ភ្នំពេញ៖ អ្នកជំនាញវិស័យអប់រំ និងបណ្តុះបណ្តាលមកពីវិស័យឯកជន និងរដ្ឋាភិបាល បានចូលរួមចែករំលែកចំណេះដឹង បទពិសោធន៍ ទាក់ទងនឹងជំនាញដែលកំពុងពេញនិយម ត្រូវនឹងទីផ្សារការងារបច្ចុប្បន្ន ដល់និស្សិតដែលកំពុងចាប់ផ្តើមសិក្សា កំពុងសិក្សា និងនិស្សិតជិតបញ្ចប់ការសិក្សា ។

កម្មវិធីបើកបវេសនកាលឆ្នាំសិក្សា២០២៥-២០២៦ និងប្រគល់សញ្ញាបត្រជូនសិក្ខាកាមប្រឡងជាប់ជំនាញគណនេយ្យ ATQ នេះ បានត្រូវរៀបចំឡើងដោយវិទ្យាស្ថានហិរញ្ញវត្ថុ និងគណនេយ្យ កាលពីព្រឹកថ្ងៃទី១៩ ខែធ្នូ ឆ្នាំ២០២៥ នៅមជ្ឈមណ្ឌលសហប្រតិបត្តិការកម្ពុជាកូរ៉េ (CKCC )។

លោក ប៊ុន សុន្ទរង្គ នាយកវិទ្យាស្ថានហិរញ្ញវត្ថុ និងគណនេយ្យ (IFA) បានមានប្រសាសន៍ថា៖ កម្មវិធីនេះ គឺដើម្បីអបអរសាទរដល់និស្សិតឆ្នើមនៃវិទ្យាស្ថាន IFA ទាំងអស់ដែលទទួលបានជ័យលាភីលើការសិក្សារបស់ខ្លួន និងដើម្បីលើកទឹកចិត្តដល់និស្សិតឆ្នើមគ្រប់កម្រិត ជាពិសេសចែករំលែកពីកម្មវិធីសិក្សាដែលកំពុងធ្វើកំណែប្រែឱ្យត្រូវទីផ្សារការងារបច្ចុប្បន្ន។

កម្មវិធីនេះ បានចែករំលែកបទបង្ហាញពីរបៀបរៀបចំរបាយការណ៍ហិរញ្ញវត្ថុ និងការបំប្លែងការងារហិរញ្ញវត្ថុបែបស្វ័យប្រវត្តិក្នុងសម័យឌីជីថល បទបង្ហាញពីសារៈសំខាន់នៃវិក្កយបត្រឌីជីថលក្នុងការធ្វើអាជីវកម្មសាមញ្ញនិងត្រឹមត្រូវ រួមទាំងរបៀបប្រើប្រាស់ AI និងBLOCKCHAIN ក្នុងការប្រែលម្អប្រព័ន្ធហិរញ្ញវត្ថុ និងអាជីវកម្មបែបច្នៃប្រឌិត។

លោកបានបញ្ជាក់ថា៖វិទ្យាស្ថានហិរញ្ញវត្ថុ និងគណនេយ្យ បានធ្វើកំណែទម្រង់ថ្មីនិងបន្ថែមមុខវិជ្ជាថ្មីៗចាំបាច់មួយចំនួនដើម្បីឆ្លើយតបនឹងតម្រូវការទីផ្សារបច្ចុប្បន្ននិងសង្គមឌីជីថល។វិទ្យាស្ថានបានបន្ថែមជំនាញថ្មីមួយចំនួន រួមមានទី១- បញ្ញាសិប្បនិម្មិត វិទ្យាសាស្ត្រទិនន័យ(AI & Data Science) ជាជំនាញថ្មីលើកទឹកចិត្តឱ្យនិស្សិតចាប់អារម្មណ៍ព្រោះកំពុងពេញនិយមនៅក្នុងពិភពលោកដោយអាចយកទៅប្រើប្រាស់នៅក្នុងគ្រប់វិស័យដូចជាផ្នែកគណនេយ្យ ពន្ធដារ ហិរញ្ញវត្ថុជាដើម,ទី២- ធនាគារឌីជីថលនិងបច្ចេកវិទ្យាហិរញ្ញវត្ថុ(Digital Banking $ Fintech) ,ទី៣- ពាណិជ្ជកម្ម និង បច្ចេកវិទ្យាពត៌មាន(Business and IT) ដែលបង្រួមមុខវិទ្យា៣ចូលគ្នាគឺ ការគ្រប់គ្រងពាណិជ្ជកម្ម ការគ្រប់គ្រងធនធានមនុស្ស និងទីផ្សារទី៤-សន្តិសុខ សាយប៊័រ និងវិស្វកម្មសូហ្វវែរ( Cyber Security and Software engineering)ដែលជំនាញនេះក្រសួងប្រៃសណីយនិងទូរគមនាគមន៍កំពុងជំរុញខ្លាំងព្រោះសម័យនេះពួក Hacke r និងមេរោគ(Virus)កំពុងលុកលុយខ្លាំងព្រមទាំងជំនាញមួយចំនួនទៀតដូចជាRobotic Process Automation , Digital Tax System& E- Filing, Fintech Flatform  Cloud Computing ,Data Analytics & Business Intelligence ,AI Bookkeeper ជាដើម។

លោកស្រី សាវុធ  ដាលី នាយិកាប្រតិបត្តិនៃវិទ្យាស្ថានគណនេយ្យករជំនាញនិងសវនករកម្ពុជា​(KICPAA) បានចែករម្លែកពីគន្លឹះខ្លីៗស្តីពី “ការវិវត្តន៍នៃវិស័យគណនេយ្យ និងកម្មវិធីសិក្សាបច្ចេកទេសគណនេយ្យ (ATQ) ដោយបញ្ជាក់ថា ជំនាញគណនេយ្យ ងាយស្រួលរកការងារធ្វើដោយសារស្ថាប័ននីមួយៗត្រូវការគណនេយ្យករចាំបាច់ ហើយជំនាញនេះកំពុងពេញនិយម។

លោក សុខ សុភមង្គល ស្ថាបនិកនៃក្រុមហ៊ុន Codingate Technology Co., Ltd និងGatemaster.ai បានចូលរួមធ្វើបទបង្ហាញទាក់ទងនឹងការអប់រំនិងការងារដោយប្រើAI ។លោកក៏បានលើកឡើងអំពីបញ្ហាប្រឈមរបស់អាជីវកម្ម និងអាជីពនៅកម្ពុជា ការប្រើប្រាស់AI សម្រាប់ការគ្រប់គ្រងអាជីវកម្មសហគ្រាសធនតូចនិងមធ្យម៕