ភ្នំពេញ ៖ នៅក្នុងឆ្នាំ២០២៤ ការចុះបញ្ជីសហគ្រាសធុនតូច និងមធ្យម និងសិប្បកម្មផ្នែកកម្មន្តសាល សរុបបានចំនួន ១ ២៩២មូលដ្ឋាន។ នេះបើតាមរបាយការណ៍របស់ក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍។

របាយការណ៍ពីសន្និបាតបូកសរុបការងារក្នុងឆ្នាំ២០២៤ និងទិសដៅការងារក្នុងឆ្នាំ២០២៥ នៅថ្ងៃទី២៥ ខែកុម្ភៈ ឆ្នាំ២០២៥ បានឱ្យដឹងថា៖ ការចុះបញ្ជីថ្នាក់កណ្តាល បានចំនួន ១៧មូលដ្ឋាន, ចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានបានចំនួន ៣៣៨មូលដ្ឋាន, តាមបណ្តាមន្ទីរ រាជធានី-ខេត្តចំនួន៨៣១មូលដ្ឋាន, និងចុះបញ្ជីនៅតាមរាជធានី-ខេត្ត/ក្រុង ស្រុក/ខណ្ឌ បានចំនួន១០៦មូលដ្ឋាន), បានចេញវិញ្ញាបនបត្រដំណើរការចំនួន ១.០ ៥ ២ មូលដ្ឋាន, និងវិញ្ញាបនបត្របន្តចំនួន១.៣៣៨មូលដ្ឋាន ដែលបង្កើតបានការងារថ្មីចំនួន២៥.៨៣៣នាក់។ ទន្ទឹមនឹងនេះ ក៏មានសហគ្រាសធុនតូច និងមធ្យម និងសិប្បកម្ម បានបិទចំនួន ១ ៩​៥​០​មូលដ្ឋានផងដែរ ដែលការណ៍នេះបានធ្វើឱ្យពលកម្មថយចុះចំនួន ១៣ ៥៧៦នាក់។

របាយការណ៍ដដែលបានឱ្យដឹងទៀតថា៖ គិតត្រឹមដំណាច់ឆ្នាំ២០២៤ សហគ្រាសធុនតូច និងមធ្យម និងសិប្បកម្មសរុបមានចំនួន៤៣.៩៧០មូលដ្ឋាន (សហគ្រិនស្ត្រី៨.៣២៥មូលដ្ឋាន) និងពលកម្មចំនួន៤៧​៦.​២២៣នាក់(ស្ត្រីជាង១៤ម៉ឺននាក់)។

ឯកឧត្តម ហែម វណ្ណឌី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងថា៖ ក្រសួងបាន និងកំពុងយកចិត្តទុកដាក់លើកកម្ពស់សហគ្រិនភាព និងការអភិវឌ្ឍសហគ្រាសធុនតូច និងមធ្យម ការ​ងារ​អភិវឌ្ឍន៍សេដ្ឋកិច្ចក្រៅប្រព័ន្ធ ក្នុងការបង្កើតការងារសមរម្យថ្មី និងតម្រង់ទិសថ្មី រួមជាមួយការបង្កើត និងកែសម្រួលក្របខណ្ឌគតិយុត្ត និងបទប្បញ្ញត្តិគាំទ្រពាក់ព័ន្ធនានា ដើម្បីរួមចំណែកត្រៀមកម្ពុជាក្នុងដំណើរចាកចេញពីឋានៈជាប្រទេសអភិវឌ្ឍន៍តិចតួចនៅឆ្នាំ២០២៩ដោយជោគជ័យ។

ឯកឧត្តមរដ្ឋមន្ត្រី លើកឡើងថា៖

«ការចាកចេញបានដោយជោគជ័យពីប្រទេសអភិវឌ្ឍន៍តិចតួចនៅឆ្នាំ២០២៩ គឺអាស្រ័យលើការកសាង និងពង្រឹងសមត្ថភាពទាំងអស់គ្នា ទាំងវិស័យសាធារណៈ វិស័យឯកជន និងប្រជាពលរដ្ឋ ដែលជាមូលធនមនុស្ស និងជាពលកម្មរបស់ជាតិ ដើម្បីអាចឱ្យកម្ពុជាឈរជើងប្រកួតប្រជែងបានជាមួយបណ្តាសេដ្ឋកិច្ចនានាក្នុងតំបន់»។

សូមបញ្ជាក់ថា ដើម្បីជំរុញ និងលើកកម្ពស់ការអភិវឌ្ឍវិស័យឧស្សាហកម្ម និងសេវាកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាន និងកំពុងយកចិត្តទុកដាក់អភិវឌ្ឍឧស្សាហកម្ម ៤.០ ស្របតាមនិន្នាការថ្មីនៃពិភពលោក ក្នុងការត្រៀមរៀបចំខ្លួនសម្រាប់សេដ្ឋកិច្ចឌីជីថល ដើម្បីចាប់យកឱកាសជំរុញការរីកចម្រើននៃទីផ្សារធុរកិច្ចបច្ចេកវិទ្យា ជំរុញ និងលើកកម្ពស់ការស្រាវជ្រាវ និងនវានុវត្តន៍ ក៏ដូចជាការគ្រប់គ្រង និងកាត់បន្ថយហានិភ័យដែលអាចកើតឡើងជាយថាហេតុដោយបច្ចេកវិទ្យា។

កាលពីឆ្នាំ២០២៤ កន្លងមក ក្រសួងក៏បានរៀបចំកិច្ចប្រជុំដើម្បីពិភាក្សា និងស្វែងរកដំណោះស្រាយចំពោះបញ្ហាប្រឈម និងសំណូមពរនានារបស់វិស័យសហគ្រាសធុនមីក្រូតូច និងមធ្យមដោយមានការចូលរួមពីតំណា​ងក្រសួងស្ថាប័នពាក់ព័ន្ធ ក្រុមការងារ “គ” ផ្នែកកម្មន្តសាល សហគ្រាសធុនតូច និងមធ្យម និងសេវាសមា​គមពាក់ព័ន្ធ តំណាងវិស័យឯកជន និងដៃគូអភិវឌ្ឍន៍ និងទីភ្នាក់ងារអង្គការសហប្រជាជាតិសរុបចំនួន ២៥៥​នាក់។ កិច្ចប្រជុំបានបង្ហាញពីគោលនយោបាយការគាំទ្ររបស់រាជរដ្ឋាភិបាល ក៏ដូចជាកិច្ចខិតខំប្រឹង ប្រែងផ្ទាល់របស់ក្រសួងឧស្សាហកម្មក្រសួង-ស្ថាប័ន និងដៃគូអភិវឌ្ឍន៍នានាក្នុងការចូលរួមលើកកម្ពស់ការអភិ​វឌ្ឍ​វិស័យសហគ្រាសធុនមីក្រូ តូច និងមធ្យម និងរបាយការណ៍លទ្ធផលការងារផ្នែកកម្មន្តសាល សហ​គ្រាសធុនតូច និងមធ្យម និងសេវា ព្រមទាំងបានលើកយកបញ្ហាប្រឈមចំនួន២២ និងសំណូមពរចំនួន៣៦មកពិនិត្យ៕