សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា ទីភ្នាក់ងារអវកាសអាម៉េរិក Nasa បានរារាំងពលរដ្ឋចិនពីការចូលធ្វើការនៅក្នុងមជ្ឈមណ្ឌលស្រាវជ្រាវអវកាសរបស់ខ្លួន បើទោះបីជាពួកគេមានទិដ្ឋាការអាម៉េរិកដែលមានសុពលភាពក៏ដោយ។
ថ្មីៗនេះ ជនជាតិចិនដែលធ្វើការនៅ Nasa ក្នុងនាមជាអ្នកស្រាវជ្រាវ ឬនិស្សិតដែលរួមចំណែកក្នុងការស្រាវជ្រាវបានឱ្យដឹងថា ពួកគេបានបាត់បង់សិទ្ធិចូលប្រើប្រាស់ប្រព័ន្ធ និងគ្រឿងបរិក្ខារទាំងអស់របស់ទីភ្នាក់ងារអវកាស ព្រមទាំងហាមឃាត់មិនឱ្យចូលរួមក្នុងកិច្ចប្រជុំថែមទៀតផង។ NASA បានបញ្ជាក់ថា ជនជាតិចិននឹងត្រូវបានរឹតបន្តឹងក្នុងការប្រើប្រាស់សម្ភារៈបរិក្ខារ និងបណ្តាញរបស់ទីភ្នាក់ងារ ដើម្បីធានាសុវត្ថិភាពការងាររបស់ខ្លួន។ មិនត្រឹមតែប៉ុណ្ណោះ អវកាសយានិកចិនធ្លាប់ត្រូវបានដកចេញពីស្ថានីយ៍អវកាសអន្តរជាតិ (ISS) ពីព្រោះទីក្រុងវ៉ាស៊ីនតោនបានរារាំង NASA ពីការចែករំលែកទិន្នន័យរបស់ខ្លួនជាមួយប្រទេសចិន។ ការរឹតបន្តឹងចុងក្រោយបំផុតពី NASA នឹងជំរុញឲ្យកិច្ចសហការផ្នែកវិទ្យាសាស្ត្ររវាងភាគីទាំងពីរកាន់តែតានតឹងដោយសារតែការព្រួយបារម្ភអំពីសន្តិសុខជាតិ។ ការរឺកចម្រើនរបស់ចិននៅក្នុងកម្មវិធីអវកាសកំពុងបង្កជាការព្រួយបារម្ភសម្រាប់អាម៉េរិក និងធ្វើឲ្យមានការប្រកួតប្រជែងកាន់តែខ្លាំងឡើងរវាងមហាអំណាចទាំងពីរ ហើយក៏បានបង្កើនការប្រុងប្រយ័ត្នចំពោះគ្នាទៅវិញទៅមកផងដែរ។
មិនត្រឹមតែប៉ុណ្ណោះ ការរឹតបន្តឹងនេះធ្វើឱ្យនិស្សិតចិនមួយចំនួនកាន់តែពិបាកក្នុងការទទួលបានទិដ្ឋាការអាម៉េរិក ជាពិសេសអ្នកដែលសិក្សាផ្នែកវិទ្យាសាស្ត្រ និងបច្ចេកវិទ្យា។ យ៉ាងណាមិញ គេមិនទាន់ដឹងច្បាស់ថា តើ NASA ផ្តល់ដំណឹងដល់ជនជាតិចិនដែលកំពុងធ្វើការឱ្យទីភ្នាក់ងារនេះប៉ុន្មាននាក់ទេ? លេខាធិការសារព័ត៌មានរបស់ Nasa លោក Bethany Stevens លើកឡើងថា Nasa ពិតជាបានចាត់វិធានការផ្ទៃក្នុងពាក់ព័ន្ធនឹងជនជាតិចិនពិតមែនរួមមាន ការដាក់កម្រិតលើការចូលប្រើប្រាស់ផ្នែករូបវន្ត និងរឹតបន្តឹងសន្តិសុខតាមអ៊ីនធឺណិត។ លោក Sean Duffy អ្នកគ្រប់គ្រងស្តីទីរបស់ NASA លើកឡើងថា ចិនកំពុងចង់ទៅឋានព្រះច័ន្ទមុនពួកគេ ប៉ុន្តែវានឹងមិនអាចកើតឡើងនោះទេ។
កាលពីសប្តាហ៍មុន សមាជិកសភារបស់អាម៉េរិកបានសង្កត់ធ្ងន់លើតម្រូវការចំបាច់ដែលអាម៉េរិកត្រូវទៅដល់ឋានព្រះច័ន្ទមុនប្រទេសចិន។ លោក Ted Cruz សមាជិកព្រឹទ្ធសភា លើកឡើងថា ប្រសិនបើសត្រូវរបស់អាម៉េរិកសម្រេចបាននូវសមត្ថភាពក្នុងលំហដ៏លេចធ្លោ នោះវានឹងបង្កហានិភ័យយ៉ាងខ្លាំងដល់ខ្លួន។ ការប្រណាំងមិនមែនគ្រាន់តែជាការទៅដល់ឋានព្រះច័ន្ទប៉ុណ្ណោះទេ ប៉ុន្តែក៏ប្រកួតប្រជែងគ្នាក្នុងការក្លាយជាអ្នកគ្រប់គ្រងធនធានរបស់វាផងដែរ ខណៈដែលព្រះច័ន្ទមានសារធាតុរ៉ែកម្រដូចជា ដែក ទីតាញ៉ូម និងអេលីយ៉ូមជាដើម ដែលមានសារៈសំខាន់នៅក្នុងឧបករណ៍បញ្ជូនថាមពលខ្ពស់រហូតដល់ឧបករណ៍វេជ្ជសាស្ត្រ៕
Account
Security
Favourite Content