ភ្នំពេញ៖ កាណាដា បានតម្លើងបេសកកម្មការទូតរបស់ខ្លួននៅរាជធានីភ្នំពេញទៅជាស្ថានទូតពេញលេញកាលពីអំឡុងខែមីនា ឆ្នាំ២០២៥ ដើម្បីពង្រឹងការប្តេជ្ញាចិត្តរយៈពេលវែងរបស់ខ្លួនចំពោះប្រទេស កម្ពុជា និងតំបន់ឥណ្ឌូ-ប៉ាស៊ីហ្វិកទាំងមូល។

យោងតាមសេចក្តីប្រកាសព័ត៌មានរបស់ Global Affaire Canada នាដើមសប្តាហ៍នេះបានបញ្ជាក់ថា កម្ពុជាកំពុងក្លាយខ្លួនជាដៃគូពាណិជ្ជកម្មដ៏សំខាន់មួយសម្រាប់កាណាដា នៅក្នុងតំបន់ឥណ្ឌូ ប៉ាស៊ីហ្វិក។ មិនថាក្នុងវិស័យ​កសិកម្ម ហេដ្ឋារចនាសម្ព័ន្ធ ឬបច្ចេកវិទ្យាហិរញ្ញវត្ថុនោះទេ ក្រុមហ៊ុនកាណាដាមានគោលជំហរល្អក្នុងការគាំទ្រជាអាទិភាពអភិវឌ្ឍន៍របស់កម្ពុជា។

គួរជម្រាបផងដែរថា នៅក្នុងការជំរុញដ៏សំខាន់នៃទំនាក់ទំនងសេដ្ឋកិច្ចកាណាដា-កម្ពុជា លោកស្រី សារ៉ា វីល ស (Sara Wilshaw) ស្នងការពាណិជ្ជកម្មនៃប្រទេសកាណាដា និងជាឧបការី អនុរដ្ឋមន្ត្រី ទទួលបន្ទុកកិច្ចការអភិវឌ្ឍធុរកិច្ចអន្តរជាតិនៃក្រសួងការបរទេសកាណាដា បានដឹកនាំគណៈប្រតិភូពាណិជ្ជកម្មកាណាដាដ៏ធំបំផុតដែលមិនធ្លាប់មានមកព្រះរាជាណាចក្រកម្ពុជាក្នុងសប្តាហ៍នេះ ខណៈដែលពាណិជ្ជកម្មទ្វេភាគីរវាងប្រទេសទាំងពីរបានកើនឡើងចំនួន ២៣ ភាគរយក្នុងរយៈពេល ៤ ខែដំបូងនៃឆ្នាំ២០២៥។

បេសកកម្មពាណិជ្ជកម្មដែលជាផ្នែកមួយនៃក្រុមបេសកកម្មពាណិជ្ជកម្មកាណាដាឆ្នាំ២០២៥ (Team Canada Trade Mission-TCTM) បានធ្វើទស្សនកិច្ចនៅព្រះរាជាណាចក្រកម្ពុជាចាប់ពីថ្ងៃ​ទី​២៨ ដល់ថ្ងៃទី៣០ ខែឧសភា ហើយគណៈប្រតិភូមានតំណាងជាង ៩០នាក់ មកពីក្រុមហ៊ុន និងស្ថាប័នកាណាដាជាង ៥០។

យោងតាមអគ្គនាយកដ្ឋានគយ និងរដ្ឋាករកម្ពុជា ក្នុងរយៈពេល៤ខែ គិតចាប់ពីខែមករា ដល់ខែមេសា ឆ្នាំ២០២៥ ការនាំចេញរបស់កម្ពុជាទៅកាន់ប្រទេសកាណាដាមានចំនួន ៣៦៦.៥៧ លានដុល្លារ ពោលគឺកើនឡើង ២៥.១ ភាគរយ ខណៈការនាំចូលពីកាណាដាមានការកើនឡើងតិចតួចជាងត្រឹមតែ ៤.៩ ភាគរយ ឬស្មើនឹងប្រមាណ ១៨.៨២ លានដុល្លារប៉ុណ្ណោះ។

គួររំលឹកផងដែរថា ពាណិជ្ជកម្មទំនិញទ្វេភាគីរវាងកាណាដា និងកម្ពុជា កើនដល់ ២,៤ ប៊ីលានដុល្លារក្នុងឆ្នាំ២០២៤ ដោយប្រទេសកាណាដាឈរនៅលំដាប់ទី ៤ នៃទីផ្សារនាំចេញសម្លៀកបំពាក់ និងវាយនភណ្ឌរបស់កម្ពុជា។ ការនាំចូលពីប្រទេសកាណាដាមកកាន់កម្ពុជាមានតម្លៃសរុប ៣៣,៥ លានដុល្លារក្នុងឆ្នាំ ២០២៤ ខណៈការវិនិយោគដោយផ្ទាល់របស់កាណាដានៅកម្ពុជាបានកើនឡើងដល់ ២,៩ ប៊ីលានដុល្លារ៕