សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របនឹងតម្រូវការផលិតផលកសិកម្មរបស់កម្ពុជាកំពុងមានកំណើននៅលើទីផ្សារអន្តរជាតិ ជាពិសេសប្រទេសចិន អ្នកជំនួញលើវិស័យកសិកម្មកំពូលៗនៅស្រុកស្ទឹងត្រង់ ខេត្តកំពង់ចាម បានស្នើឱ្យវិនិយោគិនបណ្ដាក់ទុនវិនិយោគក្នុងវិស័យកសិកម្ម ហើយគួរជ្រើសរើសរកដំណាំណាដែលប្រើរយៈពេលខ្លី និងមានទីផ្សារខ្ពស់នៅក្រៅប្រទេស ។
អ្នកឧកញ៉ា ហេង ឡុង អគ្គនាយកក្រុមហ៊ុន ឡុង ស្រេង ចម្ការកៅស៊ូបឹងកេត និងអ្នកវិនិយោគក្នុងវិស័យកសិកម្មដ៏ធំមួយក្នុងស្រុកស្ទឹងត្រង់ ខេត្តកំពង់ចាម បានមានប្រសាសន៍ថា អ្នកវិនិយោគក្នុងប្រទេសដែលមានដើមទុន គួរងាកមកសម្លឹងមើលការវិនិយោគលើវិស័យកសិកម្ម ដោយទម្លាក់ទុនឱ្យអស់លទ្ធភាព ហើយបើសិនជាអ្នកវិនិយោគចង់សិក្សាស្វែងយល់ពីវិស័យកសិកម្មកម្ពុជា អ្នកឧកញ៉ារីករាយក្នុងការផ្ដល់យោបល់ប្រឹក្សាជូន ដើម្បីធ្វើយ៉ាងណាឱ្យទទួលជោគជ័យ បើទោះបីជាមិនបានជោគជ័យ១០០ភាគរយ យ៉ាងហោចណាស់ក៏បាន៨០ភាគរយដែរ ។
អ្នកឧកញ៉ាបានចែករំលែកគន្លឹះនៃការវិនិយោគលើវិស័យកសិកម្មថា សម្រាប់អ្នកដែលដាក់ចិត្តវិនិយោគគឺត្រូវចុះជាប់ប្រចាំជាមួយការងារ ពិនិត្យពីស្ថានការងារជាក់ស្ដែង ដោយមិនអាចបោះទុនវិនិយោគហើយទុកចោល រង់ចាំកើបផលនោះទេ ព្រោះដំណាំត្រូវការមើលថែ និងត្រូវដឹកនាំបុគ្គលិកកម្មករធ្វើការងារដើម្បីឱ្យទទួលបានផលប្រយោជន៍ទាំងអស់គ្នា ។
អ្នកឧកញ៉ា ហេង ឡុង បានបន្តថា ៖
«ការវិនិយោគលើវិស័យកសិកម្ម ក៏អាចបង្កើតការងារជូនកម្មករ និយោជិតក្នុងស្រុក ដោយមិនចាំបាច់ធ្វើការចំណាកស្រុកទៅក្រៅប្រទេស ឆ្ងាយពីផ្ទះ ឆ្ងាយពីគ្រួសារដែរ ជាក់ស្ដែងក្នុងក្រុមហ៊ុនរបស់ខ្ញុំបច្ចុប្បន្ននេះ មានកម្មករ និងបុគ្គលិកសរុបចំនួន ៦ពាន់នាក់ ហើយក៏កំពុងត្រូវការបុគ្គលិកកម្មករ បន្ថែមរាប់ពាន់នាក់ថែមទៀតដែរ ។ នៅពេលឆាប់នេះ ក្រុមហ៊ុនគ្រោងនឹងពង្រីកការដាំដុះលើដំណាំម្នាស់ ដូច្នេះ នៅពេលនោះ នឹងមានតម្រូវការកម្មករប្រមាណ២ពាន់នាក់ថែមទៀត» ។
អ្នកស្រី ហេង ដាវី ម្ចាស់ចម្ការចេកដំបូងលឿនមួយកន្លែងដែលស្ថិតនៅក្នុងស្រុកស្ទឹងត្រង់ ខេត្តកំពង់ចាម ដែរនោះ ក៏បានបញ្ជាក់ថា បច្ចុប្បន្ននេះ ផលិតផលចេកអំបូងលឿងរបស់កម្ពុជាកំពុងមានទីផ្សារខ្ពស់នៅក្រៅប្រទេស ជាពិសេសនៅលើទីផ្សារចិន ។ អ្វីដែលកត់សម្គាល់នោះ ចេកអំបូងលឿងរបស់កម្ពុជាក៏ត្រូវប្រទេសជប៉ុនអនុញ្ញាតឱ្យនាំចូលដើម្បីផ្គត់ផ្គង់លើទីផ្សាររបស់គេដែរ ដូច្នេះបើសិនជាជប៉ុនទទួលស្គាល់ហើយ នោះបានន័យថាចេកអំបូងលឿងរបស់កម្ពុជានឹងមានទីផ្សារកាន់តែធំបន្ថែមទៀតនៅប្រទេសផ្សេងៗ ។
អ្នកស្រីបញ្ជាក់ថា ក្នុងមួយឆ្នាំៗក្រុមហ៊ុនរបស់អ្នកស្រីបានផលិត និងនាំចេញចេកអំបូងលឿងទៅកាន់ទីផ្សារអន្តរជាតិរាប់ម៉ឺនតោន ហើយក៏មានក្រុមហ៊ុនដៃគូនៅបរទេសជាច្រើនទៀតបញ្ជាទិញបន្ថែមដែរ ដូច្នេះ នឹងមានគម្រោងពង្រីកការដាំដុះចន្លោះពី ២០០ហិកតា ទៅ ៥០០ហិកតានបន្ថែមទៀត ។
ដោយឡែក អ្នកឧកញ៉ា ស៊ីវ ថា ម្ចាស់ចម្ការទុរេននាគខៀវ បឹងកេត ក៏បានថ្លែងដែរថា ទុរេនកម្ពុជាត្រូវបានទីផ្សារចិនបើកភ្លើងខៀវហើយ ដូច្នេះនៅពេលអនាគត ទីផ្សារទុរេនកម្ពុជានឹងកាន់តែកើនឡើង ដែលទាមទារឱ្យមានការដាំដុះបន្ថែមដើម្បីបំពេញតម្រូវការលើទីផ្សារ ទាំងក្នុង និងក្រៅប្រទេស ហើយវាក៏ជាឱកាសសម្រាប់វិនិយោគិនក៏ដូចជាកសិករក្នុងការពង្រីកការដាំដុះបន្ថែមផងដែរ ។
គួរបញ្ជាក់ថា សក្ដានុពលវិស័យកសិកម្មនៅក្នុងប្រទេសកម្ពុជា ត្រូវបានគេមើលឃើញថាអាចវិនិយោគបានស្ទើរតែគ្រប់ខេត្តទូទាំងប្រទេស គ្រាន់តែខេត្តនីមួយៗមានសក្ដានុពលទៅតាមប្រភេទដំណាំផ្សេងៗគ្នា ដូច្នេះ វិនិយោគិនដែលមានទុនសម្រាប់វិនិយោគ គួរប្រឹក្សាជាមួយអ្នកជំនាញ ដើម្បីបណ្ដាក់ទុនវិនិយោគលើដំណាំណាដែលមានសក្ដានុពលនៅតាមតំបន់ ៕
Account
Security
Favourite Content