សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំំពេញ ៖ ការវិនិយោគលើធនធានរ៉ែនៅក្នុងប្រទេសកម្ពុជាបានចាប់ផ្ដើមមានកំណើនគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ហើយការវិនិយោគលើវិស័យនេះផងដែរ បានផ្ដល់នូវឱកាសការងារជាច្រើនដល់ពលរដ្ឋក្នុងប្រទេសកម្ពុជាទាំងផ្ទាល់ និងប្រយោល ដើម្បីទទួលបានប្រាក់ចំណូលសម្រាប់ផ្គត់ផ្គង់ជីវភាព ។
បើតាមលោក គង់ ស៊ីថា អគ្គនាយករងនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល បានមានប្រសាសន៍ថា ការវិនិយោគលើធនធានរ៉ែ មិនមែនផ្ដល់តែការងារដល់បុគ្គលិក កម្មករ ក្នុងក្រុមហ៊ុន រោងចក្រសហគ្រាសប៉ុណ្ណោះទេ ប៉ុន្តែវាបានផ្ដល់ការងារ និងប្រាក់ចំណូលដល់អ្នកពាក់ព័ន្ធជាច្រើនទៀត ។ ជាក់ស្ដែង បុគ្គលិក កម្មករ ត្រូវការហូបចុក ដូច្នេះ វាមានតម្រូវការទៅលើការផ្គត់ផ្គង់អាហារ ដែលតម្រូវឱ្យមានអ្នកផ្គត់ផ្គង់ដូចជាអ្នកដាំបន្លែ ចិញ្ចឹមសត្វ អ្នកចម្អិនអាហារ និងធ្វើការនៅក្នុងអាហារដ្ឋានជាដើម ។
លោកបន្តថា ៖
«ការវិនិយោគនៅក្នុងវិស័យរ៉ែ ត្រូវការគ្រឿងចក្រធំៗ ហើយក្នុងការងារនេះ ត្រូវការអ្នកបញ្ជាគ្រឿងចក្រ អ្នកបើកបររថយន្តដឹកថ្ម រ៉ែ ហើយនៅពេលគ្រឿងចក្រមានបញ្ហា យើងត្រូវការអ្នកជួសជុល ថែទាំ គ្រឿងចក្រ ។ ប៉ុន្តែបើសិនជាគ្រឿងចក្រនោះមិនទាន់មានអ្នកជួសជុល ឬថែទាំង ត្រូវការយកជំនាញពីខាងក្រៅ វាក៏អាចបង្រៀនដល់អ្នកក្នុងស្រុកមានចំណេះបន្ថែមពីការងារនេះផងដែរ»។
លោកបន្ថែមថា ក្រៅពីការផ្ដល់ការងារ និងប្រាក់ចំណូលដល់បុគ្គលិក កម្មករ នៅក្នុងវិស័យរ៉ែ វាក៏បានផ្ដល់នូវចំណូលដល់រដ្ឋសម្រាប់យកថវិកាកសាងជាតិ ដូចជាកសាងហេដ្ឋារចនាសម្ព័ន្ធនានា ហើយតាមរយៈក្រុមហ៊ុនវិនិយោគធនធានរ៉ែនេះដែរ ក៏បានចូលរួមចំណែកជាមួយរដ្ឋាភិបាលក្នុងការងារសង្គមនានាតាមរយៈជួយសង់សាលារៀន កសាងផ្លូវក្នុងតំបន់នានាជាដើមផងដែរ ។
លោក Bernie Cleary នាយកគ្រប់គ្រងនៃក្រុមហ៊ុន Renaissance Minerals (Cambodia ) Limited ដែលជាក្រុមហ៊ុនវិនិយោគលើរ៉ែមាសនៅតំបន់អូរខ្វាវ ស្រុកកែវសីមា ខេត្តមណ្ឌលគិរី បានឱ្យដឹងថា ក្រុមហ៊ុនវិនិយោគរ៉ែមាសនៅក្នុងខេត្តមណ្ឌលគិរី កំពុងប្រើប្រាស់កម្លាំងបុគ្គលិក និងកម្មករប្រមាណ ៧៥០នាក់ និងបានបង្កើតការងារជាច្រើនទៀតដល់អ្នកពាក់ព័ន្ធនៅខាងក្រៅដូចជាអ្នកផ្គត់ផ្គង់សម្រាប់ដំណើរការនៅក្នុងក្រុមហ៊ុនជាដើម ។
លោកបន្តថា ៖
«សម្រាប់បុគ្គលិក កម្មករ នៅក្នុងក្រុមហ៊ុន មុននឹងចូលធ្វើការ ត្រូវបានបណ្ដុះបណ្ដាលជំនាញពាក់ព័ន្ធនឹងការងារជាមុនសិន បើទោះបីជាពួកគេបានបញ្ចប់ការសិក្សាផ្នែកពាក់ព័ន្ធនឹងការងារក៏ដោយ ។ ការបណ្ដុះបណ្ដាលជំនាញដែលពាក់ព័ន្ធនឹងការងារដល់បុគ្គលិក កម្មករគឺដើម្បីឱ្យប្រាកដថាបុគ្គលិក កម្មករ បម្រើការងារនៅទីនេះ មានជំនាញនិងមានសុវត្ថិភាពក្នុងពេលកំពុងបំពេញការងារ» ។
ដោយឡែកលោកស្រី ឡេង ដាវី អនុប្រធានសមាគមអាជីវកម្មរ៉ែថ្មអារកម្ពុជា និងជាអគ្គនាយិកានៃក្រុមហ៊ុនថ្មអារ Rithy Cranite នៅក្នុងខេត្តក្រចេះ បានមានប្រសាសន៍ថា ការវិនិយោគលើវិស័យធនធានរ៉ែ បានផ្ដល់ការងារ និងប្រាក់កម្រៃសម្រាប់កែប្រែជីវភាពប្រជាពលរដ្ឋបានមួយកម្រិតផងដែរបន្ថែមពីលើការផ្ដល់ចំណូលដល់រដ្ឋសម្រាប់ចូលរួមអភិវឌ្ឍន៍ប្រទេស ជាក់ស្ដែង ការវិនិយោគលើធនធានរ៉ែថ្មអារ បានផ្ដល់ការងារជាច្រើន ទាំងក្នុងរោងចក្រ និងនៅក្នុងការដ្ឋានរ៉ែផ្ទាល់ផងដែរ ។
លោកស្រីបន្តថា ពីមួយឆ្នាំទៅមួយឆ្នាំ អាជីវកម្មរ៉ែថ្មអារបានផ្ដល់ចំណូលដល់រដ្ឋកាន់តែច្រើន ជាក់ស្ដែងកាលពីឆ្នាំ២០២៣ អាជីវកម្មរ៉ែថ្មអារនៅទូទាំងប្រទេសផ្ដល់ចំណូលដល់រដ្ឋត្រឹមតែប្រមាណជាង១០លានដុល្លារអាមេរិកប៉ុណ្ណោះ ប៉ុន្តែនៅឆ្នាំ២០២៤ វាបានផ្ដល់ចំណូលដល់រដ្ឋប្រមាណ៩០លានដុល្លារអាមេរិក ហើយរំពឹងថានឹងកើនឡើង១០ដងនៅពេលឆាប់ៗនេះខាងមុខនេះ ៕
Account
Security
Favourite Content