សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វេទិកាផ្គូផ្គងរវាងអ្នកផលិត អ្នកលក់ និងអ្នកទិញ ជាវេទិកាដែលរៀបចំឡើងក្នុងគោលបំណងប្រមូលផ្ដុំអ្នកពាក់ព័ន្ធមកជួបគ្នា ដើម្បីស្វែងយល់អំពីតម្រូវការ ក៏ដូចជាផលលំបាករបស់អ្នកផលិត សំដៅកែលម្អចរន្តទីផ្សារផលិតផលក្នុងស្រុកឱ្យកាន់តែប្រសើរឡើង។
លោកបណ្ឌិត សួង ណយ ដែលជាអគ្គលេខាធិការរងនៃគណៈកម្មាធិការជាតិជំរុញចលនាភូមិមួយ ផលិតផលមួយក៏ធ្លាប់បានមានប្រសាសន៍ផងដែរថា វេទិកានេះក៏ចង់ជំរុញឱ្យមានការសាមគ្គីគ្នារវាង អ្នកទិញ-អ្នកលក់ ចំណែកឯការលក់ដូរគឺត្រូវឈរលើគោលការណ៍សុច្ចរិតភាព គុណភាព អនាម័យ និងរក្សាតម្លៃទៅតាមស្តង់ដារតម្លៃទីផ្សារ។ យ៉ាងណាមិញ វេទិកាផ្គូផ្គងរវាងអ្នកទិញ និងអ្នកលក់នេះ តែងតែត្រូវបានធ្វើឡើងជាប្រចាំ ដោយបំលាស់ទីពីខេត្តមួយ ទៅខេត្តមួយ នៅទូទាំងប្រទេសកម្ពុជាតែម្ដង។ ចំពោះវេទិកាបន្ទាប់ទៀត លោកបណ្ឌិត សួង ណយ បានបញ្ជាក់ឱ្យដឹងថា នឹងត្រូវធ្វើឡើងឱ្យបានមុនពិធីបុណ្យភ្ជុំបិណ្ឌ។
បើតាមប្រសាសន៍របស់លោកបណ្ឌិត ការធ្វើវេទិកានេះនៅមុនពិធីបុណ្យភ្ជុំបិណ្ឌ គឺនឹងរួមចំណែកយ៉ាងសំខាន់ក្នុងការជំរុញចលនាទិញផលិតផលខ្មែរ។ ទិញផលិតផលខ្មែរសម្រាប់ផ្ញើបងប្អូន ឬឪពុកម្ដាយនៅស្រុក និងសូម្បីតែទិញកសិផលខ្មែរសម្រាប់ចម្អិនម្ហូបយកទៅវត្តអារាមជាដើម គឺជាសកម្មភាពនៃការចូលរួមគាំទ្រ និងស្រឡាញ់ផលិតផលខ្មែរ។ ចលនានៃការទិញផលិតផលក្នុងស្រុកក្នុងឱកាសបុណ្យទាននេះ គឺមានសារៈសំខាន់មែនទែន ដោយវានឹងធ្វើឱ្យការចាយវាយក្នុងស្រុក មានចរន្ដល្អ ដែលបង្វែរពីការទិញផលិតផលនាំចូល ដែលរាប់ថាជាការខាតបង់សេដ្ឋកិច្ចមួយ។
ដោយឡែក សម្រាប់ទីតាំងវិញ គឺនៅមិនទាន់មានការកំណត់ច្បាស់លាស់នៅឡើយទេ ដោយលោកបណ្ឌិតបានឱ្យដឹងថា៖
«ទីតាំងគឺយើងមានពីរកន្លែងដែលកំពុងតែពិចារណា អាចនៅម៉ាក្រូសៀមរាប ឬក៏នៅម៉ាក្រូ ភ្នំពេញយើងតែម្ដង។ រឿងធ្វើគឺយើងដឹងតែធ្វើហើយ គ្រាន់តែមិនទាន់កំណត់ទីតាំងជាក់លាក់។»
លោកបណ្ឌិតក៏នៅតែបន្តលើកឡើងផងដែរថា អ្វីដែលលោកធ្វើបច្ចុប្បន្ននេះ គឺជាការកៀរគរត្រឹមតែកម្រិតអ្នកផលិត អ្នកទិញ និងអ្នកលក់ប៉ុណ្ណោះ បន្ថែមពីនេះក៏ទាមទារឲ្យមានការចូលរួមយ៉ាងសកម្មពីក្រសួង អង្គភាពមន្ទីរ ស្ថាប័នពាក់ព័ន្ឋ ដើម្បីជំរុញឲ្យមានការអភិវឌ្ឍផលិតផលថ្មីៗ ក៏ដូចជាពង្រឹងគុណភាព សមត្ថភាពពាណិជ្ជកម្ម និងការស្វែងរកដៃគូ ព្រមទាំងទីផ្សារ ដើម្បីផលិតតាមតម្រូវការទីផ្សាររបស់អ្នកបញ្ជារទិញផងដែរ ថាតើពួកគេចង់បានផលិតផលបែបណា ស្តង់ដារបែបណា ដូច្នេះអ្នកលក់ និងអ្នកទិញអាចចរចាគ្នាបាន។
គួរបញ្ជាក់ថា ជាទូទៅវេទិកាផ្គូផ្គងរវាងអ្នកផលិត និងអ្នកទិញនឹងមានតាំងបង្ហាញនូវផលិតផលក្នុងស្រុកជាច្រើនប្រភេទរបស់សហគ្រាសធុនមីក្រូ តូច និងមធ្យម នៅតាមទីតាំងផ្សេងៗគ្នា រាប់ទាំងប្រភេទបន្លែកែច្នៃ និងបន្លែ ផ្លែឈើស្រស់ផងដែរ៕
Account
Security
Favourite Content