សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ តាមជំនឿប្រពៃណីចិន ការសែនដកជើងធូប គឺជាពិធីអរគុណ និងជូនដំណើរកុងម៉ា (ដូនតា) និងទេវតាឆ្នាំចាស់ ដែលបានថែរក្សាការពារឱ្យចម្រុងចម្រើនពួកគេអស់រយៈកាលមួយឆ្នាំកន្លងមកឱ្យត្រឡប់ទៅឋានសួគ៌វិញ ។ បន្ទាប់ពីកុងម៉ា និងទេវតា ដែលជាម្ចាស់កំប៉ុងជើងធូបទាំងនោះត្រឡប់ទៅវិញ បានសេចក្តីថា កំប៉ុងជើងធូបនេះនៅទំនេរពុំមានម្ចាស់ឡើយ រហូតកុងម៉ា និងទេវតាឆ្នាំថ្មីចូលមកជំនួស ។ ក្នុងពេលពុំមានម្ចាស់នេះឯង ជាពេលដែលម្ចាស់ផ្ទះដកជើងធូបចេញពីកំប៉ុង និងយកកំប៉ុងជើងធូបទៅលាងសម្អាតសម្រាប់រៀបចំទទួលទេវតាឆ្នាំថ្មី។
នៅកម្ពុជា ពិធីសែនដកជើងធូប ឬបុណ្យសែនអរគុណទេវតាឆ្នាំនេះនឹងត្រូវបានធ្វើឡើងចំថ្ងៃព្រហស្បតិ៍ទី ២៣ ខែមករា ឆ្នាំ ២០២៥។ សម្រាប់ថ្ងៃចូលឆ្នាំចិននឹងប្រារព្ធធ្វើឡើងនាថ្ងៃទី២៩,៣០ និង៣១ខែមករា ឆ្នាំ២០២៥ ហើយសម្រាប់ថ្ងៃទី២៨ គឺជាថ្ងៃសែនចូលឆ្នាំចិន។
គួរបញ្ជាក់ថា ទំនៀមទម្លាប់មួយនេះត្រូវបានប្រជាជនចិន ឬកូនខ្មែរសែស្រឡាយចិន តែងតែប្រាព្ធឡើងជារៀងរាល់ចុងឆ្នាំចាស់ ពោលគឺមុនសែនចូលឆ្នាំចិន ចន្លោះពី ៥-៧ថ្ងៃ មុនថ្ងៃចូលឆ្នាំថ្មីប្រពៃណីចិនឈានចូលមកដល់។
បើតាមជំនឿ គេនឹងធ្វើការដកជើងធូបគ្រប់កន្លែងដើម្បីដូរកំប៉ុង ជើងពាន ឬផើង ហើយផ្លាស់ខ្សាច់ឬអង្ករ ក្នុងកំប៉ុងជើងធូបឬជើងពានចេញ រួចប្តូរថ្មី ដើម្បីទទួលសិរីសួស្តីឆ្នាំថ្មីដែលនឹងឈានមកដល់។ក្នុងក្បួនដកជើងធូបនេះទៀតសោតគេមានត្រណមមួយគឺនៅពេលដែលដកហើយបើជាជំនាងផ្ទះ ឬ ហៅ ទីជុយអៀ ត្រូវតែទុកធូបចាស់ចំនួន៥សរសៃ ប៉ុន្តែបើជាកុងម៉ាវិញទុកបន្សល់ជើងធូបចាស់អោយបាន៣សរសៃ។
តាមជំនឿនេះដែរបានឱ្យដឹងថា ក្នុងថ្ងៃសែនដកជើងធូបនេះគេចាំបាច់ត្រូវធ្វើការសម្អាតទីកន្លែងជំនាងផ្ទះ កុងម៉ាឱ្យស្អាតបាត ព្រោះថាថ្ងៃនេះមិនមានការប្រកែប្រកាន់ពីសំណាក់អ្នកថែរក្សាផ្ទះសម្បែង ឬជីដូនជីតាដែលបានចែកឋានទៅនោះឡើយ។ ប្រពៃណីសែនដកជើងធូបនេះដែរនឹងធ្វើឡើងក្នុងមួយឆ្នាំម្តង ហើយគេមិនហ៊ានរុះរើតាមនឹកឃើញនោះឡើយ។
ក្នុងក្បួនជំនឿរបស់ជនជាតិចិនបានឱ្យដឹងថា ថ្ងៃសែនដកជើងធូបជាថ្ងៃសំខាន់មួយដែរមុនថ្ងៃចូលឆ្នាំចិនឈានមកដល់។ ការសែន គេធ្វើឡើងតែពេលព្រឹកមិនឱ្យហួសម៉ោង១២ថ្ងៃត្រង់ឡើយ។ ក្រៅពីនេះ ក្រោយពីថ្ងៃសែនដកជើងធូបទៅ រហូតដល់ថ្ងៃសែនចូលឆ្នាំចិន គេមិនចាំបាច់អុជធូបនោះឡើយ ពីព្រោះថាមិនមានទេវតាស្នាក់នៅឡើយ ពោលគឺទេវតាបានឡើងឋានសួគ៌អស់ហើយ។ សម្រាប់គ្រឿងសំណែនផ្សេងក៏អាចលើកចេញដូចគ្នា ពីព្រោះថាពុំមានទេវតាចាំសេពសោយនោះដែរ៕
Account
Security
Favourite Content