សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ ក្នុងគោលបំណងជំរុញ និងទាក់ទាញទេសចរជាតិ- អន្តរជាតិ ជាពិសេសលើកកម្ពស់សោភ័ណភាពឱ្យកាន់តែមានភាពល្អប្រសើរ រដ្ឋបាលខេត្តកំពតបានបង្ហាញពីផែនការនៃការបង្កើតឱ្យមានឆ្នេរកម្សាន្តនៅជាប់មាត់ព្រែកកំពង់បាយ ដែលទីតាំងទី១ស្ថិតនៅចន្លោះពីស្ពានចាស់-ស្ពានថ្មី ហើយទីតាំងឆ្នេរទី២ ស្ថិតនៅចន្លោះពីស្ពានថ្មី-ស្ពានរថភ្លើង។
ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពតបានលើកឡើងថា រដ្ឋបាលខេត្តបាន និងកំពុងអនុវត្តគម្រោងកែលម្អសោភ័ណភាពក្រុងជាច្រើនទីតាំង ដោយក្នុងនោះរួមមានដូចជា គម្រោងបង្កើតឆ្នេរខ្សាច់កម្សាន្តថ្មីចំនួន២កន្លែងបន្ថែមទៀត ទី១ គឺឆ្នេរខ្សាច់ចន្លោះស្ពានចាស់ និងស្ពាន់ថ្មី និងទី២ ឆ្នេរខ្សាច់ចន្លោះស្ពានថ្មី និងស្ពានរថភ្លើង ដែលការរៀបចំគឺមានក្រាលការ៉ូម៉ាបតាមសួនច្បារដងព្រែកកំពង់បាយ, ការសាងសង់រូបសេះសមុទ្របាញ់ទឹកនៅវេរ៉ងដាខាងមុខសាលាខេត្តចាស់, ការកែសម្រួលទីលានកីឡាលើទឹកមកជាសួនច្បារ ការរៀបចំសណ្តាប់ធ្នាប់សំណង់នៅតាមមាត់បណ្តោយព្រែកត្រើយខាងលិច ដើម្បីបង្កើតផ្លូវ និងសួនច្បារសាធារណៈនៅទល់មុខវត្តត្រើយកោះជាដើម។
ឯកឧត្តមអភិបាលខេត្តបានបន្តថា ៖ «បច្ចុប្បន្ននេះ រដ្ឋបាលខេត្តកំពតនឹងដាក់ឱ្យអនុវត្តគម្រោងកែលម្អសោភ័ណភាពបន្ថែមទៀត គឺពង្រីកសួនច្បារត្រង់ចំណុចកីឡាលើទឹក (បរិវេណហាត់ប្រាណ) ឱ្យកាន់តែធំទូលាយ ដើម្បីឱ្យព្រែកកំពង់បាយមានរាងរៅស្អាត ហើយឆ្នេរខាងលិចព្រែកទល់មុខគ្នា ក៏ត្រូវរៀបចំឈូសឆាយដីព្រៃ កុំឱ្យបាំងទេសភាពព្រែក និងស្ពានត្រើយកោះ ពេលធ្វើរួចត្រូវបំពាក់ភ្លើង និងមានចងទង់ជាតិ ទង់ជ្វាលាផងដែរ»។
ឯកឧត្តម ម៉ៅ ធនិន បានបញ្ជាក់ថា ឥឡូវសួនមាត់ព្រែកក្នុងក្រុងកំពតស្អាត ប៉ុន្តែនៅពេលដែលគម្រោងកែលម្អដែលបានរៀបរាប់ខាងលើធ្វើចប់ ក្រុងកំពតនឹងផ្លាស់ប្តូរមុខមាត់ថ្មី ស្អាត ហើយទាក់ទាញបំផុត គឺពិតជាស័ក្តិសមជាក្រុងទទួលបានពានរង្វាន់ទីក្រុងទេសចរណ៍ស្អាតអាស៊ាន ដែលរដ្ឋបានខេត្តនឹងធ្វើពិធីដង្ហែនៅថ្ងៃទី១៥ ខែកុម្ភៈ ឆ្នាំ២០២៤ ខាងមុខនេះ។
ជាមួយគ្នានេះ ឯកឧត្តមអភិបាលខេត្តក៏បានលើកឡើងអំពីគម្រោងបង្កើតឆ្នេរខ្សាច់កម្សាន្តមាត់សមុទ្រ និងគម្រោងស្ថាបនាស្ពានឆ្លងព្រែកកំពង់បាយមួយបន្ថែមទៀតផងដែរ ដើម្បីបញ្ចៀសការកក់ស្ទះចរាចរណ៍។
គួរបញ្ជាក់ដែរថា ក្នុងរយៈពេល ៣ថ្ងៃនៃពិធីបុណ្យចូលឆ្នាំប្រពៃណីជនជាតិចិន-វៀតណាម គិតចាប់ពីថ្ងៃទី៩ រហូតដល់ថ្ងៃទី១១ ខែកុម្ភៈ ឆ្នាំ២០២៤ ខេត្តកំពតទទួលបានភ្ញៀវទេសចរជាតិ និងអន្តរជាតិប្រមាណ ៦៤ ៥២៨នាក់ កើនឡើង ០.៤១% ធៀបនឹងរយៈពេលដូចគ្នាឆ្នាំ២០២៣ ដែលក្នុងនោះភ្ញៀវទេសចរជាតិចំនួន ៦២ ៩០៥នាក់ និងភ្ញៀវទេសចរណ៍អន្តរជាតិចំនួន ១ ៦២៣នាក់។ នេះបើតាមការឱ្យដឹងពីសំណាក់លោក សយ ស៊ីណុល ប្រធានមន្ទីរទេសចរណ៍ខេត្តកំពត៕
Account
Security
Favourite Content