បរទេស៖ យោងតាមប្រភពព័ត៌មានពី CNN បានរាយការណ៍ថា រដ្ឋសភាវៀតណាមបានអនុម័តតែងតាំងអតីតនាយឧត្តមសេនីយ៍ Long Cuong ជាប្រធានាធិបតីថ្មីរបស់ខ្លួនកាលពីថ្ងៃចន្ទ ក្នុងសប្ដាហ៍នេះ។

ប្រធានាធិបតីថ្មីរបស់វៀតណាម លោក Long Cuong មានអាយុ ៦៧ ឆ្នាំត្រូវបានជ្រើសរើសដោយរដ្ឋសភា សម្រាប់កាន់តំណែងនេះជំនួសប្រធានាធិបតី To Lam បន្ទាប់ពីគាត់ត្រូវបានតែងតាំងជាអគ្គលេខាធិការបក្សកុម្មុយនិស្តផ្លូវការកាលពីខែសីហាកន្លងទៅនេះ។

លោក Long Cuong បានបម្រើការងារក្នុងជួរកងទ័ពវៀតណាមអស់រយៈពេលជាង ៤ ទសវត្សរ៍មកហើយដោយគិតចាប់តាំងពីសង្គ្រាមវៀតណាមឆ្នាំ១៩៧៥ និងបានក្លាយជាសមាជិកការិយាល័យនយោបាយចាប់តាំងពីឆ្នាំ២០២១។ នៅក្នុងការថ្លែងសុន្ទរកកាល​ពី​ថ្ងៃ​ចន្ទ​ លោក Cuong ​និយាយ​ថា គាត់​បាន​ស្ម័គ្រ​ចិត្ត​ចូល​បម្រើ​កងទ័ព ដើម្បីបង្រួបបង្រួមប្រទេសជាមួយនឹងក្តីសង្ឃឹមយកជ័យជំនះ ហើយត្រលប់មកវិញដោយរស់រានមានជីវិតដោយមិនគិតស្រមៃចង់បានតំណែងធំនោះទេ។

ទន្ទឹមនឹងនេះ ​លោក Cuong បាន​ប្តេជ្ញា​អនុវត្ត​គោលនយោបាយ​ការបរទេស​ឆ្ពោះទៅរកសន្តិភាព និង​ឯករាជ្យ​ ដើម្បី​លើក​ស្ទួយ​វៀត​ណាម ក្នុង​នាម​ជា​មិត្ត ដៃគូ​ជាទី​ទុក​ចិត្ត និងសមាជិក​សកម្មប្រកបដោយ​ការទទួលខុសត្រូវ​នៅក្នុងសហគមន៍​អន្តរជាតិ។ ការតែងតាំងលោក Long Cuong ត្រូវបានធ្វើឡើងបន្ទាប់ពីមានភាពច្របូកច្របល់ជាច្រើនខែនៅក្នុងនយោបាយរបស់វៀតណាមពាក់ព័ន្ធនឹងអំពើរពុករលួយ និងការស្លាប់របស់អតីតអគ្គលេខាធិការបក្ស លោក Nguyen Phu Trong ដែលបានគ្រប់គ្រងការដឹកនាំរបស់ប្រទេសតាំងពីឆ្នាំ២០១១។

លោក Nguyen Khac Giang មកពីវិទ្យាស្ថាន ISEAS-Yusof Ishak របស់ប្រទេសសិង្ហបុរី បានលើកឡើថា ការតែងតាំងលោក Cuong ជាប្រធានាធិបតីថ្មីគឺជាការផ្លាស់ប្តូរដើម្បីរក្សាស្ថិរភាពប្រព័ន្ធ បន្ទាប់ពីមានភាពចលាចល់ជាច្រើនខែ។ លើសពីនេះ ការតែងតាំងរបស់លោក Luong Cuong គឺដើម្បីស្តារតុល្យភាពរវាងសសរស្តម្ភនៃតំណែងកំពូលៗចំនួន ៤ របស់វៀតណាម។

គួរឲ្យបញ្ជាក់ដែរថា តំណែងជាប្រធានាធិបតីគឺដើរតួជាប្រមុខរដ្ឋភាគច្រើនចូលរួមក្នុងកម្មវិធីជួបជាមួយឥស្សរជនបរទេស ឬ ទំនាក់ទំនងការទូត ខណៈដែលតួនាទីរបស់អគ្គលេខាធិការ គឺជាមុខតំណែងដ៏មានឥទ្ធិពលបំផុតនៅក្នុងប្រទេសវៀតណាម ដែលមានអំណាចសម្រេចកិច្ចការផ្សេងៗនៅក្នុងប្រទេស។ រចនាសម្ព័ន្ធថ្នាក់ដឹកនាំរបស់វៀតណាមមានសសរស្តម្ភនៃតំណែងកំពូលៗចំនួន ៤ រួមមាន អគ្គលេខាធិការបក្ស ប្រធានាធិបតី នាយករដ្ឋមន្រ្តី និងប្រធានរដ្ឋសភា៕