សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងឆ្នាំ២០២៤កន្លងទៅ វិស័យកសិកម្មកម្ពុជាបានបន្តរួមចំណែកប្រមាណ ១៦,៧%នៃផលិតផលសរុបក្នុងស្រុក ជាមួយនឹងតម្លៃបន្ថែមសរុបជាង ៧,៨២ពាន់លានដុល្លារអាម៉េរិក ខណៈដែលការនាំចេញផលិតផលកសិកម្មបានជាង ១២លានតោន ទៅកាន់ទិសដៅ ៩៥ប្រទេស គិតជាទឹកប្រាក់ប្រមាណ ៥,៣ពាន់លានដុល្លារអាម៉េរិក។
ដោយឡែក នៅក្នុងរយៈពេល៩ខែ នៃឆ្នាំ២០២៥ កម្ពុជាបាននាំចេញផលិតផលកសិកម្មជាង ១១លានតោន កើនឡើងប្រមាណ ៣០ភាគរយ ធៀបនឹងរយៈពេលដូចគ្នាក្នុងឆ្នាំ២០២៤។ កំណើននេះបង្ហាញពីគុណភាព និងភាពទាក់ទាញនៃផលិតផលកសិកម្មកម្ពុជា។ នេះបើតាមការថ្លែងរបស់ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក្នុងវេទិកា និងពិព័រណ៌កសិកម្មកម្ពុជា ឆ្នាំ២០២៥ នាថ្ងៃទី១៣ ខែវិច្ឆិកា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ ។
ឯកឧត្តមរដ្ឋលេខាធិការបានបន្តថា៖ វេទិកា និងពិព័រណ៌កសិកម្មកម្ពុជា គឺជាគំនិតផ្ដួចផ្ដើមរបស់ឯកឧត្តមរដ្ឋមន្ដ្រី ឌិត ទីណា ក្នុងគោលបំណងផ្សារភ្ជាប់តួអង្គទាំងអស់នៅក្នុងខ្សែច្រវាក់តម្លៃនៃផលិតផលកសិកម្មសំខាន់ៗរបស់កម្ពុជា ទាក់ទាញអ្នកវិនិយោគ លើកកម្ពស់ពាណិជ្ជកម្ម និងជំរុញការច្នៃប្រឌិតក្នុងវិស័យកសិស្បៀងអាហារនៅកម្ពុជា តាមរយៈការប្រើប្រាស់វត្ថុធាតុដើមឱ្យអស់ពីលទ្ធភាព។ តាមរយៈពិព័រណ៍នេះដែរ វិស័យឯកជនទាំងក្នុង និងក្រៅប្រទេស ជាពិសេស វិនិយោគិន និងធុរជន មានឱកាសស្វែងយល់ពីកាលានុវត្តភាពវិនិយោគក្នុងវិស័យកសិកម្ម, កសិ-ពាណិជ្ជកម្ម និងកសិ-ស្បៀងអាហារនៅកម្ពុជា។
ឯកឧត្តមបានកត់សម្គាល់ថា៖ក្នុងរយៈពេលជាច្រើនឆ្នាំកន្លងមកនេះ ប្រទេសកម្ពុជាត្រូវបានរុញឱ្យចេញផុតពីស្ថានភាពខ្វះស្បៀង និងពឹងផ្អែកលើជំនួយស្បៀងអាហារពីបរទេស មកជាការធានាបានទាំងស្រុងនូវសន្តិសុខស្បៀងក្នុងស្រុក ជាពិសេសក្នុងកាលៈទេសៈនៃការបិទព្រំដែនដោយឯកតោភាគីរបស់ប្រទេសថៃ អស់រយៈពេលជាច្រើនខែកន្លងមកនេះ ដែលនេះបង្ហាញពីចំណុចខ្លាំង និងភាពធន់នៃវិស័យកសិកម្មកម្ពុជាក្នុងពេលជួបវិបត្តិ។ ជាងនេះទៀត កម្ពុជាសម្រេចបានការនាំចេញផលិតផលកសិកម្មរាប់លានតោនជារៀងរាល់ឆ្នាំ ទៅកាន់ទីផ្សារពិភពលោក ដែលរួមចំណែកយ៉ាងសំខាន់ក្នុងការលើកកម្ពស់ជីវភាពបងប្អូនប្រជាកសិករនៅទូទាំងប្រទេស ទ្រទ្រង់កំណើនសេដ្ឋកិច្ចជាតិ និងចូលរួមធានាសន្តិសុខស្បៀងពិភពលោកថែមទៀតផង៕
Account
Security
Favourite Content