សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រដ្ឋមន្ត្រីក្រសួងទេសចរណ៍ បានអះអាងថា ក្រសួងមានផែនការទាក់ទាញភ្ញៀវទេសចរចិនពីខេត្តហឺណាន មកទស្សនាកម្ពុជាឱ្យបាន ១លាននាក់ ហើយនឹងកើនឡើងជាលំដាប់ពីមួយឆ្នាំទៅមួយឆ្នាំ ក្រោមកិច្ចសហការជាមួយក្រុមហ៊ុនទេសចរណ៍ចិនធំៗនៅខេត្តហឺណាន ប្រទេសចិន។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានថ្លែងបែបនេះបន្ទាប់ពីវិលត្រឡប់មកពីប្រទេសចិនវិញកាលពីពេលថ្មីៗក្រោយការចូលរួមព្រឹត្តិការណ៍ «ការសម្ដែងក្បាច់គុនរួមគ្នា ល្បុក្កតោ-សៅលីញ ហឺណាន-កម្ពុជា» ជាមួយនឹងការត្រៀមលក្ខណៈ មានផែនការច្បាស់លាស់ ដែលធ្វើយ៉ាងណាអាចជួយបង្កើនភ្ញៀវទេសចរអន្តរជាតិមកទស្សនាកម្ពុជាកាន់តែច្រើន។
ឯកឧត្តម រដ្ឋមន្ត្រី បានគូសបញ្ជាក់ថា ៖
«ខេត្តហឺណាន មានពលរដ្ឋប្រមាណ ១០០លាននាក់។ ដូច្នេះ ប្រសិនបើតែ១ភាគរយនៃពលរដ្ឋខេត្តនេះមកទស្សនាកម្ពុជា នោះទេសចរចិនពីខេត្តនេះអាចមានចំនួន ១លាននាក់។ ជាមួយគ្នានេះ ដើម្បីសម្រេចបានផែនការនេះបាន កម្ពុជាបានបើកស្ថានកុងស៊ុលនៅទីក្រុង Zhengzhou នៃខេត្តហឺណាន ដែលបង្កលក្ខណៈងាយស្រួលដល់ទេសចរ។ ជាពិសេសយើងបានប្ដេជ្ញាថានឹងរួមគ្នាខិតខំនាំទេសចរចិនមកទស្សនាកម្ពុជាឱ្យបាន១លាននាក់ក្នុងមួយឆ្នាំ នៅជំហានដំបូង។ ក្រោយបាន ១លាននាក់ហើយ យើងនឹងពង្រីកបន្ថែមទៀត អាចថា ២លាននាក់ ឬ ៣លាននាក់នៅឆ្នាំបន្តបន្ទាប់ទៀត»។
ឯកឧត្តម ហួត ហាក់ បានលើកឡើងបន្ថែមថា ឆ្នាំនេះគឺជា «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤»។ មុននឹងបិទបញ្ចប់«ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤» នៅខែមករា ឆ្នាំ២០២៥ ខាងមុខ ព្រឹត្តិការណ៍សំខាន់ៗចំនួននឹងត្រូវរៀបចំឡើង រួមមាន៖ ការតាំងបង្ហាញម្ហូបអាហារ កម្ពុជា-ចិន ដែលពីថ្ងៃ ២៦ដល់ ២៧ ខែតុលា កម្មវិធីវប្បធម៌ទេសចរណ៍ និងសាសនាកម្ពុជា-ចិន នៅខែវិច្ឆិកា និងកម្មវិធីទេសចរណ៍កម្ពុជា-ចិន ដែលព្រឹត្តិការណ៍ទាំងអស់នេះនឹងធ្វើឡើងនៅខេត្តសៀមរាប។
Account
Security
Favourite Content