ភ្នំពេញ ៖ មជ្ឈមណ្ឌលបណ្តុះធុរកិច្ចថ្មី “តេជោ” បានបង្កើតកម្មវិធីពន្លឿនអាជីវកម្មថ្នាលឌីជីថលក្នុងគោលបំណងចូលរួមជាមួយចក្ខុវិស័យរបស់រាជរដ្ឋាភិបាលក្នុងការបណ្តុះធុរកិច្ចថ្មី( Start Up) ឱ្យក្លាយទៅជាក្រុមហ៊ុនដែលអាចផ្តល់នូវសេវា និងផលិតផលថ្មីៗជូនប្រជាពល​រដ្ឋ​ឱ្យកាន់តែប្រសើរឡើង។ នៅពេលដែលក្រុមហ៊ុន Start Up ក្លាយជាក្រុមហ៊ុនធំ រីកលូតលាស់ នឹងជួយកសាងសេដ្ឋកិច្ចកម្ពុជាឱ្យកាន់តែរីកចម្រើន។

ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ” បានលើកឡើងដូច្នេះនៅក្នុងកម្មវិធីពន្លឿនអាជីវកម្មថ្នាលឌីជីថលរដូវកាលទី៣ កាលពីរសៀលថ្ងៃទី២៦ខែមិថុនា នៅរាជធានីភ្នំពេញ។

ឯកឧត្តមបណ្ឌិតនាយកប្រតិបត្តិ បានមានប្រសាសន៍ទៀតថា ៖ មជ្ឈមណ្ឌលបណ្តុះអាជីវកម្មថ្មីតេជោ បានបង្កើតកកម្មវិធីពន្លឿនអាជីវកម្ម ផ្តោតទៅលើធុរកិច្ចថ្មីប្រភេទឌីជីថល ។ខាងមជ្ឈមណ្ឌល ផ្តល់ជាប្រាក់រង្វាន់ដើម្បីលើកទឹកចិត្តដល់ការខិតខំប្រឹងប្រែងចំណាយពេលអស់រយៈពេលជាង២០សប្តាហ៍ ដើម្បីយកធ្វើជាទុនបឋមយកផលិតផលរបស់គាត់ដែលបានបង្កើតដាក់ទៅក្នុងទីផ្សារនិងកែសម្រួលផលិតផលគាត់ឱ្យកាន់តែប្រសើរនិងត្រូវនឹងទីផ្សារ។ មជ្ឈមណ្ឌលនៅតែបន្តព្យាយាមគាំទ្រពួកគាត់ទាំងស្មារតី ថវិកា ព្រមទាំងផ្គូផ្គងជាមួយអាជិវកម្ម ឬវិនិយោគិនផ្សេងៗ។

ឯកឧត្តមបានបញ្ជាក់ថា៖

«រហូតមកដល់ពេលនេះ មជ្ឈមណ្ឌលបានបណ្តុះបណ្តាល start up ប្រមាណ១០ក្នុង១ឆ្នាំ។ តាំងពីការរៀបចំកម្មវិធីពន្លឿនអាជីវកម្មថ្នាលឌីជីថល៤ឆ្នាំមក មានធុរកិច្ចថ្មី ប្រមាណ៤០ ដែលក្លាយទៅជាធុរកិច្ចថ្មី ហើយក្លាយជាក្រុមហ៊ុន និងកំពុងធ្វើអាជីវកម្មក្នុងពេលបច្ចុប្បន្ន»។

គួរជម្រាបថានាថ្ងៃទី ២៦ ខែ មិថុនា ឆ្នាំ ២០២៤ មជ្ឈមណ្ឌលបណ្ដុះធុរកិច្ចថ្មី“តេជោ” បានរៀបចំ«ថ្ងៃបទបង្ហាញសាធារណៈ» ដែលជាវគ្គចុងក្រោយនៃកម្មវិធីពន្លឿនអាជីវកម្មថ្នាលឌីជីថលរដូវកាលទី ៣ ក្រោមអធិបតីភាព ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ” ព្រមជាមួយការចូលរួមពីសំណាក់ កញ្ញា Chin Aster ដែលជាប្រធានផ្នែកទំនាក់ទំនងសារធារណៈនៃសហគ្រិនខ្មែរ, លោកស្រី ធាម រមណីយ ដែលជានាយិកាទំនាក់ទំនងគូភាគី – ប្រធានគ្រប់គ្រងតំបន់នៃធនាគារ ABA, និង ស្ថាប័នដៃគូជាច្រើនទៀតផងដែរ។

កម្មវិធីពន្លឿនអាជីវកម្មថ្នាលឌីជីថលរដូវកាលទី ៣ គឺជាកម្មវិធីគាំទ្រដល់ធុរកិច្ចថ្មីដែលអាចបង្កើត និង ផ្ដល់ជាថ្នាលឌីជីថល ឬ ដំណោះស្រាយបែបឌីជីថលប្រកបដោយនវានុវត្តន៍ឆ្លើយតបនឹងតម្រូវការទីផ្សារ។កម្មវិធីនេះត្រូវបានរៀបចំក្នុងរយៈពេល១៤សប្ដាហ៍ និង បែងចែកជា ៣ ដំណាក់កាលរួមមាន៖ វគ្គជំរុំចាប់ផ្តើម (Bootcamp), វគ្គពន្លឿនអាជីវកម្ម (Acceleration), និង ថ្ងៃបទបង្ហាញសាធារណៈ (Demo Day)។

កម្មវិធីបានទទួលពាក្យស្នើសុំពីបេក្ខជនចំនួន ៧០ ក្រុមប៉ុន្តែក្រោយការសម្រាំង និង ឆ្លងកាត់ ៣ ដំណាក់កាលរួចមក កម្មវិធីបានរកឃើញធុរកិច្ចឆ្នើមចំនួន ៥ រួមមាន Golden Spiral Co., Ltd.,Mainichi Digital, Polymer Invoice, Scholarar​, និង Zippy Express ដែលអាចឈានបន្តទៅកាន់«ថ្ងៃបទបង្ហាញសាធារណៈ»ដែលជាវគ្គផ្តាច់ព្រ័ត្រនៃកម្មវិធីពន្លឿនអាជីវកម្មថ្នាលឌីជីថលរដូវកាលទី៣។

ទន្ទឹមនឹងនេះ កម្មវិធីក៏បានផ្តល់ជូនទុនវិនិយោគដែលមិនយកភាគហ៊ុន (Equity-free Inves​tm​e​nts) សរុបចំនួន ១២៨ លានរៀលដល់ធុរកិច្ចថ្មីឆ្នើមទាំង ៥ ក្រុមដោយក្រុមនីមួយៗទទួលបានប្រាក់វិនិយោគចំនួន ២០ លានរៀល។ យ៉ាងណាមិញ តាមរយៈការធ្វើបទបង្ហាញអំពីអាជីវកម្មនៅក្នុងវគ្គផ្តាច់ព្រ័ត្រ,គណៈកម្មការបានសម្រេចផ្តល់នាម “Top Performance” ទៅកាន់ក្រុម Polymer Invoice ជាមួយនឹងទឹកប្រាក់២០លានរៀលនិងនាម“Most Colla​bo​ra​ti​v​e​” ទៅកាន់ Scholarar ជាមួយនឹងទឹកប្រាក់ ៨ លានរៀលផងដែរ។

ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ” បានមានប្រសាសន៍ថា៖

«សមិទ្ធផលនៃកម្មវិធីពន្លឿនអាជីវកម្មថ្នាលឌីជីថលនឹងជួយលើកស្ទួយសេដ្ឋកិច្ចជាតិ តាមរយៈការជ្រោមជ្រែងធុរកិច្ចថ្មីដែលមានសក្តានុពលខ្ពស់នៅប្រព័ន្ធអេកូឡូស៊ីធុរកិច្ចថ្មីក្នុងកម្ពុជាឱ្យកាន់តែប្រសើរឡើងមួយកម្រិតទៀត។ មជ្ឈមណ្ឌល ក៏នៅតែប្តេជ្ញាចិត្តក្នុងការអភិវឌ្ឍទិដ្ឋភាពនៃធុរកិច្ចថ្មីក្នុងស្រុកតាមរយៈកម្មវិធីពន្លឿនអាជីវកម្ម, កម្មវិធីសហគមន៍ ឬ ក៏ផ្តួចផ្តើមសកម្មភាពថ្មីៗបន្ថែមទៀតដើម្បីបន្តការបណ្ដុះបណ្ដាលធនធានទេពកោសល្យ និង បណ្តុះស្មារតីសហគ្រិនបន្ថែមទៀតផងដែរ»។

គួរបញ្ជាក់ផងដែរថា កម្មវិធីពន្លឿនអាជីវកម្មថ្នាលឌីជីថលរដូវកាលទី៣ ត្រូវបានរៀបចំដោយ ក្រសួងសេដ្ឋកិច្ច និងហិរញ្ញវត្ថុ និង មជ្ឈមណ្ឌលបណ្ដុះធុរកិច្ចថ្មី “តេជោ”, ដោយមានការសហការរៀបចំកម្មវិធីដោយ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ រួមជាមួយនឹងសហគ្រិនខ្មែរ ៕