាងផ្កាយរណបផងដែរហើយបន្ថែមជាមួយនឹងបច្ចេកវិទ្យាផ្គត់ផ្គង់អ៊ីនធឺណេតអត់ខ្សែផង។

ចំពោះទស្សនៈផ្ទុយទៅនឹងផលល្អជាវិជ្ជមានវិញអ្នកជំនាញជាច្រើនមើលឃើញថាការប្រើប្រាស់បាឡុងរយៈកំពស់ខ្ពស់អាចត្រូវបានប្រើប្រាស់យ៉ាងទូលំទូលាយដោយមហាអំណាចក្នុងការអង្កេតនិងស៊ើបការណ៍គ្នាទៅវិញទៅមកហើយប្រើប្រាស់ដើម្បីកសាង និងអភិវឌ្ឍបច្ចេកវិទ្យាអាវុធដែលអាចនឹងប្រើប្រាស់នៅក្នុងសង្គ្រាមអាកាស និងអវកាសនាពេលខាងមុខដែលក្នុងនោះមានដូចជាសកម្មភាពប្រើប្រាស់សម្រាប់កិច្ចការងារតេស្តសាកល្បងមីស៊ីល និងយន្តហោះចម្បាំងជាដើមផង៕