ខេត្ត​ព្រះ​សីហ​នុ​ ៖ «ប្រសិនបើយើងមិនមានប្រព័ន្ធគ្រប់គ្រងច្បាស់លាស់នោះទេ ធនធានជលផលរបស់យើងនឹងទទួលរងផលប៉ះពាល់ពីការនេសាទជ្រុល ឬលើស ដែលអាចធ្វើឱ្យជីវភាពរបស់អ្នកនេសាទជួបបញ្ហាប្រឈម»។ នេះបើតាមការលើកឡើងរបស់ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។

នៅក្នុងកម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន (ផ្នែកនេសាទ)ការពង្រឹងលើការងារគ្រប់គ្រងជលផលសមុទ្រ និងតំបន់ឆ្នេរដោយប្រើប្រាស់ប្រព័ន្ធឌីជីថលដើម្បីតាមដាន ត្រួតពិនិត្យ គ្រប់គ្រង និងឃ្លាំមើល កាលពីពេលថ្មីៗនេះនៅខេត្តព្រះសីហនុ ឯកឧត្តម ប្រាក់ ដាវីដ បានមានប្រសាសន៍ថា ៖

«តាមរយៈជំនួយថវិកាពីសហភាពអឺរ៉ុប ពួកគាត់ចង់ដឹងថាតើត្រី និងផលនេសាទរបស់យើង​ដែលចេញពីសមុទ្រទៅដល់ទីផ្សារអឺរ៉ុប គឺមានប្រភពមកពីណា តើការនេសាទស្របច្បាប់ ឬយ៉ាងណា? ដូចនេះ ការងារដែលយើងបាន និងកំពុងធ្វើនានេះគឺឆ្លើយតបតែមួយគត់ ធ្វើយ៉ាងណាឱ្យបានដឹងថា ផលនេសាទចេញទៅទីណា ស្របច្បាប់ត្រឹមត្រូវ ហើយទៅដល់ទៅទីផ្សារណាខ្លះ ។ ការធ្វើទំនើបកម្មប្រព័ន្ធតាមដានទូកនេសាទ (VMS) គឺជាកិច្ចការសំខាន់សម្រាប់ការគ្រប់គ្រង ធនធានជលផលសមុទ្រ និងតំបន់ឆ្នេរ»។

ឯកឧត្តមបានសង្កត់ធ្ងន់ថា ៖

«កាលពីមុន ពេលទូកនេសាទចេញពីកំពង់ផែ គឺយើងមិនអាចដឹងថាទូកនេសាទនោះទៅដល់ណា និងធ្វើសកម្មភាពនេសាទនៅកន្លែងណាទេ។ ប៉ុន្តែពេលនេះ តាមរយៈប្រព័ន្ធតាមដានទូកនេសាទ គឺយើងអាចទទួលព័ត៌មានទាន់ពេលវេលាអំពីទីតាំង ល្បឿន និងទិសដៅរបស់ទូកនេសាទ ដែលអាចជួយឲ្យយើងគ្រប់គ្រង ត្រួតពិនិត្យការនេសាទកាន់តែមាន ប្រសិទ្ធភាព»។

ឯកឧត្តមរដ្ឋលេខាធិការបានបញ្ជាក់ថា៖ ប្រព័ន្ធតាមដានទូកនេសាទនេះ វាមិនមែនប្រើប្រាស់សម្រាប់តែការគ្រប់គ្រងត្រួតពិនិត្យការនេសាទប៉ុណ្ណោះទេ ប៉ុន្តែវាមានតួនាទីសំខាន់ណាស់សម្រាប់ជួយការពារសុវត្ថិភាពប្រជានេសាទ។ ប្រព័ន្ធនេះ អនុញ្ញាតឲ្យប្រាស្រ័យទាក់ទងគ្នាបាន ហើយអាជ្ញាធរអាចជូនដំណឹងទាន់ពេលវេលាដល់អ្នកនេសាទក្នុងករណីមានហានិភ័យ ឬគ្រោះថ្នាក់ ធានាថា ការជួយសង្គ្រោះអាចធ្វើឡើងបានទាន់ពេលវេលា ឬក៏ជូនដំណឹងដល់បងប្អូនប្រជានេសាទថាគាត់បានចូលខិតទៅដល់តំបន់អភិរក្ស តំបន់ហាមឃាត់ការធ្វើនេសាទ តំបន់ព្រំដែនជាដើម។ល។

លោក ស្រ៊ុ​ន លឹ​ម​សុង អនុប្រធាន​រដ្ឋបាល​ជន​ផលបានឱ្យ​ដឹង​ថា ​៖

«​ប្រព័ន្ធ VMS ​បង្កើត​ទិន្នន័យ​ដែល​បង្ហាញពី​សកម្មភាព​នេសាទ​នៅ​ក្នុង​តំបន់​ជាក់លាក់​ណាមួយ ហើយ​ព័ត៌មាន​នេះ​អាច​ត្រូវ​បាន​ប្រើប្រាស់​ដើម្បី​គ្រប់គ្រង​ជលផល តាម​លក្ខណៈ​បច្ចេកទេស​ប្រសើរ​ជាង​មុន ដោយ​សមត្ថភាព​នេសាទ អាច​ត្រូវ​បាន​គ្រប់គ្រង​ឱ្យ​សម​ស្របទៅ​នឹង​បរិមាណ​ផល​ស្តុកក្នុង​ធម្មជាតិ​ ក្នុង​តំបន់​នីមួយ​ៗ។ ឧបករណ៍អាចបញ្ជាក់​ឱ្យដឹងថា​ នាវា​នេសាទនៅ​ចំណុច​ណាក្នុង​ករណី​មាន​គ្រោះថ្នាក់​ណាមួយ និង​ជួយ​បង្កើន​ឱកាស​ក្នុង​ការ​ស្វែងរក​នាវា​ទាំងនោះបាន​លឿន​ទាន់​ពេលវេលា»​ ។

បន្ថែមលើប្រព័ន្ធតាមដានទូកនេសាទ ក៏មានប្រព័ន្ធផ្សេងៗទៀត រួមមានប្រព័ន្ធគ្រប់គ្រងព័ត៌មាននេសាទ ប្រព័ន្ធចុះល្បាតដោយប្រើប្រាស់កម្មវិធីស្មាត(SMART) និងប្រព័ន្ធស្ថិតិ FishStat សម្រាប់ការរាយការ​ណ៍ និងការវិភាគអំពីផលនេសាទ។ ប្រព័ន្ធទាំងនេះ ជួយដល់ការសម្រេចចិត្ត ដោយផ្អែកលើមូលដ្ឋានទិន្ន័យ និងវិទ្យាសាស្ត្រក្នុងការគ្រប់គ្រង និងអភិរក្សធនធានជលផលដើម្បី ធានាបាននិរន្តរភាពផលនេសាទសម្រាប់ជំនាន់យើងក៏ដូចជាកូនចៅជំនាន់ក្រោយ។

លោក Koen Everaert  លេខាទី១ និងជាអនុប្រធានកិច្ចសហប្រតិបត្តិការសហភាពអឺរ៉ុប បានបញ្ជាក់ថា កម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន (ហៅកាត់ថាកម្មវិធី CAPFISH) មានផ្នែកនេសាទ និងផ្នែកវារីវប្បកម្ម។ សម្រាប់ផ្នែកវារីវប្បកម្ម គឺអនុវត្តក្នុង១០ខេត្ត គោលដៅ ហើយអនុវត្តដោយរដ្ឋបាលជលផល និងទីភ្នាក់ងារអភិវឌ្ឍន៍បារាំង។ នាថ្ងៃនេះ ក្រុមការងារបានឈានមកដល់ដំណាក់កាលដ៏សំខាន់មួយទៀត គឺការប្រគល់ជូនមន្ទីរពិសោធន៍ចល័តផ្នែកសុខភាព វារីសត្វ ដល់រដ្ឋបាលជលផល ដែលជាការចូលរួមក្នុងការពង្រឹងសមត្ថភាពជាតិក្នុងកិច្ចការពារ និង គ្រប់គ្រងជំងឺវារីសត្វ និងគាំទ្រការអភិវឌ្ឍន៍វារីវប្បកម្មនៅកម្ពុជា។

លោកស្រី រេ​បេ​កា ប៊ែ​ល តំណាង​អង្គការ FAO ប្រចាំ​នៅ​កម្ពុជា បាន​បន្ថែម​ថា​ ៖

«​ការងារ​យើង​គឺ​គ្រប់គ្រង​ទៅ​លើ​ចំនួន​អ្នកនេសាទ សកម្មភាព​នេសាទ ធ្វើ​យ៉ាងណា​ធានា​បាន​នូវ​ធនធាន​របស់​យើង​មាន​និរន្ត​ភាព​ ។ ​ពាក់ព័ន្ធ​នឹង VMS គឺជា​ការ​រួមចំណែក​មួយ​យ៉ាង​សំខាន់​ក្នុង​ការ​គ្រប់គ្រង​និង​ជួយ​ដល់​ការងារ​របស់​ក្រសួងនិង​ជួយ​ដល់​ធនធាន​មានការ​ប្រសើរ​ឡើង​វិញនិង​ពាក់ព័ន្ធ​ជីវភាព​ប្រជាជន និង​ពិសេស​គឺ​សុវត្ថិភាព​ប្រជា​នេសាទ​លើ​ផ្ទៃសមុទ្រ​ ។ នៅ​ពេល​ដែល​សកម្មភាព​នេសាទ​ប្រសើរ​ឡើង ប្រជា​នេសាទ​ក៏​នឹង​អាច​មាន​ប្រាក់​ចំណូល​ប្រសើរ​ឡើង​ដែរ »​។

ឯកឧត្តម នៃ គង់ អភិបាលរងខេត្តព្រះសីហនុ បានមានប្រសាសន៍ថា៖ រដ្ឋបាលខេត្ត គាំទ្រចំពោះការប្រើឧបករណ៍តាមដានទូកនេសាទដែលរួមមានឧបករណ៍តាមដាន និងរាយការណ៍តាមលំហ (SMART), ឧបករណ៍ Kobo Toolbox ដែលជាកម្មវិធីប្រភពបើកចំហ ប្រើសម្រាប់ការតាមដានផលចាប់ និងការគ្រប់គ្រងទិន្នន័យខ្សែចង្វាក់ តម្លៃជលផល និងប្រព័ន្ធគ្រប់គ្រងនាវា (VMS) ដែលជាប្រព័ន្ធគ្រប់គ្រងតាមផ្កាយរណប និងផ្តល់ ទិន្នន័យទីតាំងនាវាល្បឿន និងទិសដៅ ពេលវេលាជាក់ស្តែង មានសារៈសំខាន់សម្រាប់ការគ្រប់គ្រងការ នេសាទ និងពង្រីកការគ្រប់គ្រងលើសពីដែនទឹកជាតិ ដែលអាចបំពេញបន្ថែមជួយដល់ការបង្កើត គោលការណ៍ណែនាំស្តង់ដាប្រតិបត្តិការ (SOPs) និងជួយសម្រួលដល់ការកសាងផែនការរួម អភិវឌ្ឍសមត្ថភាពបុគ្គលិក ប្រតិបត្តិការ ត្រួតពិនិត្យ វិភាគ រាយការណ៍ តម្លាភាព ប្រសិទ្ធភាព និងចីរភាពភាព ក្នុងការគ្រប់គ្រងធនធានជលផល។

ឯកឧត្តមអភិបាលខេត្ត បានលើកឡើងថា៖ កម្មវិធី CAPFISH ជាផ្នែកមួយដ៏សំខាន់ក្នុងចំណោមគម្រោងនានា ដើម្បីធានាការគ្រប់គ្រងធនធានជលផល ការអភិរក្ស ជីវៈចម្រុះ ព្រៃកោងកាង ស្មៅសមុទ្រ ផ្កាថ្ម ការបង្កើនភាព បៃតង ការបន្សំនឹងការប្រែប្រួលអាកាសធាតុ និងកិច្ចការជាច្រើនទៀតដែលធានាដល់ការងារគ្រប់គ្រងជលផល៕