បរទេស ៖ យោងតាមប្រភពពី Techovedas បានលើកឡើងថា semiconductor ឬ បន្ទះឈីប គឺជាឆ្អឹងខ្នងនៃឧស្សាហកម្មបច្ចេកវិទ្យាទំនើប និងជាធាតុផ្សំមូលដ្ឋាននៃឧបករណ៍អេឡិចត្រូនិកទំនើបៗ ដូចជា ស្មាតហ្វូន ទូរទស្សន៍ កុំព្យូទ័រ រថយន្ត និងគ្រឿងម៉ាស៊ីនឧស្សាហកម្ម។

បច្ចុប្បន្ននេះ ពិភពលោកកាន់តែពឹងផ្អែកលើវិស័យបច្ចេកវិទ្យា ហើយបន្ទះឈីបកាន់តែមានសារៈសំខាន់នៅក្នុងវិស័យនេះ។ យ៉ាងណាក៏ដោយ ទោះបីជាវិស័យ semiconductor រីកចម្រើនយ៉ាងឆាប់រហ័សក៏ដោយ ប៉ុន្តែវិស័យនេះត្រូវបានគ្រប់គ្រងដោយប្រទេសមួយចំនួនតូចប៉ុណ្ណោះ។  ខាងក្រោមនេះគឺជាប្រទេសកំពូលទាំង៥ ដែលផលិត semiconductor ច្រើនបំផុត ៖

១. តៃវ៉ាន់៖ តៃវ៉ាន់ត្រូវបានគេអោយឈ្មោះថាជា Powerhouse ឬ ប្រទេសដែលមានឥទ្ធិពលខាងផលិតកម្មបន្ទះឈីប ហើយភាពជោគជ័យនេះត្រូវបានជំរុញដោយក្រុមហ៊ុន Taiwan Semiconductor Manufacturing Co. (TSMC) ។ យោងតាមសមាគមឧស្សាហកម្ម Semiconductor (SEMI) បានឲ្យដឹងថា តៃវ៉ាន់មានចំណែក ៦០ ភាគរយនៃសមត្ថភាពផលិតបន្ទះឈីបសកល ដែលជាសមត្ថភាពក្នុងការផលិតគ្រឿងអេឡិចត្រូនិក។ មិនត្រឹមតែប៉ុណ្ណោះ ក្រុមហ៊ុន​ TSMC តែឯងផលិតប្រហែលពាក់កណ្តាលនៃ semiconductors របស់ពិភពលោក។ ជាមួយនឹងសមត្ថភាពផលិតដ៏ខ្លាំងខ្លានេះ តៃវ៉ាន់បានក្លាយខ្លួនជាអ្នកដឹកនាំខាងផ្នែកបច្ចេកវិទ្យាសកល និងភាពជាដៃគូយុទ្ធសាស្ត្រជាមួយក្រុមហ៊ុនបច្ចេកវិទ្យាធំៗដូចជា Apple, AMD និង Nvidia ផងដែរ។

២. កូរ៉េខាងត្បូង៖ កូរ៉េខាងត្បូងគឺជាមហាអំណាចមួយទៀតនៅអាស៊ីក្នុងវិស័យ Semiconductor ជាមួយនឹងចំណែកប្រហែល ១៥ ទៅ ២០ ភាគរយនៃសមត្ថភាពផលិតសកល។ ទន្ទឹមនឹងនេះ ក្រុមហ៊ុនបច្ចេកវិទ្យាយក្សរបស់កូរ៉េខាងត្បូង Samsung គឺជាតួអង្គសំខាន់នៅសម្រាប់វិស័យនេះ ទាំងការរចនា ទាំងការផលិតបន្ទះឈីបផ្ទាល់ខ្លួនរបស់ពួកគេ និងសម្រាប់ក្រុមហ៊ុនផ្សេងទៀតផងដែរ។ លើសពីនេះ តួអង្គសំខាន់ៗផ្សេងទៀតដូចជា SK Hynix ក៏ជាចំណែកសំខាន់មួយនៃការនាំចេញមបន្ទះឈីបរបស់កូរ៉េខាងត្បូងផងដែរ។ ការនាំចេញមបន្ទះឈីប គឺជាផ្នែកដ៏សំខាន់នៃសេដ្ឋកិច្ចរបស់កូរ៉េខាងត្បូង ដែលគូសបញ្ជាក់ពីសារៈសំខាន់របស់ប្រទេសនេះនៅលើឆាកពិភពលោក។

៣. ជប៉ុន៖ ជប៉ុនគឺជាមជ្ឈមណ្ឌលបច្ចេកវិទ្យាដ៏សម្បូរបែបមួយរបស់ពិភពលោក ហើយត្រូវបានគេស្គាល់ថាមានការច្នៃប្រឌិតបច្ចេកវិទ្យារបស់ខ្លួន និងមានរោងចក្រផលិតគ្រឿងអេឡិចត្រូនិកជាងមួយរយ ដែលរួមចំណែកដល់ភាពចម្រុះនិងភាពធន់របស់ឧស្សាហកម្មនេះ។ យ៉ាងណាមិញ ជប៉ុនបានធ្លាក់ចុះនៃចំណែកផលិតកម្មមបន្ទះឈីបសកលប្រហែល ១០ ដល់ ១៣ ភាគរយក្នុងប៉ុន្មានឆ្នាំថ្មីនេះៗ ប៉ុន្តែក្រុមហ៊ុនជប៉ុនដូចជា Sony និង Renesas នៅតែជាអ្នករួមចំណែកដ៏សំខាន់សម្រាប់វិស័យបន្ទះឈីប។ ស្របពេលដែលអាមេរិក និងកោះតៃវ៉ាន់កំពុងគ្របដណ្តប់លើវិស័យ semiconductor រដ្ឋាភិបាលជប៉ុនកំពុងជំរុញនូវបរិយាកាសដែលអំណោយផលដល់ការពង្រីកសមត្ថភាពផលិត semiconductor យ៉ាងសកម្ម។

៤. សហរដ្ឋអាមេរិក៖ សហរដ្ឋអាមេរិកធ្លាប់ជាកម្លាំងលេចធ្លោនៅក្នុងការផលិតគ្រឿងអេឡិចត្រូនិក ប៉ុន្តៃសមត្ថភាពផលិតបានធ្លាក់ចុះនៅក្នុងចំណែកទីផ្សារពិភពលោកក្នុងរយៈពេលប៉ុន្មានឆ្នាំកន្លងមកនេះ។ ទោះបីជាសហរដ្ឋអាមេរិកមានជំហររឹងមាំក្នុងការរចនាបន្ទះឈីប និងកម្មសិទ្ធិបញ្ញា ប៉ុន្តែមានភាពយឺតយ៉ាវក្នុងសមត្ថភាពផលិត។ ការប៉ាន់ប្រមាណបង្ហាញថា សមត្ថភាពផលិតរបស់អាមេរិកអាចមានប្រហែល ១០ ទៅ ១២ ភាគរយនៃសមត្ថភាពផលិតសកល។ ទោះជាយ៉ាងណាក្តី ក្រុមហ៊ុនដែលមានមូលដ្ឋាននៅសហរដ្ឋអាមេរិកបានកាន់កាប់ប្រហែល ៤៦,៣ ភាគរយនៃចំណែកទីផ្សារ semiconductor សរុបសកល ដែលត្រូវបានជំរុញដោយការច្នៃប្រឌិត និងការវិនិយោគជាយុទ្ធសាស្រ្ត។ ។

៥​. ចិន៖ ក្នុងនាមជាមជ្ឈមណ្ឌលផលិតកម្មដ៏ធំបំផុតមួយរបស់ពិភពលោក ចិនកំពុងបោះជំហានទៅមុខក្នុងការពង្រីកសមត្ថភាពផលិតមបន្ទះឈីបរបស់ខ្លួន។ ជាមួយនឹងគោលដៅប្រកបដោយមហិច្ឆិតា ចិនមានគោលបំណងកាត់បន្ថយការពឹងផ្អែកលើការនាំចូល និងជំរុញឧស្សាហកម្ម semiconductor របស់ខ្លួន ដើម្បីសម្រេចបាននូវការពឹងផ្អែកលើការផលិតខ្លួនឯងរហូតដល់ ២៥​ ភាគរយនៃសមត្ថភាពផលិតរបស់ពិភពលោកនៅឆ្នាំ ២០៣០។ បច្ចុប្បន្ននេះ ឧស្សាហកម្មបន្ទះឈីបរបស់ប្រទេសចិនកំពុងរីកចម្រើនយ៉ាងឆាប់រហ័ស ជាមួយសមត្ថភាពផលិតប្រហែល ៥ ទៅ ១០ ភាគរយនៃសមត្ថភាពផលិតសកល។ មិនត្រឹមតែប៉ុណ្ណោះ ចិនកំពុងវិនិយោគយ៉ាងខ្លាំងនៅក្នុងឧស្សាហកម្មក្នុងស្រុករបស់ខ្លួន ដើម្បីក្លាយទៅជាអ្នកមានឥទ្ធិពលបច្ចេកវិទ្យាមួយក្នុងប៉ុន្មានឆ្នាំខាងមុខនេះ។ ទោះជាយ៉ាងណាក្តី បញ្ហាប្រឈមដូចជា ភាពប៉ិនប្រសប់ផ្នែកបច្ចេកវិទ្យា និងភាពតានតឹងភូមិសាស្ត្រនយោបាយកាន់តែរីកធំឡើង ដែលបង្កជាឧបសគ្គដល់មហិច្ឆិតារបស់ចិនសម្រាប់វិស័យ semiconductor៕