សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពសារព័ត៌មានបរទេសបានរាយការណ៍ថា ផលិតផលក្នុងស្រុកសរុបរបស់ប្រទេសចិនបានកើនឡើងដល់ ៥,៣ ភាគរយនៅក្នុងត្រីមាសទីមួយធៀបនឹងឆ្នាំមុន ដែលលើសពីការរំពឹងទុករបស់អ្នកព្យាករណ៍។
កាលពីថ្ងៃអង្គារ៍កន្លងទៅនេះ រដ្ឋាភិបាលចិនបានប្រកាសថា សេដ្ឋកិច្ចធំទី ២ របស់ពិភពលោកបានកើនឡើងក្នុងអត្រា ៥,៣ ភាគរយដោយគិតចាប់ពីខែមករាដល់ខែមីនា លើសពីការព្យាករណ៍ ៤,៨ ភាគរយ។ ការិយាល័យស្ថិតិជាតិរបស់ចិនបានលើកឡើងថា សេដ្ឋកិច្ចប្រទេសបានចាប់ផ្តើមល្អនៅក្នុងត្រីមាសទីមួយ ដែលជាមូលដ្ឋានគ្រឹះដ៏ល្អសម្រាប់មួយឆ្នាំពេញ។ យ៉ាងណាមិញ បញ្ហាមួយចំនួនកាន់តែស្មុគស្មាញ និងមានភាពមិនប្រាកដប្រជា។ ទន្ទឹមនឹងនេះ បើធៀបនឹងឆ្នាំមុន ផលិតកម្មឧស្សាហកម្មបានកើនឡើង ៦,១ ភាគរយនៅក្នុងត្រីមាសទីមួយ ខណៈដែលតម្លៃអ្នកផលិតឧស្សាហកម្មបានធ្លាក់ចុះ ២,៧ ភាគរយដោយសារតែសម្ពាធបរិត្តផរណាបន្តប៉ះពាល់លើវិស័យផលិតកម្ម។
លើសពីនេះ ការវិនិយោគលើទ្រព្យសកម្មថេរបានកើនឡើង ៤,៥ ភាគរយធៀបនឹងឆ្នាំមុន ដែលត្រូវបានជំរុញដោយការកើនឡើងនៃការវិនិយោគផលិតកម្ម ៩,៩ ភាគរយ។ បន្ថែមពីនេះ ការលក់រាយបានធ្លាក់ចុះ ៤,៧ ភាគរយក្នុងត្រីមាសនេះ ដោយធ្លាក់ចុះពី ៥,៥ ភាគរយនាអំឡុងខែមករាដល់ខែកុម្ភៈ ហើយវិស័យអចលន្យទ្រព្យបន្តធ្លាក់ចុះ ៩,៩ ភាគរយ។
អ្នកវិភាគបានចាត់ទុកថា កំណើនដ៏រឹងមាំនេះជំរុញដោយការរួមបញ្ចូលគ្នានៃគោលនយោបាយរបស់រដ្ឋាភិបាលក្នុងគោលបំណងជំរុញសេដ្ឋកិច្ច ការកើនឡើងនៃការចំណាយរបស់អ្នកប្រើប្រាស់ក្នុងអំឡុងពេលថ្ងៃឈប់សម្រាកបុណ្យចូលឆ្នាំចិន និងការជំរុញការវិនិយោគ។ ទោះជាយ៉ាងណា ក្តីបារម្ភនៅតែបន្តកើតមានចំពោះភាពទន់ខ្សោយដែលអាចកើតមាននៅក្នុងសូចនាករសេដ្ឋកិច្ចក្នុងខែមីនា ជាពិសេសនៅក្នុងសកម្មភាពក្រោយថ្ងៃឈប់សម្រាក។ លើសពីនេះ តម្រូវការខាងក្រៅនៅតែមិនប្រាកដប្រជា ដែលត្រូវបានគូសបញ្ជាក់ដោយការថយចុះនៃការនាំចេញក្នុងខែមីនា។ អ្នកព្យាករណ៍កត់សម្គាល់ថា ការចំណាយគ្រួសារវិលត្រឡប់ទៅភាពធម្មតាវិញក្រោយពីថ្ងៃឈប់សម្រាក និងវិធីសាស្រ្តប្រុងប្រយ័ត្នចំពោះការចំណាយរបស់រដ្ឋាភិបាល និងការជំរុញផ្សេងទៀតនឹងប៉ះពាល់ដល់កំណើនសេដ្ឋកិច្ចនៅក្នុងត្រីមាសនេះ។
ក្នុងកិច្ចខិតខំប្រឹងប្រែងដើម្បីពង្រឹងសេដ្ឋកិច្ច ទីក្រុងប៉េកាំងបានបង្ហាញនូវគំនិតផ្តួចផ្តើមគោលនយោបាយរូបិយវត្ថុ និងសារពើពន្ធមួយចំនួន។ ប្រទេសចិនបានកំណត់គោលដៅកំណើនផលិតផលក្នុងស្រុកសរុប (GDP) របស់ខ្លួនប្រហែល ៥ ភាគរយសម្រាប់ឆ្នាំ២០២៤ ហើយកំណើនដ៏ខ្លាំងបែបនេះជាធម្មតានឹងជំរុញឱ្យតម្លៃភាគហ៊ុននៅទូទាំងតំបន់កើនឡើងខ្ពស់។ យ៉ាងណាមិញ កាលពីថ្ងៃអង្គារ ភាគហ៊ុនអាស៊ីបានធ្លាក់ចុះយ៉ាងខ្លាំង បន្ទាប់ពីភាគហ៊ុនបានធ្លាក់ចុះនៅ Wall Street ។ ទន្ទឹមនឹងនេះ កំណើនដ៏រឹងមាំនៅក្នុងសេដ្ឋកិច្ចដ៏ធំបំផុតរបស់តំបន់នេះ ក៏ត្រូវបានគេមើលឃើញថាមានភាពវិជ្ជមានសម្រាប់ប្រទេសជិតខាងរបស់ខ្លួនផងដែរ ដោយសារពួកគេពឹងផ្អែកលើតម្រូវការរបស់ចិនកាន់តែច្រើនឡើងដើម្បីជំរុញសេដ្ឋកិច្ចរបស់ខ្លួន៕
Account
Security
Favourite Content